অধ্যায় 4

4.1

বৈশংপায়ন উবাচ
যুধিষ্ঠিরস্য নৃপতের্দুর্যোধনপিতুস্তথা
নান্তরং দদৃশূ রাজন্পুরুষাঃ প্রণয়ং প্রতি

যদা তু কৌরবো রাজা পুত্রং সস্মার বালিশম্
তদা ভীমং হৃদা রাজন্নপধ্যাতি স পার্থিবঃ

তথৈব ভীমসেনোঽপি ধৃতরাষ্ট্রং জনাধিপম্
নামর্ষয়ত রাজেন্দ্র সদৈবাতুষ্টবদ্ধৃদা

অপ্রকাশান্যপ্রিয়াণি চকারাস্য বৃকোদরঃ
আজ্ঞাং প্রত্যহরচ্চাপি কৃতকৈঃ পুরুষৈঃ সদা

অথ ভীমঃ সুহৃন্মধ্যে বাহুশব্দং তথাকরোৎ
সংশ্রবে ধৃতরাষ্ট্রস্য গান্ধার্যাশ্চাপ্যমর্ষণঃ

স্মৃত্বা দুর্যোধনং শত্রুং কর্ণদুঃশাসনাবপি
প্রোবাচাথ সুসংরব্ধো ভীমঃ স পরুষং বচঃ

অন্ধস্য নৃপতেঃ পুত্রা ময়া পরিঘবাহুনা
নীতা লোকমমুং সর্বে নানাশস্ত্রাত্তজীবিতাঃ

ইমৌ তৌ পরিঘপ্রখ্যৌ ভুজৌ মম দুরাসদৌ
যয়োরন্তরমাসাদ্য ধার্তরাষ্ট্রাঃ ক্ষয়ং গতাঃ

তাবিমৌ চন্দনেনাক্তৌ বন্দনীয়ৌ চ মে ভুজৌ
যাভ্যাং দুর্যোধনো নীতঃ ক্ষয়ং সসুতবান্ধবঃ

এতাশ্চান্যাশ্চ বিবিধাঃ শল্যভূতা জনাধিপঃ
বৃকোদরস্য তা বাচঃ শ্রুত্বা নির্বেদমাগমৎ

সা চ বুদ্ধিমতী দেবী কালপর্যায়বেদিনী
গান্ধারী সর্বধর্মজ্ঞা তান্যলীকানি শুশ্রুবে

ততঃ পঞ্চদশে বর্ষে সমতীতে নরাধিপঃ
রাজা নির্বেদমাপেদে ভীমবাগ্বাণপীডিতঃ

নান্ববুধ্যত তদ্রাজা কুন্তীপুত্রো যুধিষ্ঠিরঃ
শ্বেতাশ্বো বাথ কুন্তী বা দ্রৌপদী বা যশস্বিনী

মাদ্রীপুত্রৌ চ ভীমস্য চিত্তজ্ঞাবন্বমোদতাম্
রাজ্ঞস্তু চিত্তং রক্ষন্তৌ নোচতুঃ কিংচিদপ্রিয়ম্

ততঃ সমানয়ামাস ধৃতরাষ্ট্রঃ সুহৃজ্জনম্
বাষ্পসংদিগ্ধমত্যর্থমিদমাহ বচো ভৃশম্