অধ্যায় 1

1.1

জনমেজয় উবাচ
প্রাপ্য রাজ্যং মহাভাগাঃ পাণ্ডবা মে পিতামহাঃ
কথমাসন্মহারাজে ধৃতরাষ্ট্রে মহাত্মনি

1.2

স হি রাজা হতামাত্যো হতপুত্রো নিরাশ্রয়ঃ
কথমাসীদ্ধতৈশ্বর্যো গান্ধারী চ যশস্বিনী

1.3

কিয়ন্তং চৈব কালং তে পিতরো মম পূর্বকাঃ
স্থিতা রাজ্যে মহাত্মানস্তন্মে ব্যাখ্যাতুমর্হসি

1.4

বৈশংপায়ন উবাচ
প্রাপ্য রাজ্যং মহাত্মানঃ পাণ্ডবা হতশত্রবঃ
ধৃতরাষ্ট্রং পুরস্কৃত্য পৃথিবীং পর্যপালয়ন্

1.5

ধৃতরাষ্ট্রমুপাতিষ্ঠদ্বিদুরঃ সংজয়স্তথা
যুয়ুত্সুশ্চাপি মেধাবী বৈশ্যাপুত্রঃ স কৌরবঃ

1.6

পাণ্ডবাঃ সর্বকার্যাণি সংপৃচ্ছন্তি স্ম তং নৃপম্
চক্রুস্তেনাভ্যনুজ্ঞাতা বর্ষাণি দশ পঞ্চ চ

1.7

সদা হি গত্বা তে বীরাঃ পর্যুপাসন্ত তং নৃপম্
পাদাভিবন্দনং কৃত্বা ধর্মরাজমতে স্থিতাঃ
তে মূর্ধ্নি সমুপাঘ্রাতাঃ সর্বকার্যাণি চক্রিরে

1.8

কুন্তিভোজসুতা চৈব গান্ধারীমন্ববর্তত
দ্রৌপদী চ সুভদ্রা চ যাশ্চান্যাঃ পাণ্ডবস্ত্রিয়ঃ
সমাং বৃত্তিমবর্তন্ত তয়োঃ শ্বশ্র্বোর্যথাবিধি

1.9

শয়নানি মহার্হাণি বাসাংস্যাভরণানি চ
রাজার্হাণি চ সর্বাণি ভক্ষ্যভোজ্যান্যনেকশঃ
যুধিষ্ঠিরো মহারাজ ধৃতরাষ্ট্রেঽভ্যুপাহরৎ

1.10

তথৈব কুন্তী গান্ধার্যাং গুরুবৃত্তিমবর্তত
বিদুরঃ সংজয়শ্চৈব যুয়ুত্সুশ্চৈব কৌরবঃ
উপাসতে স্ম তং বৃদ্ধং হতপুত্রং জনাধিপম্

1.11

স্যালো দ্রোণস্য যশ্চৈকো দয়িতো ব্রাহ্মণো মহান্
স চ তস্মিন্মহেষ্বাসঃ কৃপঃ সমভবত্তদা

1.12

ব্যাসশ্চ ভগবান্নিত্যং বাসং চক্রে নৃপেণ হ
কথাঃ কুর্বন্পুরাণর্ষির্দেবর্ষিনৃপরক্ষসাম্

1.13

ধর্ময়ুক্তানি কার্যাণি ব্যবহারান্বিতানি চ
ধৃতরাষ্ট্রাভ্যনুজ্ঞাতো বিদুরস্তান্যকারয়ৎ

1.14

সামন্তেভ্যঃ প্রিয়াণ্যস্য কার্যাণি সুগুরূণ্যপি
প্রাপ্যন্তেঽর্থৈঃ সুলঘুভিঃ প্রভাবাদ্বিদুরস্য বৈ

1.15

অকরোদ্বন্ধমোক্ষাংশ্চ বধ্যানাং মোক্ষণং তথা
ন চ ধর্মাত্মজো রাজা কদাচিত্কিংচিদব্রবীৎ

1.16

বিহারয়াত্রাসু পুনঃ কুরুরাজো যুধিষ্ঠিরঃ
সর্বান্কামান্মহাতেজাঃ প্রদদাবম্বিকাসুতে

1.17

আরালিকাঃ সূপকারা রাগখাণ্ডবিকাস্তথা
উপাতিষ্ঠন্ত রাজানং ধৃতরাষ্ট্রং যথা পুরা

1.18

বাসাংসি চ মহার্হাণি মাল্যানি বিবিধানি চ
উপাজহ্রুর্যথান্যায়ং ধৃতরাষ্ট্রস্য পাণ্ডবাঃ

1.19

মৈরেয়ং মধু মাংসানি পানকানি লঘূনি চ
চিত্রান্ভক্ষ্যবিকারাংশ্চ চক্রুরস্য যথা পুরা

1.20

যে চাপি পৃথিবীপালাঃ সমাজগ্মুঃ সমন্ততঃ
উপাতিষ্ঠন্ত তে সর্বে কৌরবেন্দ্রং যথা পুরা

1.21

কুন্তী চ দ্রৌপদী চৈব সাত্বতী চৈব ভামিনী
উলূপী নাগকন্যা চ দেবী চিত্রাঙ্গদা তথা

1.22

ধৃষ্টকেতোশ্চ ভগিনী জরাসংধস্য চাত্মজা
কিংকরাঃ স্মোপতিষ্ঠন্তি সর্বাঃ সুবলজাং তথা

1.23

যথা পুত্রবিয়ুক্তোঽয়ং ন কিংচিদ্দুঃখমাপ্নুয়াৎ
ইতি রাজান্বশাদ্ভ্রাতৄন্নিত্যমেব যুধিষ্ঠিরঃ

1.24

এবং তে ধর্মরাজস্য শ্রুত্বা বচনমর্থবৎ
সবিশেষমবর্তন্ত ভীমমেকং বিনা তদা

1.25

ন হি তত্তস্য বীরস্য হৃদয়াদপসর্পতি
ধৃতরাষ্ট্রস্য দুর্বুদ্ধের্যদ্বৃত্তং দ্যূতকারিতম্

Contains text from DharmicData, made available under the Open Database License (ODbL). Simple meanings are written by AI and can contain mistakes.