Utshovঅধ্যায় 8
8.1
সংবর্ত উবাচ
গিরের্হিমবতঃ পৃষ্ঠে মুঞ্জবান্নাম পর্বতঃ
তপ্যতে যত্র ভগবাংস্তপো নিত্যমুমাপতিঃ
8.2
বনস্পতীনাং মূলেষু টঙ্কেষু শিখরেষু চ
গুহাসু শৈলরাজস্য যথাকামং যথাসুখম্
8.3
উমাসহায়ো ভগবান্যত্র নিত্যং মহেশ্বরঃ
আস্তে শূলী মহাতেজা নানাভূতগণাবৃতঃ
8.4
তত্র রুদ্রাশ্চ সাধ্যাশ্চ বিশ্বেঽথ বসবস্তথা
যমশ্চ বরুণশ্চৈব কুবেরশ্চ সহানুগঃ
8.5
ভূতানি চ পিশাচাশ্চ নাসত্যাবশ্বিনাবপি
গন্ধর্বাপ্সরসশ্চৈব যক্ষা দেবর্ষয়স্তথা
8.6
আদিত্যা মরুতশ্চৈব যাতুধানাশ্চ সর্বশঃ
উপাসন্তে মহাত্মানং বহুরূপমুমাপতিম্
8.7
রমতে ভগবাংস্তত্র কুবেরানুচরৈঃ সহ
বিকৃতৈর্বিকৃতাকারৈঃ ক্রীডদ্ভিঃ পৃথিবীপতে
শ্রিয়া জ্বলন্দৃশ্যতে বৈ বালাদিত্যসমদ্যুতিঃ
8.8
ন রূপং দৃশ্যতে তস্য সংস্থানং বা কথংচন
নির্দেষ্টুং প্রাণিভিঃ কৈশ্চিত্প্রাকৃতৈর্মাংসলোচনৈঃ
8.9
নোষ্ণং ন শিশিরং তত্র ন বায়ুর্ন চ ভাস্করঃ
ন জরা ক্ষুত্পিপাসে বা ন মৃত্যুর্ন ভয়ং নৃপ
8.10
তস্য শৈলস্য পার্শ্বেষু সর্বেষু জয়তাং বর
ধাতবো জাতরূপস্য রশ্ময়ঃ সবিতুর্যথা
8.11
রক্ষ্যন্তে তে কুবেরস্য সহায়ৈরুদ্যতায়ুধৈঃ
চিকীর্ষদ্ভিঃ প্রিয়ং রাজন্কুবেরস্য মহাত্মনঃ
8.12
তস্মৈ ভগবতে কৃত্বা নমঃ শর্বায় বেধসে
রুদ্রায় শিতিকণ্ঠায় সুরূপায় সুবর্চসে
8.13
কপর্দিনে করালায় হর্যক্ষ্ণে বরদায় চ
ত্র্যক্ষ্ণে পূষ্ণো দন্তভিদে বামনায় শিবায় চ
8.14
যাম্যায়াব্যক্তকেশায় সদ্বৃত্তে শংকরায় চ
ক্ষেম্যায় হরিনেত্রায় স্থাণবে পুরুষায় চ
8.15
হরিকেশায় মুণ্ডায় কৃশায়োত্তারণায় চ
ভাস্করায় সুতীর্থায় দেবদেবায় রংহসে
8.16
উষ্ণীষিণে সুবক্ত্রায় সহস্রাক্ষায় মীঢুষে
গিরিশায় প্রশান্তায় যতয়ে চীরবাসসে
8.17
বিল্বদণ্ডায় সিদ্ধায় সর্বদণ্ডধরায় চ
মৃগব্যাধায় মহতে ধন্বিনেঽথ ভবায় চ
8.18
বরায় সৌম্যবক্ত্রায় পশুহস্তায় বর্ষিণে
হিরণ্যবাহবে রাজন্নুগ্রায় পতয়ে দিশাম্
8.19
পশূনাং পতয়ে চৈব ভূতানাং পতয়ে তথা
বৃষায় মাতৃভক্তায় সেনান্যে মধ্যমায় চ
8.20
স্রুবহস্তায় পতয়ে ধন্বিনে ভার্গবায় চ
অজায় কৃষ্ণনেত্রায় বিরূপাক্ষায় চৈব হ
8.21
তীক্ষ্ণদংষ্ট্রায় তীক্ষ্ণায় বৈশ্বানরমুখায় চ
মহাদ্যুতয়েঽনঙ্গায় সর্বাঙ্গায় প্রজাবতে
8.22
তথা শুক্রাধিপতয়ে পৃথবে কৃত্তিবাসসে
কপালমালিনে নিত্যং সুবর্ণমুকুটায় চ
8.23
মহাদেবায় কৃষ্ণায় ত্র্যম্বকায়ানঘায় চ
ক্রোধনায় নৃশংসায় মৃদবে বাহুশালিনে
8.24
দণ্ডিনে তপ্ততপসে তথৈব ক্রূরকর্মণে
সহস্রশিরসে চৈব সহস্রচরণায় চ
নমঃ স্বধাস্বরূপায় বহুরূপায় দংষ্ট্রিণে
8.25
পিনাকিনং মহাদেবং মহায়োগিনমব্যয়ম্
ত্রিশূলপাণিং বরদং ত্র্যম্বকং ভুবনেশ্বরম্
8.26
ত্রিপুরঘ্নং ত্রিনয়নং ত্রিলোকেশং মহৌজসম্
প্রভবং সর্বভূতানাং ধারণং ধরণীধরম্
8.27
ঈশানং শংকরং সর্বং শিবং বিশ্বেশ্বরং ভবম্
উমাপতিং পশুপতিং বিশ্বরূপং মহেশ্বরম্
8.28
বিরূপাক্ষং দশভুজং তিষ্যগোবৃষভধ্বজম্
উগ্রং স্থাণুং শিবং ঘোরং শর্বং গৌরীশমীশ্বরম্
8.29
শিতিকণ্ঠমজং শুক্রং পৃথুং পৃথুহরং হরম্
বিশ্বরূপং বিরূপাক্ষং বহুরূপমুমাপতিম্
8.30
প্রণম্য শিরসা দেবমনঙ্গাঙ্গহরং হরম্
শরণ্যং শরণং যাহি মহাদেবং চতুর্মুখম্
8.31
এবং কৃত্বা নমস্তস্মৈ মহাদেবায় রংহসে
মহাত্মনে ক্ষিতিপতে তত্সুবর্ণমবাপ্স্যসি
সুবর্ণমাহরিষ্যন্তস্তত্র গচ্ছন্তু তে নরাঃ
8.32
ব্যাস উবাচ
ইত্যুক্তঃ স বচস্তস্য চক্রে কারংধমাত্মজঃ
ততোঽতিমানুষং সর্বং চক্রে যজ্ঞস্য সংবিধিম্
সৌবর্ণানি চ ভাণ্ডানি সংচক্রুস্তত্র শিল্পিনঃ
8.33
বৃহস্পতিস্তু তাং শ্রুত্বা মরুত্তস্য মহীপতেঃ
সমৃদ্ধিমতি দেবেভ্যঃ সংতাপমকরোদ্ভৃশম্
8.34
স তপ্যমানো বৈবর্ণ্যং কৃশত্বং চাগমত্পরম্
ভবিষ্যতি হি মে শত্রুঃ সংবর্তো বসুমানিতি
8.35
তং শ্রুত্বা ভৃশসংতপ্তং দেবরাজো বৃহস্পতিম্
অভিগম্যামরবৃতঃ প্রোবাচেদং বচস্তদা