Utshovঅধ্যায় 45
45.1
বৈশংপায়ন উবাচ
দ্বিবর্ষোপনিবৃত্তেষু পাণ্ডবেষু যদৃচ্ছয়া
দেবর্ষির্নারদো রাজন্নাজগাম যুধিষ্ঠিরম্
45.2
তমভ্যর্চ্য মহাবাহুঃ কুরুরাজো যুধিষ্ঠিরঃ
আসীনং পরিবিশ্বস্তং প্রোবাচ বদতাং বরঃ
45.3
চিরস্য খলু পশ্যামি ভগবন্তমুপস্থিতম্
কচ্চিত্তে কুশলং বিপ্র শুভং বা প্রত্যুপস্থিতম্
45.4
কে দেশাঃ পরিদৃষ্টাস্তে কিং চ কার্যং করোমি তে
তদ্ব্রূহি দ্বিজমুখ্য ত্বমস্মাকং চ প্রিয়োঽতিথিঃ
45.5
নারদ উবাচ
চিরদৃষ্টোঽসি মে রাজন্নাগতোঽস্মি তপোবনাৎ
পরিদৃষ্টানি তীর্থানি গঙ্গা চৈব ময়া নৃপ
45.6
যুধিষ্ঠির উবাচ
বদন্তি পুরুষা মেঽদ্য গঙ্গাতীরনিবাসিনঃ
ধৃতরাষ্ট্রং মহাত্মানমাস্থিতং পরমং তপঃ
45.7
অপি দৃষ্টস্ত্বয়া তত্র কুশলী স কুরূদ্বহঃ
গান্ধারী চ পৃথা চৈব সূতপুত্রশ্চ সংজয়ঃ
45.8
কথং চ বর্ততে চাদ্য পিতা মম স পার্থিবঃ
শ্রোতুমিচ্ছামি ভগবন্যদি দৃষ্টস্ত্বয়া নৃপঃ
45.9
নারদ উবাচ
স্থিরীভূয় মহারাজ শৃণু সর্বং যথাতথম্
যথা শ্রুতং চ দৃষ্টং চ ময়া তস্মিংস্তপোবনে
45.10
বনবাসনিবৃত্তেষু ভবত্সু কুরুনন্দন
কুরুক্ষেত্রাত্পিতা তুভ্যং গঙ্গাদ্বারং যয়ৌ নৃপ
45.11
গান্ধার্যা সহিতো ধীমান্বধ্বা কুন্ত্যা সমন্বিতঃ
সংজয়েন চ সূতেন সাগ্নিহোত্রঃ সয়াজকঃ
45.12
আতস্থে স তপস্তীব্রং পিতা তব তপোধনঃ
বীটাং মুখে সমাধায় বায়ুভক্ষোঽভবন্মুনিঃ
45.13
বনে স মুনিভিঃ সর্বৈঃ পূজ্যমানো মহাতপাঃ
ত্বগস্থিমাত্রশেষঃ স ষণ্মাসানভবন্নৃপঃ
45.14
গান্ধারী তু জলাহারা কুন্তী মাসোপবাসিনী
সংজয়ঃ ষষ্ঠভক্তেন বর্তয়ামাস ভারত
45.15
অগ্নীংস্তু যাজকাস্তত্র জুহুবুর্বিধিবত্প্রভো
দৃশ্যতোঽদৃশ্যতশ্চৈব বনে তস্মিন্নৃপস্য হ
45.16
অনিকেতোঽথ রাজা স বভূব বনগোচরঃ
তে চাপি সহিতে দেব্যৌ সংজয়শ্চ তমন্বয়ুঃ
45.17
সংজয়ো নৃপতের্নেতা সমেষু বিষমেষু চ
গান্ধার্যাস্তু পৃথা রাজংশ্চক্ষুরাসীদনিন্দিতা
45.18
ততঃ কদাচিদ্গঙ্গায়াঃ কচ্ছে স নৃপসত্তমঃ
গঙ্গায়ামাপ্লুতো ধীমানাশ্রমাভিমুখোঽভবৎ
45.19
অথ বায়ুঃ সমুদ্ভূতো দাবাগ্নিরভবন্মহান্
দদাহ তদ্বনং সর্বং পরিগৃহ্য সমন্ততঃ
45.20
দহ্যত্সু মৃগয়ূথেষু দ্বিজিহ্বেষু সমন্ততঃ
বরাহাণাং চ যূথেষু সংশ্রয়ত্সু জলাশয়ান্
45.21
সমাবিদ্ধে বনে তস্মিন্প্রাপ্তে ব্যসন উত্তমে
নিরাহারতয়া রাজা মন্দপ্রাণবিচেষ্টিতঃ
অসমর্থোঽপসরণে সুকৃশৌ মাতরৌ চ তে
45.22
ততঃ স নৃপতির্দৃষ্ট্বা বহ্নিমায়ান্তমন্তিকাৎ
ইদমাহ ততঃ সূতং সংজয়ং পৃথিবীপতে
45.23
গচ্ছ সংজয় যত্রাগ্নির্ন ত্বাং দহতি কর্হিচিৎ
বয়মত্রাগ্নিনা যুক্তা গমিষ্যামঃ পরাং গতিম্
45.24
তমুবাচ কিলোদ্বিগ্নঃ সংজয়ো বদতাং বরঃ
রাজন্মৃত্যুরনিষ্টোঽয়ং ভবিতা তে বৃথাগ্নিনা
45.25
ন চোপায়ং প্রপশ্যামি মোক্ষণে জাতবেদসঃ
যদত্রানন্তরং কার্যং তদ্ভবান্বক্তুমর্হতি
45.26
ইত্যুক্তঃ সংজয়েনেদং পুনরাহ স পার্থিবঃ
নৈষ মৃত্যুরনিষ্টো নো নিঃসৃতানাং গৃহাত্স্বয়ম্
45.27
জলমগ্নিস্তথা বায়ুরথ বাপি বিকর্শনম্
তাপসানাং প্রশস্যন্তে গচ্ছ সংজয় মাচিরম্
45.28
ইত্যুক্ত্বা সংজয়ং রাজা সমাধায় মনস্তদা
প্রাঙ্মুখঃ সহ গান্ধার্যা কুন্ত্যা চোপাবিশত্তদা
45.29
সংজয়স্তং তথা দৃষ্ট্বা প্রদক্ষিণমথাকরোৎ
উবাচ চৈনং মেধাবী যুঙ্ক্ষ্বাত্মানমিতি প্রভো
45.30
ঋষিপুত্রো মনীষী স রাজা চক্রেঽস্য তদ্বচঃ
সংনিরুধ্যেন্দ্রিয়গ্রামমাসীত্কাষ্ঠোপমস্তদা
45.31
গান্ধারী চ মহাভাগা জননী চ পৃথা তব
দাবাগ্নিনা সমায়ুক্তে স চ রাজা পিতা তব
45.32
সংজয়স্তু মহামাত্রস্তস্মাদ্দাবাদমুচ্যত
গঙ্গাকূলে ময়া দৃষ্টস্তাপসৈঃ পরিবারিতঃ
45.33
স তানামন্ত্র্য তেজস্বী নিবেদ্যৈতচ্চ সর্বশঃ
প্রয়য়ৌ সংজয়ঃ সূতো হিমবন্তং মহীধরম্
45.34
এবং স নিধনং প্রাপ্তঃ কুরুরাজো মহামনাঃ
গান্ধারী চ পৃথা চৈব জনন্যৌ তে নরাধিপ
45.35
যদৃচ্ছয়ানুব্রজতা ময়া রাজ্ঞঃ কলেবরম্
তয়োশ্চ দেব্যোরুভয়োর্দৃষ্টানি ভরতর্ষভ
45.36
ততস্তপোবনে তস্মিন্সমাজগ্মুস্তপোধনাঃ
শ্রুত্বা রাজ্ঞস্তথা নিষ্ঠাং ন ত্বশোচন্গতিং চ তে
45.37
তত্রাশ্রৌষমহং সর্বমেতত্পুরুষসত্তম
যথা চ নৃপতির্দগ্ধো দেব্যৌ তে চেতি পাণ্ডব
45.38
ন শোচিতব্যং রাজেন্দ্র স্বন্তঃ স পৃথিবীপতিঃ
প্রাপ্তবানগ্নিসংয়োগং গান্ধারী জননী চ তে
45.39
বৈশংপায়ন উবাচ
এতচ্ছ্রুত্বা তু সর্বেষাং পাণ্ডবানাং মহাত্মনাম্
নির্যাণং ধৃতরাষ্ট্রস্য শোকঃ সমভবন্মহান্
45.40
অন্তঃপুরাণাং চ তদা মহানার্তস্বরোঽভবৎ
পৌরাণাং চ মহারাজ শ্রুত্বা রাজ্ঞস্তদা গতিম্
45.41
অহো ধিগিতি রাজা তু বিক্রুশ্য ভৃশদুঃখিতঃ
ঊর্ধ্ববাহুঃ স্মরন্মাতুঃ প্ররুরোদ যুধিষ্ঠিরঃ
ভীমসেনপুরোগাশ্চ ভ্রাতরঃ সর্ব এব তে
45.42
অন্তঃপুরেষু চ তদা সুমহান্রুদিতস্বনঃ
প্রাদুরাসীন্মহারাজ পৃথাং শ্রুত্বা তথাগতাম্
45.43
তং চ বৃদ্ধং তথা দগ্ধং হতপুত্রং নরাধিপম্
অন্বশোচন্ত তে সর্বে গান্ধারীং চ তপস্বিনীম্
45.44
তস্মিন্নুপরতে শব্দে মুহূর্তাদিব ভারত
নিগৃহ্য বাষ্পং ধৈর্যেণ ধর্মরাজোঽব্রবীদিদম্