UtshovChapter 2
2.1
वैशंपायन उवाच
एवं संपूजितो राजा पाण्डवैरम्बिकासुतः
विजहार यथापूर्वमृषिभिः पर्युपासितः
Vaishampayana uvacha
Evam sampujito raja pandavairambikasutah
Vijahara yathapurvamrishibhih paryupasitah
2.2
ब्रह्मदेयाग्रहारांश्च प्रददौ स कुरूद्वहः
तच्च कुन्तीसुतो राजा सर्वमेवान्वमोदत
Brahmadeyagraharanshcha pradadau sa kurudvahah
Tachcha kuntisuto raja sarvamevanvamodata
2.3
आनृशंस्यपरो राजा प्रीयमाणो युधिष्ठिरः
उवाच स तदा भ्रातॄनमात्यांश्च महीपतिः
Anrishansyaparo raja priyamano yudhishthirah
Uvacha sa tada bhratrinamatyanshcha mahipatih
2.4
मया चैव भवद्भिश्च मान्य एष नराधिपः
निदेशे धृतराष्ट्रस्य यः स्थास्यति स मे सुहृत्
विपरीतश्च मे शत्रुर्निरस्यश्च भवेन्नरः
Maya chaiva bhavadbhishcha manya esha naradhipah
Nideshe dhritarashtrasya yah sthasyati sa me suhrit
Viparitashcha me shatrurnirasyashcha bhavennarah
2.5
परिदृष्टेषु चाहःसु पुत्राणां श्राद्धकर्मणि
ददातु राजा सर्वेषां यावदस्य चिकीर्षितम्
Paridrishteshu chahahsu putranam shraddhakarmani
Dadatu raja sarvesham yavadasya chikirshitam
2.6
ततः स राजा कौरव्यो धृतराष्ट्रो महामनाः
ब्राह्मणेभ्यो महार्हेभ्यो ददौ वित्तान्यनेकशः
Tatah sa raja kauravyo dhritarashtro mahamanah
Brahmanebhyo maharhebhyo dadau vittanyanekashah
2.7
धर्मराजश्च भीमश्च सव्यसाची यमावपि
तत्सर्वमन्ववर्तन्त धृतराष्ट्रव्यपेक्षया
Dharmarajashcha bhimashcha savyasachi yamavapi
Tatsarvamanvavartanta dhritarashtravyapekshaya
2.8
कथं नु राजा वृद्धः सन्पुत्रशोकसमाहतः
शोकमस्मत्कृतं प्राप्य न म्रियेतेति चिन्त्यते
Katham nu raja vriddhah sanputrashokasamahatah
Shokamasmatkritam prapya na mriyeteti chintyate
2.9
यावद्धि कुरुमुख्यस्य जीवत्पुत्रस्य वै सुखम्
बभूव तदवाप्नोतु भोगांश्चेति व्यवस्थिताः
Yavaddhi kurumukhyasya jivatputrasya vai sukham
Babhuva tadavapnotu bhoganshcheti vyavasthitah
2.10
ततस्ते सहिताः सर्वे भ्रातरः पञ्च पाण्डवाः
तथाशीलाः समातस्थुर्धृतराष्ट्रस्य शासने
Tataste sahitah sarve bhratarah pancha pandavah
Tathashilah samatasthurdhritarashtrasya shasane
2.11
धृतराष्ट्रश्च तान्वीरान्विनीतान्विनये स्थितान्
शिष्यवृत्तौ स्थितान्नित्यं गुरुवत्पर्यपश्यत
Dhritarashtrashcha tanviranvinitanvinaye sthitan
Shishyavrittau sthitannityam guruvatparyapashyata
2.12
गान्धारी चैव पुत्राणां विविधैः श्राद्धकर्मभिः
आनृण्यमगमत्कामान्विप्रेभ्यः प्रतिपाद्य वै
Gandhari chaiva putranam vividhaih shraddhakarmabhih
Anrinyamagamatkamanviprebhyah pratipadya vai
2.13
एवं धर्मभृतां श्रेष्ठो धर्मराजो युधिष्ठिरः
भ्रातृभिः सहितो धीमान्पूजयामास तं नृपम्
Evam dharmabhritam shreshtho dharmarajo yudhishthirah
Bhratribhih sahito dhimanpujayamasa tam nripam