অধ্যায় 2

2.1

বৈশংপায়ন উবাচ
এবং সংপূজিতো রাজা পাণ্ডবৈরম্বিকাসুতঃ
বিজহার যথাপূর্বমৃষিভিঃ পর্যুপাসিতঃ

ব্রহ্মদেয়াগ্রহারাংশ্চ প্রদদৌ স কুরূদ্বহঃ
তচ্চ কুন্তীসুতো রাজা সর্বমেবান্বমোদত

আনৃশংস্যপরো রাজা প্রীয়মাণো যুধিষ্ঠিরঃ
উবাচ স তদা ভ্রাতৄনমাত্যাংশ্চ মহীপতিঃ

ময়া চৈব ভবদ্ভিশ্চ মান্য এষ নরাধিপঃ
নিদেশে ধৃতরাষ্ট্রস্য যঃ স্থাস্যতি স মে সুহৃৎ
বিপরীতশ্চ মে শত্রুর্নিরস্যশ্চ ভবেন্নরঃ

পরিদৃষ্টেষু চাহঃসু পুত্রাণাং শ্রাদ্ধকর্মণি
দদাতু রাজা সর্বেষাং যাবদস্য চিকীর্ষিতম্

ততঃ স রাজা কৌরব্যো ধৃতরাষ্ট্রো মহামনাঃ
ব্রাহ্মণেভ্যো মহার্হেভ্যো দদৌ বিত্তান্যনেকশঃ

ধর্মরাজশ্চ ভীমশ্চ সব্যসাচী যমাবপি
তত্সর্বমন্ববর্তন্ত ধৃতরাষ্ট্রব্যপেক্ষয়া

কথং নু রাজা বৃদ্ধঃ সন্পুত্রশোকসমাহতঃ
শোকমস্মত্কৃতং প্রাপ্য ন ম্রিয়েতেতি চিন্ত্যতে

যাবদ্ধি কুরুমুখ্যস্য জীবত্পুত্রস্য বৈ সুখম্
বভূব তদবাপ্নোতু ভোগাংশ্চেতি ব্যবস্থিতাঃ

ততস্তে সহিতাঃ সর্বে ভ্রাতরঃ পঞ্চ পাণ্ডবাঃ
তথাশীলাঃ সমাতস্থুর্ধৃতরাষ্ট্রস্য শাসনে

ধৃতরাষ্ট্রশ্চ তান্বীরান্বিনীতান্বিনয়ে স্থিতান্
শিষ্যবৃত্তৌ স্থিতান্নিত্যং গুরুবত্পর্যপশ্যত

গান্ধারী চৈব পুত্রাণাং বিবিধৈঃ শ্রাদ্ধকর্মভিঃ
আনৃণ্যমগমত্কামান্বিপ্রেভ্যঃ প্রতিপাদ্য বৈ

এবং ধর্মভৃতাং শ্রেষ্ঠো ধর্মরাজো যুধিষ্ঠিরঃ
ভ্রাতৃভিঃ সহিতো ধীমান্পূজয়ামাস তং নৃপম্