Utshovঅধ্যায় 7
7.1
সংবর্ত উবাচ
কথমস্মি ত্বয়া জ্ঞাতঃ কেন বা কথিতোঽস্মি তে
এতদাচক্ষ্ব মে তত্ত্বমিচ্ছসে চেত্প্রিয়ং মম
7.2
সত্যং তে ব্রুবতঃ সর্বে সংপত্স্যন্তে মনোরথাঃ
মিথ্যা তু ব্রুবতো মূর্ধা সপ্তধা তে ফলিষ্যতি
7.3
মরুত্ত উবাচ
নারদেন ভবান্মহ্যমাখ্যাতো হ্যটতা পথি
গুরুপুত্রো মমেতি ত্বং ততো মে প্রীতিরুত্তমা
7.4
সংবর্ত উবাচ
সত্যমেতদ্ভবানাহ স মাং জানাতি সত্রিণম্
কথয়স্বৈতদেকং মে ক্ব নু সংপ্রতি নারদঃ
7.5
মরুত্ত উবাচ
ভবন্তং কথয়িত্বা তু মম দেবর্ষিসত্তমঃ
ততো মামভ্যনুজ্ঞায় প্রবিষ্টো হব্যবাহনম্
7.6
ব্যাস উবাচ
শ্রুত্বা তু পার্থিবস্যৈতত্সংবর্তঃ পরয়া মুদা
এতাবদহমপ্যেনং কুর্যামিতি তদাব্রবীৎ
7.7
ততো মরুত্তমুন্মত্তো বাচা নির্ভর্ত্সয়ন্নিব
রূক্ষয়া ব্রাহ্মণো রাজন্পুনঃ পুনরথাব্রবীৎ
7.8
বাতপ্রধানেন ময়া স্বচিত্তবশবর্তিনা
এবং বিকৃতরূপেণ কথং যাজিতুমিচ্ছসি
7.9
ভ্রাতা মম সমর্থশ্চ বাসবেন চ সত্কৃতঃ
বর্ততে যাজনে চৈব তেন কর্মাণি কারয়
7.10
গৃহং স্বং চৈব যাজ্যাশ্চ সর্বা গৃহ্যাশ্চ দেবতাঃ
পূর্বজেন মমাক্ষিপ্তং শরীরং বর্জিতং ত্বিদম্
7.11
নাহং তেনাননুজ্ঞাতস্ত্বামাবিক্ষিত কর্হিচিৎ
যাজয়েয়ং কথংচিদ্বৈ স হি পূজ্যতমো মম
7.12
স ত্বং বৃহস্পতিং গচ্ছ তমনুজ্ঞাপ্য চাব্রজ
ততোঽহং যাজয়িষ্যে ত্বাং যদি যষ্টুমিহেচ্ছসি
7.13
মরুত্ত উবাচ
বৃহস্পতিং গতঃ পূর্বমহং সংবর্ত তচ্ছৃণু
ন মাং কাময়তে যাজ্যমসৌ বাসববারিতঃ
7.14
অমরং যাজ্যমাসাদ্য মামৃষে মা স্ম মানুষম্
যাজয়েথা মরুত্তং ত্বং মর্ত্যধর্মাণমাতুরম্
7.15
স্পর্ধতে চ ময়া বিপ্র সদা বৈ স হি পার্থিবঃ
এবমস্ত্বিতি চাপ্যুক্তো ভ্রাত্রা তে বলবৃত্রহা
7.16
স মামভিগতং প্রেম্ণা যাজ্যবন্ন বুভূষতি
দেবরাজমুপাশ্রিত্য তদ্বিদ্ধি মুনিপুংগব
7.17
সোঽহমিচ্ছামি ভবতা সর্বস্বেনাপি যাজিতুম্
কাময়ে সমতিক্রান্তুং বাসবং ত্বত্কৃতৈর্গুণৈঃ
7.18
ন হি মে বর্ততে বুদ্ধির্গন্তুং ব্রহ্মন্বৃহস্পতিম্
প্রত্যাখ্যাতো হি তেনাস্মি তথানপকৃতে সতি
7.19
সংবর্ত উবাচ
চিকীর্ষসি যথাকামং সর্বমেতত্ত্বয়ি ধ্রুবম্
যদি সর্বানভিপ্রায়ান্কর্তাসি মম পার্থিব
7.20
যাজ্যমানং ময়া হি ত্বাং বৃহস্পতিপুরংদরৌ
দ্বিষেতাং সমভিক্রুদ্ধাবেতদেকং সমর্থয়
7.21
স্থৈর্যমত্র কথং তে স্যাত্স ত্বং নিঃসংশয়ং কুরু
কুপিতস্ত্বাং ন হীদানীং ভস্ম কুর্যাং সবান্ধবম্
7.22
মরুত্ত উবাচ
যাবত্তপেত্সহস্রাংশুস্তিষ্ঠেরংশ্চাপি পর্বতাঃ
তাবল্লোকান্ন লভেয়ং ত্যজেয়ং সংগতং যদি
7.23
মা চাপি শুভবুদ্ধিত্বং লভেয়মিহ কর্হিচিৎ
সম্যগ্জ্ঞানে বৈষয়ে বা ত্যজেয়ং সংগতং যদি
7.24
সংবর্ত উবাচ
আবিক্ষিত শুভা বুদ্ধির্ধীয়তাং তব কর্মসু
যাজনং হি মমাপ্যেবং বর্ততে ত্বয়ি পার্থিব
7.25
সংবিধাস্যে চ তে রাজন্নক্ষয়ং দ্রব্যমুত্তমম্
যেন দেবান্সগন্ধর্বাঞ্শক্রং চাভিভবিষ্যসি
7.26
ন তু মে বর্ততে বুদ্ধির্ধনে যাজ্যেষু বা পুনঃ
বিপ্রিয়ং তু চিকীর্ষামি ভ্রাতুশ্চেন্দ্রস্য চোভয়োঃ
7.27
গময়িষ্যামি চেন্দ্রেণ সমতামপি তে ধ্রুবম্
প্রিয়ং চ তে করিষ্যামি সত্যমেতদ্ব্রবীমি তে