Utshovঅধ্যায় 6
6.1
যুধিষ্ঠির উবাচ
ন মাং প্রীণয়তে রাজ্যং ত্বয্যেবং দুঃখিতে নৃপ
ধিঙ্মামস্তু সুদুর্বুদ্ধিং রাজ্যসক্তং প্রমাদিনম্
6.2
যোঽহং ভবন্তং দুঃখার্তমুপবাসকৃশং নৃপ
যতাহারং ক্ষিতিশয়ং নাবিন্দং ভ্রাতৃভিঃ সহ
6.3
অহোঽস্মি বঞ্চিতো মূঢো ভবতা গূঢবুদ্ধিনা
বিশ্বাসয়িত্বা পূর্বং মাং যদিদং দুঃখমশ্নুথাঃ
6.4
কিং মে রাজ্যেন ভোগৈর্বা কিং যজ্ঞৈঃ কিং সুখেন বা
যস্য মে ত্বং মহীপাল দুঃখান্যেতান্যবাপ্তবান্
6.5
পীডিতং চাপি জানামি রাজ্যমাত্মানমেব চ
অনেন বচসা তুভ্যং দুঃখিতস্য জনেশ্বর
6.6
ভবান্পিতা ভবান্মাতা ভবান্নঃ পরমো গুরুঃ
ভবতা বিপ্রহীণা হি ক্ব নু তিষ্ঠামহে বয়ম্
6.7
ঔরসো ভবতঃ পুত্রো যুয়ুত্সুর্নৃপসত্তম
অস্তু রাজা মহারাজ যং চান্যং মন্যতে ভবান্
6.8
অহং বনং গমিষ্যামি ভবান্রাজ্যং প্রশাস্ত্বিদম্
ন মাময়শসা দগ্ধং ভূয়স্ত্বং দগ্ধুমর্হসি
6.9
নাহং রাজা ভবান্রাজা ভবতা পরবানহম্
কথং গুরুং ত্বাং ধর্মজ্ঞমনুজ্ঞাতুমিহোত্সহে
6.10
ন মন্যুর্হৃদি নঃ কশ্চিদ্দুর্যোধনকৃতেঽনঘ
ভবিতব্যং তথা তদ্ধি বয়ং তে চৈব মোহিতাঃ
6.11
বয়ং হি পুত্রা ভবতো যথা দুর্যোধনাদয়ঃ
গান্ধারী চৈব কুন্তী চ নির্বিশেষে মতে মম
6.12
স মাং ত্বং যদি রাজেন্দ্র পরিত্যজ্য গমিষ্যসি
পৃষ্ঠতস্ত্বানুয়াস্যামি সত্যেনাত্মানমালভে
6.13
ইয়ং হি বসুসংপূর্ণা মহী সাগরমেখলা
ভবতা বিপ্রহীণস্য ন মে প্রীতিকরী ভবেৎ
6.14
ভবদীয়মিদং সর্বং শিরসা ত্বাং প্রসাদয়ে
ত্বদধীনাঃ স্ম রাজেন্দ্র ব্যেতু তে মানসো জ্বরঃ
6.15
ভবিতব্যমনুপ্রাপ্তং মন্যে ত্বাং তজ্জনাধিপ
দিষ্ট্যা শুশ্রূষমাণস্ত্বাং মোক্ষ্যামি মনসো জ্বরম্
6.16
ধৃতরাষ্ট্র উবাচ
তাপস্যে মে মনস্তাত বর্ততে কুরুনন্দন
উচিতং হি কুলেঽস্মাকমরণ্যগমনং প্রভো
6.17
চিরমস্ম্যুষিতঃ পুত্র চিরং শুশ্রূষিতস্ত্বয়া
বৃদ্ধং মামভ্যনুজ্ঞাতুং ত্বমর্হসি জনাধিপ
6.18
বৈশংপায়ন উবাচ
ইত্যুক্ত্বা ধর্মরাজানং বেপমানঃ কৃতাঞ্জলিম্
উবাচ বচনং রাজা ধৃতরাষ্ট্রোঽম্বিকাসুতঃ
6.19
সংজয়ং চ মহামাত্রং কৃপং চাপি মহারথম্
অনুনেতুমিহেচ্ছামি ভবদ্ভিঃ পৃথিবীপতিম্
6.20
গ্লায়তে মে মনো হীদং মুখং চ পরিশুষ্যতি
বয়সা চ প্রকৃষ্টেন বাগ্ব্যায়ামেন চৈব হি
6.21
ইত্যুক্ত্বা স তু ধর্মাত্মা বৃদ্ধো রাজা কুরূদ্বহঃ
গান্ধারীং শিশ্রিয়ে ধীমান্সহসৈব গতাসুবৎ
6.22
তং তু দৃষ্ট্বা তথাসীনং নিশ্চেষ্টং কুরুপার্থিবম্
আর্তিং রাজা যয়ৌ তূর্ণং কৌন্তেয়ঃ পরবীরহা
6.23
যুধিষ্ঠির উবাচ
যস্য নাগসহস্রেণ দশসংখ্যেন বৈ বলম্
সোঽয়ং নারীমুপাশ্রিত্য শেতে রাজা গতাসুবৎ
6.24
আয়সী প্রতিমা যেন ভীমসেনস্য বৈ পুরা
চূর্ণীকৃতা বলবতা স বলার্থী শ্রিতঃ স্ত্রিয়ম্
6.25
ধিগস্তু মামধর্মজ্ঞং ধিগ্বুদ্ধিং ধিক্চ মে শ্রুতম্
যত্কৃতে পৃথিবীপালঃ শেতেঽয়মতথোচিতঃ
6.26
অহমপ্যুপবত্স্যামি যথৈবায়ং গুরুর্মম
যদি রাজা ন ভুঙ্ক্তেঽয়ং গান্ধারী চ যশস্বিনী
6.27
বৈশংপায়ন উবাচ
ততোঽস্য পাণিনা রাজা জলশীতেন পাণ্ডবঃ
উরো মুখং চ শনকৈঃ পর্যমার্জত ধর্মবিৎ
6.28
তেন রত্নৌষধিমতা পুণ্যেন চ সুগন্ধিনা
পাণিস্পর্শেন রাজ্ঞস্তু রাজা সংজ্ঞামবাপ হ