Utshovঅধ্যায় 6
6.1
ব্যাস উবাচ
অত্রাপ্যুদাহরন্তীমমিতিহাসং পুরাতনম্
বৃহস্পতেশ্চ সংবাদং মরুত্তস্য চ ভারত
6.2
দেবরাজস্য সময়ং কৃতমাঙ্গিরসেন হ
শ্রুত্বা মরুত্তো নৃপতির্মন্যুমাহারয়ত্তদা
6.3
সংকল্প্য মনসা যজ্ঞং করংধমসুতাত্মজঃ
বৃহস্পতিমুপাগম্য বাগ্মী বচনমব্রবীৎ
6.4
ভগবন্যন্ময়া পূর্বমভিগম্য তপোধন
কৃতোঽভিসংধির্যজ্ঞায় ভবতো বচনাদ্গুরো
6.5
তমহং যষ্টুমিচ্ছামি সংভারাঃ সংভৃতাশ্চ মে
যাজ্যোঽস্মি ভবতঃ সাধো তত্প্রাপ্নুহি বিধত্স্ব চ
6.6
বৃহস্পতিরুবাচ
ন কাময়ে যাজয়িতুং ত্বামহং পৃথিবীপতে
বৃতোঽস্মি দেবরাজেন প্রতিজ্ঞাতং চ তস্য মে
6.7
মরুত্ত উবাচ
পিত্র্যমস্মি তব ক্ষেত্রং বহু মন্যে চ তে ভৃশম্
ন চাস্ম্যয়াজ্যতাং প্রাপ্তো ভজমানং ভজস্ব মাম্
6.8
বৃহস্পতিরুবাচ
অমর্ত্যং যাজয়িত্বাহং যাজয়িষ্যে ন মানুষম্
মরুত্ত গচ্ছ বা মা বা নিবৃত্তোঽস্ম্যদ্য যাজনাৎ
6.9
ন ত্বাং যাজয়িতাস্ম্যদ্য বৃণু ত্বং যমিহেচ্ছসি
উপাধ্যায়ং মহাবাহো যস্তে যজ্ঞং করিষ্যতি
6.10
ব্যাস উবাচ
এবমুক্তস্তু নৃপতির্মরুত্তো ব্রীডিতোঽভবৎ
প্রত্যাগচ্ছচ্চ সংবিগ্নো দদর্শ পথি নারদম্
6.11
দেবর্ষিণা সমাগম্য নারদেন স পার্থিবঃ
বিধিবত্প্রাঞ্জলিস্তস্থাবথৈনং নারদোঽব্রবীৎ
6.12
রাজর্ষে নাতিহৃষ্টোঽসি কচ্চিত্ক্ষেমং তবানঘ
ক্ব গতোঽসি কুতো বেদমপ্রীতিস্থানমাগতম্
6.13
শ্রোতব্যং চেন্ময়া রাজন্ব্রূহি মে পার্থিবর্ষভ
ব্যপনেষ্যামি তে মন্যুং সর্বয়ত্নৈর্নরাধিপ
6.14
এবমুক্তো মরুত্তস্তু নারদেন মহর্ষিণা
বিপ্রলম্ভমুপাধ্যায়াত্সর্বমেব ন্যবেদয়ৎ
6.15
গতোঽস্ম্যঙ্গিরসঃ পুত্রং দেবাচার্যং বৃহস্পতিম্
যজ্ঞার্থমৃত্বিজং দ্রষ্টুং স চ মাং নাভ্যনন্দত
6.16
প্রত্যাখ্যাতশ্চ তেনাহং জীবিতুং নাদ্য কাময়ে
পরিত্যক্তশ্চ গুরুণা দূষিতশ্চাস্মি নারদ
6.17
এবমুক্তস্তু রাজ্ঞা স নারদঃ প্রত্যুবাচ হ
আবিক্ষিতং মহারাজ বাচা সংজীবয়ন্নিব
6.18
রাজন্নঙ্গিরসঃ পুত্রঃ সংবর্তো নাম ধার্মিকঃ
চঙ্ক্রমীতি দিশঃ সর্বা দিগ্বাসা মোহয়ন্প্রজাঃ
6.19
তং গচ্ছ যদি যাজ্যং ত্বাং ন বাঞ্ছতি বৃহস্পতিঃ
প্রসন্নস্ত্বাং মহারাজ সংবর্তো যাজয়িষ্যতি
6.20
মরুত্ত উবাচ
সংজীবিতোঽহং ভবতা বাক্যেনানেন নারদ
পশ্যেয়ং ক্ব নু সংবর্তং শংস মে বদতাং বর
6.21
কথং চ তস্মৈ বর্তেয়ং কথং মাং ন পরিত্যজেৎ
প্রত্যাখ্যাতশ্চ তেনাপি নাহং জীবিতুমুত্সহে
6.22
নারদ উবাচ
উন্মত্তবেষং বিভ্রত্স চঙ্ক্রমীতি যথাসুখম্
বারাণসীং তু নগরীমভীক্ষ্ণমুপসেবতে
6.23
তস্যা দ্বারং সমাসাদ্য ন্যসেথাঃ কুণপং ক্বচিৎ
তং দৃষ্ট্বা যো নিবর্তেত স সংবর্তো মহীপতে
6.24
তং পৃষ্ঠতোঽনুগচ্ছেথা যত্র গচ্ছেত্স বীর্যবান্
তমেকান্তে সমাসাদ্য প্রাঞ্জলিঃ শরণং ব্রজেঃ
6.25
পৃচ্ছেত্ত্বাং যদি কেনাহং তবাখ্যাত ইতি স্ম হ
ব্রূয়াস্ত্বং নারদেনেতি সংতপ্ত ইব শত্রুহন্
6.26
স চেত্ত্বামনুয়ুঞ্জীত মমাভিগমনেপ্সয়া
শংসেথা বহ্নিমারূঢং মামপি ত্বমশঙ্কয়া
6.27
ব্যাস উবাচ
স তথেতি প্রতিশ্রুত্য পূজয়িত্বা চ নারদম্
অভ্যনুজ্ঞায় রাজর্ষির্যয়ৌ বারাণসীং পুরীম্
6.28
তত্র গত্বা যথোক্তং স পুর্যা দ্বারে মহায়শাঃ
কুণপং স্থাপয়ামাস নারদস্য বচঃ স্মরন্
6.29
যৌগপদ্যেন বিপ্রশ্চ স পুরীদ্বারমাবিশৎ
ততঃ স কুণপং দৃষ্ট্বা সহসা স ন্যবর্তত
6.30
স তং নিবৃত্তমালক্ষ্য প্রাঞ্জলিঃ পৃষ্ঠতোঽন্বগাৎ
আবিক্ষিতো মহীপালঃ সংবর্তমুপশিক্ষিতুম্
6.31
স এনং বিজনে দৃষ্ট্বা পাংসুভিঃ কর্দমেন চ
শ্লেষ্মণা চাপি রাজানং ষ্ঠীবনৈশ্চ সমাকিরৎ
6.32
স তথা বাধ্যমানোঽপি সংবর্তেন মহীপতিঃ
অন্বগাদেব তমৃষিং প্রাঞ্জলিঃ সংপ্রসাদয়ন্
6.33
ততো নিবৃত্য সংবর্তঃ পরিশ্রান্ত উপাবিশৎ
শীতলচ্ছায়মাসাদ্য ন্যগ্রোধং বহুশাখিনম্