অধ্যায় 46

46.1

যুধিষ্ঠির উবাচ
তথা মহাত্মনস্তস্য তপস্যুগ্রে চ বর্ততঃ
অনাথস্যেব নিধনং তিষ্ঠত্স্বস্মাসু বন্ধুষু

দুর্বিজ্ঞেয়া হি গতয়ঃ পুরুষাণাং মতা মম
যত্র বৈচিত্রবীর্যোঽসৌ দগ্ধ এবং দবাগ্নিনা

যস্য পুত্রশতং শ্রীমদভবদ্বাহুশালিনঃ
নাগায়ুতবলো রাজা স দগ্ধো হি দবাগ্নিনা

যং পুরা পর্যবীজন্ত তালবৃন্তৈর্বরস্ত্রিয়ঃ
তং গৃধ্রাঃ পর্যবীজন্ত দাবাগ্নিপরিকালিতম্

সূতমাগধসংঘৈশ্চ শয়ানো যঃ প্রবোধ্যতে
ধরণ্যাং স নৃপঃ শেতে পাপস্য মম কর্মভিঃ

ন তু শোচামি গান্ধারীং হতপুত্রাং যশস্বিনীম্
পতিলোকমনুপ্রাপ্তাং তথা ভর্তৃব্রতে স্থিতাম্

পৃথামেব তু শোচামি যা পুত্রৈশ্বর্যমৃদ্ধিমৎ
উত্সৃজ্য সুমহদ্দীপ্তং বনবাসমরোচয়ৎ

ধিগ্রাজ্যমিদমস্মাকং ধিগ্বলং ধিক্পরাক্রমম্
ক্ষত্রধর্মং চ ধিগ্যস্মান্মৃতা জীবামহে বয়ম্

সুসূক্ষ্মা কিল কালস্য গতির্দ্বিজবরোত্তম
যত্সমুত্সৃজ্য রাজ্যং সা বনবাসমরোচয়ৎ

যুধিষ্ঠিরস্য জননী ভীমস্য বিজয়স্য চ
অনাথবত্কথং দগ্ধা ইতি মুহ্যামি চিন্তয়ন্

বৃথা সংতোষিতো বহ্নিঃ খাণ্ডবে সব্যসাচিনা
উপকারমজানন্স কৃতঘ্ন ইতি মে মতিঃ

যত্রাদহত্স ভগবান্মাতরং সব্যসাচিনঃ
কৃত্বা যো ব্রাহ্মণচ্ছদ্ম ভিক্ষার্থী সমুপাগতঃ
ধিগগ্নিং ধিক্চ পার্থস্য বিশ্রুতাং সত্যসংধতাম্

ইদং কষ্টতরং চান্যদ্ভগবন্প্রতিভাতি মে
বৃথাগ্নিনা সমায়োগো যদভূত্পৃথিবীপতেঃ

তথা তপস্বিনস্তস্য রাজর্ষেঃ কৌরবস্য হ
কথমেবংবিধো মৃত্যুঃ প্রশাস্য পৃথিবীমিমাম্

তিষ্ঠত্সু মন্ত্রপূতেষু তস্যাগ্নিষু মহাবনে
বৃথাগ্নিনা সমায়ুক্তো নিষ্ঠাং প্রাপ্তঃ পিতা মম

মন্যে পৃথা বেপমানা কৃশা ধমনিসংততা
হা তাত ধর্মরাজেতি সমাক্রন্দন্মহাভয়ে

ভীম পর্যাপ্নুহি ভয়াদিতি চৈবাভিবাশতী
সমন্ততঃ পরিক্ষিপ্তা মাতা মেঽভূদ্দবাগ্নিনা

সহদেবঃ প্রিয়স্তস্যাঃ পুত্রেভ্যোঽধিক এব তু
ন চৈনাং মোক্ষয়ামাস বীরো মাদ্রবতীসুতঃ

তচ্ছ্রুত্বা রুরুদুঃ সর্বে সমালিঙ্গ্য পরস্পরম্
পাণ্ডবাঃ পঞ্চ দুঃখার্তা ভূতানীব যুগক্ষয়ে

তেষাং তু পুরুষেন্দ্রাণাং রুদতাং রুদিতস্বনঃ
প্রাসাদাভোগসংরুদ্ধো অন্বরৌত্সীত্স রোদসী