অধ্যায় 7

7.1

ধৃতরাষ্ট্র উবাচ
স্পৃশ মাং পাণিনা ভূয়ঃ পরিষ্বজ চ পাণ্ডব
জীবামীব হি সংস্পর্শাত্তব রাজীবলোচন

মূর্ধানং চ তবাঘ্রাতুমিচ্ছামি মনুজাধিপ
পাণিভ্যাং চ পরিস্প্রষ্টুং প্রাণা হি ন জহুর্মম

অষ্টমো হ্যদ্য কালোঽয়মাহারস্য কৃতস্য মে
যেনাহং কুরুশার্দূল ন শক্নোমি বিচেষ্টিতুম্

ব্যায়ামশ্চায়মত্যর্থং কৃতস্ত্বামভিয়াচতা
ততো গ্লানমনাস্তাত নষ্টসংজ্ঞ ইবাভবম্

তবামৃতসমস্পর্শং হস্তস্পর্শমিমং বিভো
লব্ধ্বা সংজীবিতোঽস্মীতি মন্যে কুরুকুলোদ্বহ

বৈশংপায়ন উবাচ
এবমুক্তস্তু কৌন্তেয়ঃ পিত্রা জ্যেষ্ঠেন ভারত
পস্পর্শ সর্বগাত্রেষু সৌহার্দাত্তং শনৈস্তদা

উপলভ্য ততঃ প্রাণান্ধৃতরাষ্ট্রো মহীপতিঃ
বাহুভ্যাং সংপরিষ্বজ্য মূর্ধ্ন্যাজিঘ্রত পাণ্ডবম্

বিদুরাদয়শ্চ তে সর্বে রুরুদুর্দুঃখিতা ভৃশম্
অতিদুঃখাচ্চ রাজানং নোচুঃ কিংচন পাণ্ডবাঃ

গান্ধারী ত্বেব ধর্মজ্ঞা মনসোদ্বহতী ভৃশম্
দুঃখান্যবারয়দ্রাজন্মৈবমিত্যেব চাব্রবীৎ

ইতরাস্তু স্ত্রিয়ঃ সর্বাঃ কুন্ত্যা সহ সুদুঃখিতাঃ
নেত্রৈরাগতবিক্লেদৈঃ পরিবার্য স্থিতাভবন্

অথাব্রবীত্পুনর্বাক্যং ধৃতরাষ্ট্রো যুধিষ্ঠিরম্
অনুজানীহি মাং রাজংস্তাপস্যে ভরতর্ষভ

গ্লায়তে মে মনস্তাত ভূয়ো ভূয়ঃ প্রজল্পতঃ
ন মামতঃ পরং পুত্র পরিক্লেষ্টুমিহার্হসি

তস্মিংস্তু কৌরবেন্দ্রে তং তথা ব্রুবতি পাণ্ডবম্
সর্বেষামবরোধানামার্তনাদো মহানভূৎ

দৃষ্ট্বা কৃশং বিবর্ণং চ রাজানমতথোচিতম্
উপবাসপরিশ্রান্তং ত্বগস্থিপরিবারিতম্

ধর্মপুত্রঃ স পিতরং পরিষ্বজ্য মহাভুজঃ
শোকজং বাষ্পমুত্সৃজ্য পুনর্বচনমব্রবীৎ

ন কাময়ে নরশ্রেষ্ঠ জীবিতং পৃথিবীং তথা
যথা তব প্রিয়ং রাজংশ্চিকীর্ষামি পরংতপ

যদি ত্বহমনুগ্রাহ্যো ভবতো দয়িতোঽপি বা
ক্রিয়তাং তাবদাহারস্ততো বেত্স্যামহে বয়ম্

ততোঽব্রবীন্মহাতেজা ধর্মপুত্রং স পার্থিবঃ
অনুজ্ঞাতস্ত্বয়া পুত্র ভুঞ্জীয়ামিতি কাময়ে

ইতি ব্রুবতি রাজেন্দ্রে ধৃতরাষ্ট্রে যুধিষ্ঠিরম্
ঋষিঃ সত্যবতীপুত্রো ব্যাসোঽভ্যেত্য বচোঽব্রবীৎ