অধ্যায় 5

5.1

ধৃতরাষ্ট্র উবাচ
বিদিতং ভবতামেতদ্যথা বৃত্তঃ কুরুক্ষয়ঃ
মমাপরাধাত্তত্সর্বমিতি জ্ঞেয়ং তু কৌরবাঃ

যোঽহং দুষ্টমতিং মূঢং জ্ঞাতীনাং ভয়বর্ধনম্
দুর্যোধনং কৌরবাণামাধিপত্যেঽভ্যষেচয়ম্

যচ্চাহং বাসুদেবস্য বাক্যং নাশ্রৌষমর্থবৎ
বধ্যতাং সাধ্বয়ং পাপঃ সামাত্য ইতি দুর্মতিঃ

পুত্রস্নেহাভিভূতশ্চ হিতমুক্তো মনীষিভিঃ
বিদুরেণাথ ভীষ্মেণ দ্রোণেন চ কৃপেণ চ

পদে পদে ভগবতা ব্যাসেন চ মহাত্মনা
সংজয়েনাথ গান্ধার্যা তদিদং তপ্যতেঽদ্য মাম্

যচ্চাহং পাণ্ডুপুত্রেষু গুণবত্সু মহাত্মসু
ন দত্তবাঞ্শ্রিয়ং দীপ্তাং পিতৃপৈতামহীমিমাম্

বিনাশং পশ্যমানো হি সর্বরাজ্ঞাং গদাগ্রজঃ
এতচ্ছ্রেয়ঃ স পরমমমন্যত জনার্দনঃ

সোঽহমেতান্যলীকানি নিবৃত্তান্যাত্মনঃ সদা
হৃদয়ে শল্যভূতানি ধারয়ামি সহস্রশঃ

বিশেষতস্তু দহ্যামি বর্ষং পঞ্চদশং হি বৈ
অস্য পাপস্য শুদ্ধ্যর্থং নিয়তোঽস্মি সুদুর্মতিঃ

চতুর্থে নিয়তে কালে কদাচিদপি চাষ্টমে
তৃষ্ণাবিনয়নং ভুঞ্জে গান্ধারী বেদ তন্মম

করোত্যাহারমিতি মাং সর্বঃ পরিজনঃ সদা
যুধিষ্ঠিরভয়াদ্বেত্তি ভৃশং তপ্যতি পাণ্ডবঃ

ভূমৌ শয়ে জপ্যপরো দর্ভেষ্বজিনসংবৃতঃ
নিয়মব্যপদেশেন গান্ধারী চ যশস্বিনী

হতং পুত্রশতং শূরং সংগ্রামেষ্বপলায়িনম্
নানুতপ্যামি তচ্চাহং ক্ষত্রধর্মং হি তং বিদুঃ
ইত্যুক্ত্বা ধর্মরাজানমভ্যভাষত কৌরবঃ

ভদ্রং তে যাদবীমাতর্বাক্যং চেদং নিবোধ মে
সুখমস্ম্যুষিতঃ পুত্র ত্বয়া সুপরিপালিতঃ

মহাদানানি দত্তানি শ্রাদ্ধানি চ পুনঃ পুনঃ
প্রকৃষ্টং মে বয়ঃ পুত্র পুণ্যং চীর্ণং যথাবলম্
গান্ধারী হতপুত্রেয়ং ধৈর্যেণোদীক্ষতে চ মাম্

দ্রৌপদ্যা হ্যপকর্তারস্তব চৈশ্বর্যহারিণঃ
সমতীতা নৃশংসাস্তে ধর্মেণ নিহতা যুধি

ন তেষু প্রতিকর্তব্যং পশ্যামি কুরুনন্দন
সর্বে শস্ত্রজিতাঁল্লোকান্গতাস্তেঽভিমুখং হতাঃ

আত্মনস্তু হিতং মুখ্যং প্রতিকর্তব্যমদ্য মে
গান্ধার্যাশ্চৈব রাজেন্দ্র তদনুজ্ঞাতুমর্হসি

ত্বং হি ধর্মভৃতাং শ্রেষ্ঠঃ সততং ধর্মবত্সলঃ
রাজা গুরুঃ প্রাণভৃতাং তস্মাদেতদ্ব্রবীম্যহম্

অনুজ্ঞাতস্ত্বয়া বীর সংশ্রয়েয়ং বনান্যহম্
চীরবল্কলভৃদ্রাজন্গান্ধার্যা সহিতোঽনয়া
তবাশিষঃ প্রয়ুঞ্জানো ভবিষ্যামি বনেচরঃ

উচিতং নঃ কুলে তাত সর্বেষাং ভরতর্ষভ
পুত্রেষ্বৈশ্বর্যমাধায় বয়সোঽন্তে বনং নৃপ

তত্রাহং বায়ুভক্ষো বা নিরাহারোঽপি বা বসন্
পত্ন্যা সহানয়া বীর চরিষ্যামি তপঃ পরম্

ত্বং চাপি ফলভাক্তাত তপসঃ পার্থিবো হ্যসি
ফলভাজো হি রাজানঃ কল্যাণস্যেতরস্য বা