Utshovঅধ্যায় 10
10.1
ইন্দ্র উবাচ
এবমেতদ্ব্রহ্মবলং গরীয়ো; ন ব্রহ্মতঃ কিংচিদন্যদ্গরীয়ঃ
আবিক্ষিতস্য তু বলং ন মৃষ্যে; বজ্রমস্মৈ প্রহরিষ্যামি ঘোরম্
10.2
ধৃতরাষ্ট্র প্রহিতো গচ্ছ মরুত্তং; সংবর্তেন সহিতং তং বদস্ব
বৃহস্পতিং ত্বমুপশিক্ষস্ব রাজ;ন্বজ্রং বা তে প্রহরিষ্যামি ঘোরম্
10.3
ব্যাস উবাচ
ততো গত্বা ধৃতরাষ্ট্রো নরেন্দ্রং; প্রোবাচেদং বচনং বাসবস্য
গন্ধর্বং মাং ধৃতরাষ্ট্রং নিবোধ; ত্বামাগতং বক্তুকামং নরেন্দ্র
10.4
ঐন্দ্রং বাক্যং শৃণু মে রাজসিংহ; যত্প্রাহ লোকাধিপতির্মহাত্মা
বৃহস্পতিং যাজকং ত্বং বৃণীষ্ব; বজ্রং বা তে প্রহরিষ্যামি ঘোরম্
বচশ্চেদেতন্ন করিষ্যসে মে; প্রাহৈতদেতাবদচিন্ত্যকর্মা
10.5
মরুত্ত উবাচ
ত্বং চৈবৈতদ্বেত্থ পুরংদরশ্চ; বিশ্বেদেবা বসবশ্চাশ্বিনৌ চ
মিত্রদ্রোহে নিষ্কৃতির্বৈ যথৈব; নাস্তীতি লোকেষু সদৈব বাদঃ
10.6
বৃহস্পতির্যাজয়িতা মহেন্দ্রং; দেবশ্রেষ্ঠং বজ্রভৃতাং বরিষ্ঠম্
সংবর্তো মাং যাজয়িতাদ্য রাজ;ন্ন তে বাক্যং তস্য বা রোচয়ামি
10.7
গন্ধর্ব উবাচ
ঘোরো নাদঃ শ্রূয়তে বাসবস্য; নভস্তলে গর্জতো রাজসিংহ
ব্যক্তং বজ্রং মোক্ষ্যতে তে মহেন্দ্রঃ; ক্ষেমং রাজংশ্চিন্ত্যতামেষ কালঃ
10.8
ব্যাস উবাচ
ইত্যেবমুক্তো ধৃতরাষ্ট্রেণ রাজা; শ্রুত্বা নাদং নদতো বাসবস্য
তপোনিত্যং ধর্মবিদাং বরিষ্ঠং; সংবর্তং তং জ্ঞাপয়ামাস কার্যম্
10.9
মরুত্ত উবাচ
ইমমশ্মানং প্লবমানমারা;দধ্বা দূরং তেন ন দৃশ্যতেঽদ্য
প্রপদ্যেঽহং শর্ম বিপ্রেন্দ্র ত্বত্তঃ; প্রয়চ্ছ তস্মাদভয়ং বিপ্রমুখ্য
10.10
অয়মায়াতি বৈ বজ্রী দিশো বিদ্যোতয়ন্দশ
অমানুষেণ ঘোরেণ সদস্যাস্ত্রাসিতা হি নঃ
10.11
সংবর্ত উবাচ
ভয়ং শক্রাদ্ব্যেতু তে রাজসিংহ; প্রণোত্স্যেঽহং ভয়মেতত্সুঘোরম্
সংস্তম্ভিন্যা বিদ্যয়া ক্ষিপ্রমেব; মা ভৈস্ত্বমস্মাদ্ভব চাপি প্রতীতঃ
10.12
অহং সংস্তম্ভয়িষ্যামি মা ভৈস্ত্বং শক্রতো নৃপ
সর্বেষামেব দেবানাং ক্ষপিতান্যায়ুধানি মে
10.13
দিশো বজ্রং ব্রজতাং বায়ুরেতু; বর্ষং ভূত্বা নিপততু কাননেষু
আপঃ প্লবন্ত্বন্তরিক্ষে বৃথা চ; সৌদামিনী দৃশ্যতাং মা বিভস্ত্বম্
10.14
অথো বহ্নিস্ত্রাতু বা সর্বতস্তে; কামং বর্ষং বর্ষতু বাসবো বা
বজ্রং তথা স্থাপয়তাং চ বায়ু;র্মহাঘোরং প্লবমানং জলৌঘৈঃ
10.15
মরুত্ত উবাচ
ঘোরঃ শব্দঃ শ্রূয়তে বৈ মহাস্বনো; বজ্রস্যৈষ সহিতো মারুতেন
আত্মা হি মে প্রব্যথতে মুহুর্মুহু;র্ন মে স্বাস্থ্যং জায়তে চাদ্য বিপ্র
10.16
সংবর্ত উবাচ
বজ্রাদুগ্রাদ্ব্যেতু ভয়ং তবাদ্য; বাতো ভূত্বা হন্মি নরেন্দ্র বজ্রম্
ভয়ং ত্যক্ত্বা বরমন্যং বৃণীষ্ব; কং তে কামং তপসা সাধয়ামি
10.17
মরুত্ত উবাচ
ইন্দ্রঃ সাক্ষাত্সহসাভ্যেতু বিপ্র; হবির্যজ্ঞে প্রতিগৃহ্ণাতু চৈব
স্বং স্বং ধিষ্ণ্যং চৈব জুষন্তু দেবাঃ; সুতং সোমং প্রতিগৃহ্ণন্তু চৈব
10.18
সংবর্ত উবাচ
অয়মিন্দ্রো হরিভিরায়াতি রাজ;ন্দেবৈঃ সর্বৈঃ সহিতঃ সোমপীথী
মন্ত্রাহূতো যজ্ঞমিমং ময়াদ্য; পশ্যস্বৈনং মন্ত্রবিস্রস্তকায়ম্
10.19
ব্যাস উবাচ
ততো দেবৈঃ সহিতো দেবরাজো; রথে যুক্ত্বা তান্হরীন্বাজিমুখ্যান্
আয়াদ্যজ্ঞমধি রাজ্ঞঃ পিপাসু;রাবিক্ষিতস্যাপ্রমেয়স্য সোমম্
10.20
তমায়ান্তং সহিতং দেবসংঘৈঃ; প্রত্যুদ্যয়ৌ সপুরোধা মরুত্তঃ
চক্রে পূজাং দেবরাজায় চাগ্র্যাং; যথাশাস্ত্রং বিধিবত্প্রীয়মাণঃ
10.21
সংবর্ত উবাচ
স্বাগতং তে পুরুহূতেহ বিদ্ব;ন্যজ্ঞোঽদ্যায়ং সংনিহিতে ত্বয়ীন্দ্র
শোশুভ্যতে বলবৃত্রঘ্ন ভূয়ঃ; পিবস্ব সোমং সুতমুদ্যতং ময়া
10.22
মরুত্ত উবাচ
শিবেন মাং পশ্য নমশ্চ তেঽস্তু; প্রাপ্তো যজ্ঞঃ সফলং জীবিতং মে
অয়ং যজ্ঞং কুরুতে মে সুরেন্দ্র; বৃহস্পতেরবরো জন্মনা যঃ
10.23
ইন্দ্র উবাচ
জানামি তে গুরুমেনং তপোধনং; বৃহস্পতেরনুজং তিগ্মতেজসম্
যস্যাহ্বানাদাগতোঽহং নরেন্দ্র; প্রীতির্মেঽদ্য ত্বয়ি মন্যুঃ প্রনষ্টঃ
10.24
সংবর্ত উবাচ
যদি প্রীতস্ত্বমসি বৈ দেবরাজ; তস্মাত্স্বয়ং শাধি যজ্ঞে বিধানম্
স্বয়ং সর্বান্কুরু মার্গান্সুরেন্দ্র; জানাত্বয়ং সর্বলোকশ্চ দেব
10.25
ব্যাস উবাচ
এবমুক্তস্ত্বাঙ্গিরসেন শক্রঃ; সমাদিদেশ স্বয়মেব দেবান্
সভাঃ ক্রিয়ন্তামাবসথাশ্চ মুখ্যাঃ; সহস্রশশ্চিত্রভৌমাঃ সমৃদ্ধাঃ
10.26
কৢপ্তস্থূণাঃ কুরুতারোহণানি; গন্ধর্বাণামপ্সরসাং চ শীঘ্রম্
যেষু নৃত্যেরন্নপ্সরসঃ সহস্রশঃ; স্বর্গোদ্দেশঃ ক্রিয়তাং যজ্ঞবাটঃ
10.27
ইত্যুক্তাস্তে চক্রুরাশু প্রতীতা; দিবৌকসঃ শক্রবাক্যান্নরেন্দ্র
ততো বাক্যং প্রাহ রাজানমিন্দ্রঃ; প্রীতো রাজন্পূজয়ানো মরুত্তম্
10.28
এষ ত্বয়াহমিহ রাজন্সমেত্য; যে চাপ্যন্যে তব পূর্বে নরেন্দ্রাঃ
সর্বাশ্চান্যা দেবতাঃ প্রীয়মাণা; হবিস্তুভ্যং প্রতিগৃহ্ণন্তু রাজন্
10.29
আগ্নেয়ং বৈ লোহিতমালভন্তাং; বৈশ্বদেবং বহুরূপং বিরাজন্
নীলং চোক্ষাণং মেধ্যমভ্যালভন্তাং; চলচ্ছিশ্নং মত্প্রদিষ্টং দ্বিজেন্দ্রাঃ
10.30
ততো যজ্ঞো ববৃধে তস্য রাজ্ঞো; যত্র দেবাঃ স্বয়মন্নানি জহ্রুঃ
যস্মিঞ্শক্রো ব্রাহ্মণৈঃ পূজ্যমানঃ; সদস্যোঽভূদ্ধরিমান্দেবরাজঃ
10.31
ততঃ সংবর্তশ্চিত্যগতো মহাত্মা; যথা বহ্নিঃ প্রজ্বলিতো দ্বিতীয়ঃ
হবীংষ্যুচ্চৈরাহ্বয়ন্দেবসংঘা;ঞ্জুহাবাগ্নৌ মন্ত্রবত্সুপ্রতীতঃ
10.32
ততঃ পীত্বা বলভিত্সোমমগ্র্যং; যে চাপ্যন্যে সোমপা বৈ দিবৌকসঃ
সর্বেঽনুজ্ঞাতাঃ প্রয়য়ুঃ পার্থিবেন; যথাজোষং তর্পিতাঃ প্রীতিমন্তঃ
10.33
ততো রাজা জাতরূপস্য রাশী;ন্পদে পদে কারয়ামাস হৃষ্টঃ
দ্বিজাতিভ্যো বিসৃজন্ভূরি বিত্তং; ররাজ বিত্তেশ ইবারিহন্তা
10.34
ততো বিত্তং বিবিধং সংনিধায়; যথোত্সাহং কারয়িত্বা চ কোশম্
অনুজ্ঞাতো গুরুণা সংনিবৃত্য; শশাস গামখিলাং সাগরান্তাম্
10.35
এবংগুণঃ সংবভূবেহ রাজা; যস্য ক্রতৌ তত্সুবর্ণং প্রভূতম্
তত্ত্বং সমাদায় নরেন্দ্র বিত্তং; যজস্ব দেবাংস্তর্পয়ানো বিধানৈঃ
10.36
বৈশংপায়ন উবাচ
ততো রাজা পাণ্ডবো হৃষ্টরূপঃ; শ্রুত্বা বাক্যং সত্যবত্যাঃ সুতস্য
মনশ্চক্রে তেন বিত্তেন যষ্টুং; ততোঽমাত্যৈর্মন্ত্রয়ামাস ভূয়ঃ