অধ্যায় 3

3.1

বৈশংপায়ন উবাচ
স রাজা সুমহাতেজা বৃদ্ধঃ কুরুকুলোদ্বহঃ
নাপশ্যত তদা কিংচিদপ্রিয়ং পাণ্ডুনন্দনে

বর্তমানেষু সদ্বৃত্তিং পাণ্ডবেষু মহাত্মসু
প্রীতিমানভবদ্রাজা ধৃতরাষ্ট্রোঽম্বিকাসুতঃ

সৌবলেয়ী চ গান্ধারী পুত্রশোকমপাস্য তম্
সদৈব প্রীতিমত্যাসীত্তনয়েষু নিজেষ্বিব

প্রিয়াণ্যেব তু কৌরব্যো নাপ্রিয়াণি কুরূদ্বহ
বৈচিত্রবীর্যে নৃপতৌ সমাচরতি নিত্যদা

যদ্যদ্ব্রূতে চ কিংচিত্স ধৃতরাষ্ট্রো নরাধিপঃ
গুরু বা লঘু বা কার্যং গান্ধারী চ যশস্বিনী

তত্স রাজা মহারাজ পাণ্ডবানাং ধুরংধরঃ
পূজয়িত্বা বচস্তত্তদকার্ষীত্পরবীরহা

তেন তস্যাভবত্প্রীতো বৃত্তেন স নরাধিপঃ
অন্বতপ্যচ্চ সংস্মৃত্য পুত্রং মন্দমচেতসম্

সদা চ প্রাতরুত্থায় কৃতজপ্যঃ শুচির্নৃপঃ
আশাস্তে পাণ্ডুপুত্রাণাং সমরেষ্বপরাজয়ম্

ব্রাহ্মণান্বাচয়িত্বা চ হুত্বা চৈব হুতাশনম্
আয়ুষ্যং পাণ্ডুপুত্রাণামাশাস্তে স নরাধিপঃ

ন তাং প্রীতিং পরামাপ পুত্রেভ্যঃ স মহীপতিঃ
যাং প্রীতিং পাণ্ডুপুত্রেভ্যঃ সমবাপ তদা নৃপঃ

ব্রাহ্মণানাং চ বৃদ্ধানাং ক্ষত্রিয়াণাং চ ভারত
তথা বিট্শূদ্রসংঘানামভবত্সুপ্রিয়স্তদা

যচ্চ কিংচিত্পুরা পাপং ধৃতরাষ্ট্রসুতৈঃ কৃতম্
অকৃত্বা হৃদি তদ্রাজা তং নৃপং সোঽন্ববর্তত

যশ্চ কশ্চিন্নরঃ কিংচিদপ্রিয়ং চাম্বিকাসুতে
কুরুতে দ্বেষ্যতামেতি স কৌন্তেয়স্য ধীমতঃ

ন রাজ্ঞো ধৃতরাষ্ট্রস্য ন চ দুর্যোধনস্য বৈ
উবাচ দুষ্কৃতং কিংচিদ্যুধিষ্ঠিরভয়ান্নরঃ

ধৃত্যা তুষ্টো নরেন্দ্রস্য গান্ধারী বিদুরস্তথা
শৌচেন চাজাতশত্রোর্ন তু ভীমস্য শত্রুহন্

অন্ববর্তত ভীমোঽপি নিষ্টনন্ধর্মজং নৃপম্
ধৃতরাষ্ট্রং চ সংপ্রেক্ষ্য সদা ভবতি দুর্মনাঃ

রাজানমনুবর্তন্তং ধর্মপুত্রং মহামতিম্
অন্ববর্তত কৌরব্যো হৃদয়েন পরাঙ্মুখঃ