অধ্যায় 43

43.1

বৈশংপায়ন উবাচ
অদৃষ্ট্বা তু নৃপঃ পুত্রান্দর্শনং প্রতিলব্ধবান্
ঋষিপ্রসাদাত্পুত্রাণাং স্বরূপাণাং কুরূদ্বহ

স রাজা রাজধর্মাংশ্চ ব্রহ্মোপনিষদং তথা
অবাপ্তবান্নরশ্রেষ্ঠো বুদ্ধিনিশ্চয়মেব চ

বিদুরশ্চ মহাপ্রাজ্ঞো যয়ৌ সিদ্ধিং তপোবলাৎ
ধৃতরাষ্ট্রঃ সমাসাদ্য ব্যাসং চাপি তপস্বিনম্

জনমেজয় উবাচ
মমাপি বরদো ব্যাসো দর্শয়েত্পিতরং যদি
তদ্রূপবেষবয়সং শ্রদ্দধ্যাং সর্বমেব তে

প্রিয়ং মে স্যাত্কৃতার্থশ্চ স্যামহং কৃতনিশ্চয়ঃ
প্রসাদাদৃষিপুত্রস্য মম কামঃ সমৃধ্যতাম্

সূত উবাচ
ইত্যুক্তবচনে তস্মিন্নৃপে ব্যাসঃ প্রতাপবান্
প্রসাদমকরোদ্ধীমানানয়চ্চ পরিক্ষিতম্

ততস্তদ্রূপবয়সমাগতং নৃপতিং দিবঃ
শ্রীমন্তং পিতরং রাজা দদর্শ জনমেজয়ঃ

শমীকং চ মহাত্মানং পুত্রং তং চাস্য শৃঙ্গিণম্
অমাত্যা যে বভূবুশ্চ রাজ্ঞস্তাংশ্চ দদর্শ হ

ততঃ সোঽবভৃথে রাজা মুদিতো জনমেজয়ঃ
পিতরং স্নাপয়ামাস স্বয়ং সস্নৌ চ পার্থিবঃ

স্নাত্বা চ ভরতশ্রেষ্ঠঃ সোঽঽস্তীকমিদমব্রবীৎ
যায়াবরকুলোত্পন্নং জরত্কারুসুতং তদা

আস্তীক বিবিধাশ্চর্যো যজ্ঞোঽয়মিতি মে মতিঃ
যদদ্যায়ং পিতা প্রাপ্তো মম শোকপ্রণাশনঃ

আস্তীক উবাচ
ঋষির্দ্বৈপায়নো যত্র পুরাণস্তপসো নিধিঃ
যজ্ঞে কুরুকুলশ্রেষ্ঠ তস্য লোকাবুভৌ জিতৌ

শ্রুতং বিচিত্রমাখ্যানং ত্বয়া পাণ্ডবনন্দন
সর্পাশ্চ ভস্মসান্নীতা গতাশ্চ পদবীং পিতুঃ

কথংচিত্তক্ষকো মুক্তঃ সত্যত্বাত্তব পার্থিব
ঋষয়ঃ পূজিতাঃ সর্বে গতিং দৃষ্ট্বা মহাত্মনঃ

প্রাপ্তঃ সুবিপুলো ধর্মঃ শ্রুত্বা পাপবিনাশনম্
বিমুক্তো হৃদয়গ্রন্থিরুদারজনদর্শনাৎ

যে চ পক্ষধরা ধর্মে সদ্বৃত্তরুচয়শ্চ যে
যান্দৃষ্ট্বা হীয়তে পাপং তেভ্যঃ কার্যা নমস্ক্রিয়াঃ

সূত উবাচ
এতচ্ছ্রুত্বা দ্বিজশ্রেষ্ঠাত্স রাজা জনমেজয়ঃ
পূজয়ামাস তমৃষিমনুমান্য পুনঃ পুনঃ

পপ্রচ্ছ তমৃষিং চাপি বৈশংপায়নমচ্যুতম্
কথাবশেষং ধর্মজ্ঞো বনবাসস্য সত্তম