Utshovঅধ্যায় 42
42.1
সূত উবাচ
এতচ্ছ্রুত্বা নৃপো বিদ্বান্হৃষ্টোঽভূজ্জনমেজয়ঃ
পিতামহানাং সর্বেষাং গমনাগমনং তদা
42.2
অব্রবীচ্চ মুদা যুক্তঃ পুনরাগমনং প্রতি
কথং নু ত্যক্তদেহানাং পুনস্তদ্রূপদর্শনম্
42.3
ইত্যুক্তঃ স দ্বিজশ্রেষ্ঠো ব্যাসশিষ্যঃ প্রতাপবান্
প্রোবাচ বদতাং শ্রেষ্ঠস্তং নৃপং জনমেজয়ম্
42.4
অবিপ্রণাশঃ সর্বেষাং কর্মণামিতি নিশ্চয়ঃ
কর্মজানি শরীরাণি তথৈবাকৃতয়ো নৃপ
42.5
মহাভূতানি নিত্যানি ভূতাধিপতিসংশ্রয়াৎ
তেষাং চ নিত্যসংবাসো ন বিনাশো বিয়ুজ্যতাম্
42.6
অনাশায় কৃতং কর্ম তস্য চেষ্টঃ ফলাগমঃ
আত্মা চৈভিঃ সমায়ুক্তঃ সুখদুঃখমুপাশ্নুতে
42.7
অবিনাশী তথা নিত্যং ক্ষেত্রজ্ঞ ইতি নিশ্চয়ঃ
ভূতানামাত্মভাবো যো ধ্রুবোঽসৌ সংবিজানতাম্
42.8
যাবন্ন ক্ষীয়তে কর্ম তাবদস্য স্বরূপতা
সংক্ষীণকর্মা পুরুষো রূপান্যত্বং নিয়চ্ছতি
42.9
নানাভাবাস্তথৈকত্বং শরীরং প্রাপ্য সংহতাঃ
ভবন্তি তে তথা নিত্যাঃ পৃথগ্ভাবং বিজানতাম্
42.10
অশ্বমেধে শ্রুতিশ্চেয়মশ্বসংজ্ঞপনং প্রতি
লোকান্তরগতা নিত্যং প্রাণা নিত্যা হি বাজিনঃ
42.11
অহং হিতং বদাম্যেতত্প্রিয়ং চেত্তব পার্থিব
দেবয়ানা হি পন্থানঃ শ্রুতাস্তে যজ্ঞসংস্তরে
42.12
সুকৃতো যত্র তে যজ্ঞস্তত্র দেবা হিতাস্তব
যদা সমন্বিতা দেবাঃ পশূনাং গমনেশ্বরাঃ
গতিমন্তশ্চ তেনেষ্ট্বা নান্যে নিত্যা ভবন্তি তে
42.13
নিত্যেঽস্মিন্পঞ্চকে বর্গে নিত্যে চাত্মনি যো নরঃ
অস্য নানাসমায়োগং যঃ পশ্যতি বৃথামতিঃ
বিয়োগে শোচতেঽত্যর্থং স বাল ইতি মে মতিঃ
42.14
বিয়োগে দোষদর্শী যঃ সংয়োগমিহ বর্জয়েৎ
অসঙ্গে সংগমো নাস্তি দুঃখং ভুবি বিয়োগজম্
42.15
পরাপরজ্ঞস্তু নরো নাভিমানাদুদীরিতঃ
অপরজ্ঞঃ পরাং বুদ্ধিং স্পৃষ্ট্বা মোহাদ্বিমুচ্যতে
42.16
অদর্শনাদাপতিতঃ পুনশ্চাদর্শনং গতঃ
নাহং তং বেদ্মি নাসৌ মাং ন চ মেঽস্তি বিরাগতা
42.17
যেন যেন শরীরেণ করোত্যয়মনীশ্বরঃ
তেন তেন শরীরেণ তদবশ্যমুপাশ্নুতে
মানসং মনসাপ্নোতি শারীরং চ শরীরবান্