Utshovঅধ্যায় 9
9.1
ইন্দ্র উবাচ
কচ্চিত্সুখং স্বপিষি ত্বং বৃহস্পতে; কচ্চিন্মনোজ্ঞাঃ পরিচারকাস্তে
কচ্চিদ্দেবানাং সুখকামোঽসি বিপ্র; কচ্চিদ্দেবাস্ত্বাং পরিপালয়ন্তি
9.2
বৃহস্পতিরুবাচ
সুখং শয়েঽহং শয়নে মহেন্দ্র; তথা মনোজ্ঞাঃ পরিচারকা মে
তথা দেবানাং সুখকামোঽস্মি শক্র; দেবাশ্চ মাং সুভৃশং পালয়ন্তি
9.3
ইন্দ্র উবাচ
কুতো দুঃখং মানসং দেহজং বা; পাণ্ডুর্বিবর্ণশ্চ কুতস্ত্বমদ্য
আচক্ষ্ব মে তদ্দ্বিজ যাবদেতা;ন্নিহন্মি সর্বাংস্তব দুঃখকর্তৄন্
9.4
বৃহস্পতিরুবাচ
মরুত্তমাহুর্মঘবন্যক্ষ্যমাণং; মহায়জ্ঞেনোত্তমদক্ষিণেন
তং সংবর্তো যাজয়িতেতি মে শ্রুতং; তদিচ্ছামি ন স তং যাজয়েত
9.5
ইন্দ্র উবাচ
সর্বান্কামাননুজাতোঽসি বিপ্র; যস্ত্বং দেবানাং মন্ত্রয়সে পুরোধাঃ
উভৌ চ তে জন্মমৃত্যূ ব্যতীতৌ; কিং সংবর্তস্তব কর্তাদ্য বিপ্র
9.6
বৃহস্পতিরুবাচ
দেবৈঃ সহ ত্বমসুরান্সংপ্রণুদ্য; জিঘাংসসেঽদ্যাপ্যুত সানুবন্ধান্
যং যং সমৃদ্ধং পশ্যসি তত্র তত্র; দুঃখং সপত্নেষু সমৃদ্ধভাবঃ
9.7
অতোঽস্মি দেবেন্দ্র বিবর্ণরূপঃ; সপত্নো মে বর্ধতে তন্নিশম্য
সর্বোপায়ৈর্মঘবন্সংনিয়চ্ছ; সংবর্তং বা পার্থিবং বা মরুত্তম্
9.8
ইন্দ্র উবাচ
এহি গচ্ছ প্রহিতো জাতবেদো; বৃহস্পতিং পরিদাতুং মরুত্তে
অয়ং বৈ ত্বা যাজয়িতা বৃহস্পতি;স্তথামরং চৈব করিষ্যতীতি
9.9
অগ্নিরুবাচ
অয়ং গচ্ছামি তব শক্রাদ্য দূতো; বৃহস্পতিং পরিদাতুং মরুত্তে
বাচং সত্যাং পুরুহূতস্য কর্তুং; বৃহস্পতেশ্চাপচিতিং চিকীর্ষুঃ
9.10
ব্যাস উবাচ
ততঃ প্রায়াদ্ধূমকেতুর্মহাত্মা; বনস্পতীন্বীরুধশ্চাবমৃদ্নন্
কামাদ্ধিমান্তে পরিবর্তমানঃ; কাষ্ঠাতিগো মাতরিশ্বেব নর্দন্
9.11
মরুত্ত উবাচ
আশ্চর্যমদ্য পশ্যামি রূপিণং বহ্নিমাগতম্
আসনং সলিলং পাদ্যং গাং চোপানয় বৈ মুনে
9.12
অগ্নিরুবাচ
আসনং সলিলং পাদ্যং প্রতিনন্দামি তেঽনঘ
ইন্দ্রেণ তু সমাদিষ্টং বিদ্ধি মাং দূতমাগতম্
9.13
মরুত্ত উবাচ
কচ্চিচ্ছ্রীমান্দেবরাজঃ সুখী চ; কচ্চিচ্চাস্মান্প্রীয়তে ধূমকেতো
কচ্চিদ্দেবাশ্চাস্য বশে যথাব;ত্তদ্ব্রূহি ত্বং মম কার্ত্স্ন্যেন দেব
9.14
অগ্নিরুবাচ
শক্রো ভৃশং সুসুখী পার্থিবেন্দ্র; প্রীতিং চেচ্ছত্যজরাং বৈ ত্বয়া সঃ
দেবাশ্চ সর্বে বশগাস্তস্য রাজ;ন্সংদেশং ত্বং শৃণু মে দেবরাজ্ঞঃ
9.15
যদর্থং মাং প্রাহিণোত্ত্বত্সকাশং; বৃহস্পতিং পরিদাতুং মরুত্তে
অয়ং গুরুর্যাজয়িতা নৃপ ত্বাং; মর্ত্যং সন্তমমরং ত্বাং করোতু
9.16
মরুত্ত উবাচ
সংবর্তোঽয়ং যাজয়িতা দ্বিজো মে; বৃহস্পতেরঞ্জলিরেষ তস্য
নাসৌ দেবং যাজয়িত্বা মহেন্দ্রং; মর্ত্যং সন্তং যাজয়ন্নদ্য শোভেৎ
9.17
অগ্নিরুবাচ
যে বৈ লোকা দেবলোকে মহান্তঃ; সংপ্রাপ্স্যসে তান্দেবরাজপ্রসাদাৎ
ত্বাং চেদসৌ যাজয়েদ্বৈ বৃহস্পতি;র্নূনং স্বর্গং ত্বং জয়েঃ কীর্তিয়ুক্তঃ
9.18
তথা লোকা মানুষা যে চ দিব্যাঃ; প্রজাপতেশ্চাপি যে বৈ মহান্তঃ
তে তে জিতা দেবরাজ্যং চ কৃত্স্নং; বৃহস্পতিশ্চেদ্যাজয়েত্ত্বাং নরেন্দ্র
9.19
সংবর্ত উবাচ
মাস্মানেবং ত্বং পুনরাগাঃ কথংচি;দ্বৃহস্পতিং পরিদাতুং মরুত্তে
মা ত্বাং ধক্ষ্যে চক্ষুষা দারুণেন; সংক্রুদ্ধোঽহং পাবক তন্নিবোধ
9.20
ব্যাস উবাচ
ততো দেবানগমদ্ধূমকেতু;র্দাহাদ্ভীতো ব্যথিতোঽশ্বত্থপর্ণবৎ
তং বৈ দৃষ্ট্বা প্রাহ শক্রো মহাত্মা; বৃহস্পতেঃ সংনিধৌ হব্যবাহম্
9.21
যত্ত্বং গতঃ প্রহিতো জাতবেদো; বৃহস্পতিং পরিদাতুং মরুত্তে
তত্কিং প্রাহ স নৃপো যক্ষ্যমাণঃ; কচ্চিদ্বচঃ প্রতিগৃহ্ণাতি তচ্চ
9.22
অগ্নিরুবাচ
ন তে বাচং রোচয়তে মরুত্তো; বৃহস্পতেরঞ্জলিং প্রাহিণোত্সঃ
সংবর্তো মাং যাজয়িতেত্যভীক্ষ্ণং; পুনঃ পুনঃ স ময়া প্রোচ্যমানঃ
9.23
উবাচেদং মানুষা যে চ দিব্যাঃ; প্রজাপতের্যে চ লোকা মহান্তঃ
তাংশ্চেল্লভেয়ং সংবিদং তেন কৃত্বা; তথাপি নেচ্ছেয়মিতি প্রতীতঃ
9.24
ইন্দ্র উবাচ
পুনর্ভবান্পার্থিবং তং সমেত্য; বাক্যং মদীয়ং প্রাপয় স্বার্থয়ুক্তম্
পুনর্যদ্যুক্তো ন করিষ্যতে বচ;স্ততো বজ্রং সংপ্রহর্তাস্মি তস্মৈ
9.25
অগ্নিরুবাচ
গন্ধর্বরাড্যাত্বয়ং তত্র দূতো; বিভেম্যহং বাসব তত্র গন্তুম্
সংরব্ধো মামব্রবীত্তীক্ষ্ণরোষঃ; সংবর্তো বাক্যং চরিতব্রহ্মচর্যঃ
9.26
যদ্যাগচ্ছেঃ পুনরেবং কথংচি;দ্বৃহস্পতিং পরিদাতুং মরুত্তে
দহেয়ং ত্বাং চক্ষুষা দারুণেন; সংক্রুদ্ধ ইত্যেতদবৈহি শক্র
9.27
ইন্দ্র উবাচ
ত্বমেবান্যান্দহসে জাতবেদো; ন হি ত্বদন্যো বিদ্যতে ভস্মকর্তা
ত্বত্সংস্পর্শাত্সর্বলোকো বিভে;ত্যশ্রদ্ধেয়ং বদসে হব্যবাহ
9.28
অগ্নিরুবাচ
দিবং দেবেন্দ্র পৃথিবীং চৈব সর্বাং; সংবেষ্টয়েস্ত্বং স্ববলেনৈব শক্র
এবংবিধস্যেহ সতস্তবাসৌ; কথং বৃত্রস্ত্রিদিবং প্রাগ্জহার
9.29
ইন্দ্র উবাচ
ন চণ্ডিকা জঙ্গমা নো করেণু;র্ন বারিসোমং প্রপিবামি বহ্নে
ন দুর্বলে বৈ বিসৃজামি বজ্রং; কো মেঽসুখায় প্রহরেন্মনুষ্যঃ
9.30
প্রব্রাজয়েয়ং কালকেয়ান্পৃথিব্যা;মপাকর্ষং দানবানন্তরিক্ষাৎ
দিবঃ প্রহ্রাদমবসানমানয়ং; কো মেঽসুখায় প্রহরেত মর্ত্যঃ
9.31
অগ্নিরুবাচ
যত্র শর্যাতিং চ্যবনো যাজয়িষ্য;ন্সহাশ্বিভ্যাং সোমমগৃহ্ণদেকঃ
তং ত্বং ক্রুদ্ধঃ প্রত্যষেধীঃ পুরস্তা;চ্ছর্যাতিয়জ্ঞং স্মর তং মহেন্দ্র
9.32
বজ্রং গৃহীত্বা চ পুরংদর ত্বং; সংপ্রাহার্ষীশ্চ্যবনস্যাতিঘোরম্
স তে বিপ্রঃ সহ বজ্রেণ বাহু;মপাগৃহ্ণাত্তপসা জাতমন্যুঃ
9.33
ততো রোষাত্সর্বতো ঘোররূপং; সপত্নং তে জনয়ামাস ভূয়ঃ
মদং নামাসুরং বিশ্বরূপং; যং ত্বং দৃষ্ট্বা চক্ষুষী সংন্যমীলঃ
9.34
হনুরেকা জগতীস্থা তথৈকা; দিবং গতা মহতো দানবস্য
সহস্রং দন্তানাং শতয়োজনানাং; সুতীক্ষ্ণানাং ঘোররূপং বভূব
9.35
বৃত্তাঃ স্থূলা রজতস্তম্ভবর্ণা; দংষ্ট্রাশ্চতস্রো দ্বে শতে যোজনানাম্
স ত্বাং দন্তান্বিদশন্নভ্যধাব;জ্জিঘাংসয়া শূলমুদ্যম্য ঘোরম্
9.36
অপশ্যস্ত্বং তং তদা ঘোররূপং; সর্বে ত্বন্যে দদৃশুর্দর্শনীয়ম্
যস্মাদ্ভীতঃ প্রাঞ্জলিস্ত্বং মহর্ষি;মাগচ্ছেথাঃ শরণং দানবঘ্ন
9.37
ক্ষত্রাদেবং ব্রহ্মবলং গরীয়ো; ন ব্রহ্মতঃ কিংচিদন্যদ্গরীয়ঃ
সোঽহং জানন্ব্রহ্মতেজো যথাব;ন্ন সংবর্তং গন্তুমিচ্ছামি শক্র