Utshovঅধ্যায় 44
44.1
জনমেজয় উবাচ
দৃষ্ট্বা পুত্রাংস্তথা পৌত্রান্সানুবন্ধাঞ্জনাধিপঃ
ধৃতরাষ্ট্রঃ কিমকরোদ্রাজা চৈব যুধিষ্ঠিরঃ
44.2
বৈশংপায়ন উবাচ
তদ্দৃষ্ট্বা মহদাশ্চর্যং পুত্রাণাং দর্শনং পুনঃ
বীতশোকঃ স রাজর্ষিঃ পুনরাশ্রমমাগমৎ
44.3
ইতরস্তু জনঃ সর্বস্তে চৈব পরমর্ষয়ঃ
প্রতিজগ্মুর্যথাকামং ধৃতরাষ্ট্রাভ্যনুজ্ঞয়া
44.4
পাণ্ডবাস্তু মহাত্মানো লঘুভূয়িষ্ঠসৈনিকাঃ
অনুজগ্মুর্মহাত্মানং সদারং তং মহীপতিম্
44.5
তমাশ্রমগতং ধীমান্ব্রহ্মর্ষির্লোকপূজিতঃ
মুনিঃ সত্যবতীপুত্রো ধৃতরাষ্ট্রমভাষত
44.6
ধৃতরাষ্ট্র মহাবাহো শৃণু কৌরবনন্দন
শ্রুতং তে জ্ঞানবৃদ্ধানামৃষীণাং পুণ্যকর্মণাম্
44.7
ঋদ্ধাভিজনবৃদ্ধানাং বেদবেদাঙ্গবেদিনাম্
ধর্মজ্ঞানাং পুরাণানাং বদতাং বিবিধাঃ কথাঃ
44.8
মা স্ম শোকে মনঃ কার্ষীর্দিষ্টে ন ব্যথতে বুধঃ
শ্রুতং দেবরহস্যং তে নারদাদ্দেবদর্শনাৎ
44.9
গতাস্তে ক্ষত্রধর্মেণ শস্ত্রপূতাং গতিং শুভাম্
যথা দৃষ্টাস্ত্বয়া পুত্রা যথাকামবিহারিণঃ
44.10
যুধিষ্ঠিরস্ত্বয়ং ধীমান্ভবন্তমনুরুধ্যতে
সহিতো ভ্রাতৃভিঃ সর্বৈঃ সদারঃ সসুহৃজ্জনঃ
44.11
বিসর্জয়ৈনং যাত্বেষ স্বরাজ্যমনুশাসতাম্
মাসঃ সমধিকো হ্যেষামতীতো বসতাং বনে
44.12
এতদ্ধি নিত্যং যত্নেন পদং রক্ষ্যং পরংতপ
বহুপ্রত্যর্থিকং হ্যেতদ্রাজ্যং নাম নরাধিপ
44.13
ইত্যুক্তঃ কৌরবো রাজা ব্যাসেনামিতবুদ্ধিনা
যুধিষ্ঠিরমথাহূয় বাগ্মী বচনমব্রবীৎ
44.14
অজাতশত্রো ভদ্রং তে শৃণু মে ভ্রাতৃভিঃ সহ
ত্বত্প্রসাদান্মহীপাল শোকো নাস্মান্প্রবাধতে
44.15
রমে চাহং ত্বয়া পুত্র পুরেব গজসাহ্বয়ে
নাথেনানুগতো বিদ্বন্প্রিয়েষু পরিবর্তিনা
44.16
প্রাপ্তং পুত্রফলং ত্বত্তঃ প্রীতির্মে বিপুলা ত্বয়ি
ন মে মন্যুর্মহাবাহো গম্যতাং পুত্র মা চিরম্
44.17
ভবন্তং চেহ সংপ্রেক্ষ্য তপো মে পরিহীয়তে
তপোয়ুক্তং শরীরং চ ত্বাং দৃষ্ট্বা ধারিতং পুনঃ
44.18
মাতরৌ তে তথৈবেমে শীর্ণপর্ণকৃতাশনে
মম তুল্যব্রতে পুত্র নচিরং বর্তয়িষ্যতঃ
44.19
দুর্যোধনপ্রভৃতয়ো দৃষ্টা লোকান্তরং গতাঃ
ব্যাসস্য তপসো বীর্যাদ্ভবতশ্চ সমাগমাৎ
44.20
প্রয়োজনং চিরং বৃত্তং জীবিতস্য চ মেঽনঘ
উগ্রং তপঃ সমাস্থাস্যে ত্বমনুজ্ঞাতুমর্হসি
44.21
ত্বয্যদ্য পিণ্ডঃ কীর্তিশ্চ কুলং চেদং প্রতিষ্ঠিতম্
শ্বো বাদ্য বা মহাবাহো গম্যতাং পুত্র মা চিরম্
44.22
রাজনীতিঃ সুবহুশঃ শ্রুতা তে ভরতর্ষভ
সংদেষ্টব্যং ন পশ্যামি কৃতমেতাবতা বিভো
44.23
ইত্যুক্তবচনং তাত নৃপো রাজানমব্রবীৎ
ন মামর্হসি ধর্মজ্ঞ পরিত্যক্তুমনাগসম্
44.24
কামং গচ্ছন্তু মে সর্বে ভ্রাতরোঽনুচরাস্তথা
ভবন্তমহমন্বিষ্যে মাতরৌ চ যতব্রতে
44.25
তমুবাচাথ গান্ধারী মৈবং পুত্র শৃণুষ্ব মে
ত্বয্যধীনং কুরুকুলং পিণ্ডশ্চ শ্বশুরস্য মে
44.26
গম্যতাং পুত্র পর্যাপ্তমেতাবত্পূজিতা বয়ম্
রাজা যদাহ তত্কার্যং ত্বয়া পুত্র পিতুর্বচঃ
44.27
ইত্যুক্তঃ স তু গান্ধার্যা কুন্তীমিদমুবাচ হ
স্নেহবাষ্পাকুলে নেত্রে প্রমৃজ্য রুদতীং বচঃ
44.28
বিসর্জয়তি মাং রাজা গান্ধারী চ যশস্বিনী
ভবত্যাং বদ্ধচিত্তস্তু কথং যাস্যামি দুঃখিতঃ
44.29
ন চোত্সহে তপোবিঘ্নং কর্তুং তে ধর্মচারিণি
তপসো হি পরং নাস্তি তপসা বিন্দতে মহৎ
44.30
মমাপি ন তথা রাজ্ঞি রাজ্যে বুদ্ধির্যথা পুরা
তপস্যেবানুরক্তং মে মনঃ সর্বাত্মনা তথা
44.31
শূন্যেয়ং চ মহী সর্বা ন মে প্রীতিকরী শুভে
বান্ধবা নঃ পরিক্ষীণা বলং নো ন যথা পুরা
44.32
পাঞ্চালাঃ সুভৃশং ক্ষীণাঃ কন্যামাত্রাবশেষিতাঃ
ন তেষাং কুলকর্তারং কংচিত্পশ্যাম্যহং শুভে
44.33
সর্বে হি ভস্মসান্নীতা দ্রোণেনৈকেন সংয়ুগে
অবশেষাস্তু নিহতা দ্রোণপুত্রেণ বৈ নিশি
44.34
চেদয়শ্চৈব মত্স্যাশ্চ দৃষ্টপূর্বাস্তথৈব নঃ
কেবলং বৃষ্ণিচক্রং তু বাসুদেবপরিগ্রহাৎ
যং দৃষ্ট্বা স্থাতুমিচ্ছামি ধর্মার্থং নান্যহেতুকম্
44.35
শিবেন পশ্য নঃ সর্বান্দুর্লভং দর্শনং তব
ভবিষ্যত্যম্ব রাজা হি তীব্রমারপ্স্যতে তপঃ
44.36
এতচ্ছ্রুত্বা মহাবাহুঃ সহদেবো যুধাং পতিঃ
যুধিষ্ঠিরমুবাচেদং বাষ্পব্যাকুললোচনঃ
44.37
নোত্সহেঽহং পরিত্যক্তুং মাতরং পার্থিবর্ষভ
প্রতিয়াতু ভবান্ক্ষিপ্রং তপস্তপ্স্যাম্যহং বনে
44.38
ইহৈব শোষয়িষ্যামি তপসাহং কলেবরম্
পাদশুশ্রূষণে যুক্তো রাজ্ঞো মাত্রোস্তথানয়োঃ
44.39
তমুবাচ ততঃ কুন্তী পরিষ্বজ্য মহাভুজম্
গম্যতাং পুত্র মৈবং ত্বং বোচঃ কুরু বচো মম
44.40
আগমা বঃ শিবাঃ সন্তু স্বস্থা ভবত পুত্রকাঃ
উপরোধো ভবেদেবমস্মাকং তপসঃ কৃতে
44.41
ত্বত্স্নেহপাশবদ্ধা চ হীয়েয়ং তপসঃ পরাৎ
তস্মাত্পুত্রক গচ্ছ ত্বং শিষ্টমল্পং হি নঃ প্রভো
44.42
এবং সংস্তম্ভিতং বাক্যৈঃ কুন্ত্যা বহুবিধৈর্মনঃ
সহদেবস্য রাজেন্দ্র রাজ্ঞশ্চৈব বিশেষতঃ
44.43
তে মাত্রা সমনুজ্ঞাতা রাজ্ঞা চ কুরুপুংগবাঃ
অভিবাদ্য কুরুশ্রেষ্ঠমামন্ত্রয়িতুমারভন্
44.44
রাজন্প্রতিগমিষ্যামঃ শিবেন প্রতিনন্দিতাঃ
অনুজ্ঞাতাস্ত্বয়া রাজন্গমিষ্যামো বিকল্মষাঃ
44.45
এবমুক্তঃ স রাজর্ষির্ধর্মরাজ্ঞা মহাত্মনা
অনুজজ্ঞে জয়াশীর্ভিরভিনন্দ্য যুধিষ্ঠিরম্
44.46
ভীমং চ বলিনাং শ্রেষ্ঠং সান্ত্বয়ামাস পার্থিবঃ
স চাস্য সম্যঙ্মেধাবী প্রত্যপদ্যত বীর্যবান্
44.47
অর্জুনং চ সমাশ্লিষ্য যমৌ চ পুরুষর্ষভৌ
অনুজজ্ঞে স কৌরব্যঃ পরিষ্বজ্যাভিনন্দ্য চ
44.48
গান্ধার্যা চাভ্যনুজ্ঞাতাঃ কৃতপাদাভিবন্দনাঃ
জনন্যা সমুপাঘ্রাতাঃ পরিষ্বক্তাশ্চ তে নৃপম্
চক্রুঃ প্রদক্ষিণং সর্বে বত্সা ইব নিবারণে
44.49
পুনঃ পুনর্নিরীক্ষন্তঃ প্রজগ্মুস্তে প্রদক্ষিণম্
তথৈব দ্রৌপদী সাধ্বী সর্বাঃ কৌরবয়োষিতঃ
44.50
ন্যায়তঃ শ্বশুরে বৃত্তিং প্রয়ুজ্য প্রয়য়ুস্ততঃ
শ্বশ্রূভ্যাং সমনুজ্ঞাতাঃ পরিষ্বজ্যাভিনন্দিতাঃ
সংদিষ্টাশ্চেতিকর্তব্যং প্রয়য়ুর্ভর্তৃভিঃ সহ
44.51
ততঃ প্রজজ্ঞে নিনদঃ সূতানাং যুজ্যতামিতি
উষ্ট্রাণাং ক্রোশতাং চৈব হয়ানাং হেষতামপি
44.52
ততো যুধিষ্ঠিরো রাজা সদারঃ সহসৈনিকঃ
নগরং হাস্তিনপুরং পুনরায়াত্সবান্ধবঃ