Utshovঅধ্যায় 47
47.1
নারদ উবাচ
নাসৌ বৃথাগ্নিনা দগ্ধো যথা তত্র শ্রুতং ময়া
বৈচিত্রবীর্যো নৃপতিস্তত্তে বক্ষ্যামি ভারত
47.2
বনং প্রবিশতা তেন বায়ুভক্ষেণ ধীমতা
অগ্নয়ঃ কারয়িত্বেষ্টিমুত্সৃষ্টা ইতি নঃ শ্রুতম্
47.3
যাজকাস্তু ততস্তস্য তানগ্নীন্নির্জনে বনে
সমুত্সৃজ্য যথাকামং জগ্মুর্ভরতসত্তম
47.4
স বিবৃদ্ধস্তদা বহ্নির্বনে তস্মিন্নভূত্কিল
তেন তদ্বনমাদীপ্তমিতি মে তাপসাব্রুবন্
47.5
স রাজা জাহ্নবীকচ্ছে যথা তে কথিতং ময়া
তেনাগ্নিনা সমায়ুক্তঃ স্বেনৈব ভরতর্ষভ
47.6
এবমাবেদয়ামাসুর্মুনয়স্তে মমানঘ
যে তে ভাগীরথীতীরে ময়া দৃষ্টা যুধিষ্ঠির
47.7
এবং স্বেনাগ্নিনা রাজা সমায়ুক্তো মহীপতে
মা শোচিথাস্ত্বং নৃপতিং গতঃ স পরমাং গতিম্
47.8
গুরুশুশ্রূষয়া চৈব জননী তব পাণ্ডব
প্রাপ্তা সুমহতীং সিদ্ধিমিতি মে নাত্র সংশয়ঃ
47.9
কর্তুমর্হসি কৌরব্য তেষাং ত্বমুদকক্রিয়াম্
ভ্রাতৃভিঃ সহিতঃ সর্বৈরেতদত্র বিধীয়তাম্
47.10
বৈশংপায়ন উবাচ
ততঃ স পৃথিবীপালঃ পাণ্ডবানাং ধুরংধরঃ
নির্যয়ৌ সহ সোদর্যৈঃ সদারো ভরতর্ষভ
47.11
পৌরজানপদাশ্চৈব রাজভক্তিপুরস্কৃতাঃ
গঙ্গাং প্রজগ্মুরভিতো বাসসৈকেন সংবৃতাঃ
47.12
ততোঽবগাহ্য সলিলং সর্বে তে কুরুপুংগবাঃ
যুয়ুত্সুমগ্রতঃ কৃত্বা দদুস্তোয়ং মহাত্মনে
47.13
গান্ধার্যাশ্চ পৃথায়াশ্চ বিধিবন্নামগোত্রতঃ
শৌচং নিবর্তয়ন্তস্তে তত্রোষুর্নগরাদ্বহিঃ
47.14
প্রেষয়ামাস স নরান্বিধিজ্ঞানাপ্তকারিণঃ
গঙ্গাদ্বারং কুরুশ্রেষ্ঠো যত্র দগ্ধোঽভবন্নৃপঃ
47.15
তত্রৈব তেষাং কুল্যানি গঙ্গাদ্বারেঽন্বশাত্তদা
কর্তব্যানীতি পুরুষান্দত্তদেয়ান্মহীপতিঃ
47.16
দ্বাদশেঽহনি তেভ্যঃ স কৃতশৌচো নরাধিপঃ
দদৌ শ্রাদ্ধানি বিধিবদ্দক্ষিণাবন্তি পাণ্ডবঃ
47.17
ধৃতরাষ্ট্রং সমুদ্দিশ্য দদৌ স পৃথিবীপতিঃ
সুবর্ণং রজতং গাশ্চ শয্যাশ্চ সুমহাধনাঃ
47.18
গান্ধার্যাশ্চৈব তেজস্বী পৃথায়াশ্চ পৃথক্পৃথক্
সংকীর্ত্য নামনী রাজা দদৌ দানমনুত্তমম্
47.19
যো যদিচ্ছতি যাবচ্চ তাবত্স লভতে দ্বিজঃ
শয়নং ভোজনং যানং মণিরত্নমথো ধনম্
47.20
যানমাচ্ছাদনং ভোগান্দাসীশ্চ পরিচারিকাঃ
দদৌ রাজা সমুদ্দিশ্য তয়োর্মাত্রোর্মহীপতিঃ
47.21
ততঃ স পৃথিবীপালো দত্ত্বা শ্রাদ্ধান্যনেকশঃ
প্রবিবেশ পুনর্ধীমান্নগরং বারণাহ্বয়ম্
47.22
তে চাপি রাজবচনাত্পুরুষা যে গতাভবন্
সংকল্প্য তেষাং কুল্যানি পুনঃ প্রত্যাগমংস্ততঃ
47.23
মাল্যৈর্গন্ধৈশ্চ বিবিধৈঃ পূজয়িত্বা যথাবিধি
কুল্যানি তেষাং সংয়োজ্য তদাচখ্যুর্মহীপতেঃ
47.24
সমাশ্বাস্য চ রাজানং ধর্মাত্মানং যুধিষ্ঠিরম্
নারদোঽপ্যগমদ্রাজন্পরমর্ষির্যথেপ্সিতম্
47.25
এবং বর্ষাণ্যতীতানি ধৃতরাষ্ট্রস্য ধীমতঃ
বনবাসে তদা ত্রীণি নগরে দশ পঞ্চ চ
47.26
হতপুত্রস্য সংগ্রামে দানানি দদতঃ সদা
জ্ঞাতিসংবন্ধিমিত্রাণাং ভ্রাতৄণাং স্বজনস্য চ
47.27
যুধিষ্ঠিরস্তু নৃপতির্নাতিপ্রীতমনাস্তদা
ধারয়ামাস তদ্রাজ্যং নিহতজ্ঞাতিবান্ধবঃ