UtshovChapter 4
4.1
वैशंपायन उवाच
युधिष्ठिरस्य नृपतेर्दुर्योधनपितुस्तथा
नान्तरं ददृशू राजन्पुरुषाः प्रणयं प्रति
Vaishampayana uvacha
Yudhishthirasya nripaterduryodhanapitustatha
Nantaram dadrishu rajanpurushah pranayam prati
4.2
यदा तु कौरवो राजा पुत्रं सस्मार बालिशम्
तदा भीमं हृदा राजन्नपध्याति स पार्थिवः
Yada tu kauravo raja putram sasmara balisham
Tada bhimam hrida rajannapadhyati sa parthivah
4.3
तथैव भीमसेनोऽपि धृतराष्ट्रं जनाधिपम्
नामर्षयत राजेन्द्र सदैवातुष्टवद्धृदा
Tathaiva bhimasenopi dhritarashtram janadhipam
Namarshayata rajendra sadaivatushtavaddhrida
4.4
अप्रकाशान्यप्रियाणि चकारास्य वृकोदरः
आज्ञां प्रत्यहरच्चापि कृतकैः पुरुषैः सदा
Aprakashanyapriyani chakarasya vrikodarah
Agyam pratyaharachchapi kritakaih purushaih sada
4.5
अथ भीमः सुहृन्मध्ये बाहुशब्दं तथाकरोत्
संश्रवे धृतराष्ट्रस्य गान्धार्याश्चाप्यमर्षणः
Atha bhimah suhrinmadhye bahushabdam tathakarot
Sanshrave dhritarashtrasya gandharyashchapyamarshanah
4.6
स्मृत्वा दुर्योधनं शत्रुं कर्णदुःशासनावपि
प्रोवाचाथ सुसंरब्धो भीमः स परुषं वचः
Smritva duryodhanam shatrum karnaduhshasanavapi
Provachatha susanrabdho bhimah sa parusham vachah
4.7
अन्धस्य नृपतेः पुत्रा मया परिघबाहुना
नीता लोकममुं सर्वे नानाशस्त्रात्तजीविताः
Andhasya nripateh putra maya parighabahuna
Nita lokamamum sarve nanashastrattajivitah
4.8
इमौ तौ परिघप्रख्यौ भुजौ मम दुरासदौ
ययोरन्तरमासाद्य धार्तराष्ट्राः क्षयं गताः
Imau tau parighaprakhyau bhujau mama durasadau
Yayorantaramasadya dhartarashtrah kshayam gatah
4.9
ताविमौ चन्दनेनाक्तौ वन्दनीयौ च मे भुजौ
याभ्यां दुर्योधनो नीतः क्षयं ससुतबान्धवः
Tavimau chandanenaktau vandaniyau cha me bhujau
Yabhyam duryodhano nitah kshayam sasutabandhavah
4.10
एताश्चान्याश्च विविधाः शल्यभूता जनाधिपः
वृकोदरस्य ता वाचः श्रुत्वा निर्वेदमागमत्
Etashchanyashcha vividhah shalyabhuta janadhipah
Vrikodarasya ta vachah shrutva nirvedamagamat
4.11
सा च बुद्धिमती देवी कालपर्यायवेदिनी
गान्धारी सर्वधर्मज्ञा तान्यलीकानि शुश्रुवे
Sa cha buddhimati devi kalaparyayavedini
Gandhari sarvadharmagya tanyalikani shushruve
4.12
ततः पञ्चदशे वर्षे समतीते नराधिपः
राजा निर्वेदमापेदे भीमवाग्बाणपीडितः
Tatah panchadashe varshe samatite naradhipah
Raja nirvedamapede bhimavagbanapiditah
4.13
नान्वबुध्यत तद्राजा कुन्तीपुत्रो युधिष्ठिरः
श्वेताश्वो वाथ कुन्ती वा द्रौपदी वा यशस्विनी
Nanvabudhyata tadraja kuntiputro yudhishthirah
Shvetashvo vatha kunti va draupadi va yashasvini
4.14
माद्रीपुत्रौ च भीमस्य चित्तज्ञावन्वमोदताम्
राज्ञस्तु चित्तं रक्षन्तौ नोचतुः किंचिदप्रियम्
Madriputrau cha bhimasya chittagyavanvamodatam
Ragyastu chittam rakshantau nochatuh kinchidapriyam
4.15
ततः समानयामास धृतराष्ट्रः सुहृज्जनम्
बाष्पसंदिग्धमत्यर्थमिदमाह वचो भृशम्
Tatah samanayamasa dhritarashtrah suhrijjanam
Bashpasandigdhamatyarthamidamaha vacho bhrisham