Utshovঅধ্যায় 11
11.1
বৈশংপায়ন উবাচ
ইত্যুক্তে নৃপতৌ তস্মিন্ব্যাসেনাদ্ভুতকর্মণা
বাসুদেবো মহাতেজাস্ততো বচনমাদদে
11.2
তং নৃপং দীনমনসং নিহতজ্ঞাতিবান্ধবম্
উপপ্লুতমিবাদিত্যং সধূমমিব পাবকম্
11.3
নির্বিণ্ণমনসং পার্থং জ্ঞাত্বা বৃষ্ণিকুলোদ্বহঃ
আশ্বাসয়ন্ধর্মসুতং প্রবক্তুমুপচক্রমে
11.4
বাসুদেব উবাচ
সর্বং জিহ্মং মৃত্যুপদমার্জবং ব্রহ্মণঃ পদম্
এতাবাঞ্জ্ঞানবিষয়ঃ কিং প্রলাপঃ করিষ্যতি
11.5
নৈব তে নিষ্ঠিতং কর্ম নৈব তে শত্রবো জিতাঃ
কথং শত্রুং শরীরস্থমাত্মানং নাববুধ্যসে
11.6
অত্র তে বর্তয়িষ্যামি যথাধর্মং যথাশ্রুতম্
ইন্দ্রস্য সহ বৃত্রেণ যথা যুদ্ধমবর্তত
11.7
বৃত্রেণ পৃথিবী ব্যাপ্তা পুরা কিল নরাধিপ
দৃষ্ট্বা স পৃথিবীং ব্যাপ্তাং গন্ধস্য বিষয়ে হৃতে
ধরাহরণদুর্গন্ধো বিষয়ঃ সমপদ্যত
11.8
শতক্রতুশ্চুকোপাথ গন্ধস্য বিষয়ে হৃতে
বৃত্রস্য স ততঃ ক্রুদ্ধো বজ্রং ঘোরমবাসৃজৎ
11.9
স বধ্যমানো বজ্রেণ পৃথিব্যাং ভূরিতেজসা
বিবেশ সহসৈবাপো জগ্রাহ বিষয়ং ততঃ
11.10
ব্যাপ্তাস্বথাপ্সু বৃত্রেণ রসে চ বিষয়ে হৃতে
শতক্রতুরভিক্রুদ্ধস্তাসু বজ্রমবাসৃজৎ
11.11
স বধ্যমানো বজ্রেণ সলিলে ভূরিতেজসা
বিবেশ সহসা জ্যোতির্জগ্রাহ বিষয়ং ততঃ
11.12
ব্যাপ্তে জ্যোতিষি বৃত্রেণ রূপেঽথ বিষয়ে হৃতে
শতক্রতুরভিক্রুদ্ধস্তত্র বজ্রমবাসৃজৎ
11.13
স বধ্যমানো বজ্রেণ সুভৃশং ভূরিতেজসা
বিবেশ সহসা বায়ুং জগ্রাহ বিষয়ং ততঃ
11.14
ব্যাপ্তে বায়ৌ তু বৃত্রেণ স্পর্শেঽথ বিষয়ে হৃতে
শতক্রতুরভিক্রুদ্ধস্তত্র বজ্রমবাসৃজৎ
11.15
স বধ্যমানো বজ্রেণ তস্মিন্নমিততেজসা
আকাশমভিদুদ্রাব জগ্রাহ বিষয়ং ততঃ
11.16
আকাশে বৃত্রভূতে চ শব্দে চ বিষয়ে হৃতে
শতক্রতুরভিক্রুদ্ধস্তত্র বজ্রমবাসৃজৎ
11.17
স বধ্যমানো বজ্রেণ তস্মিন্নমিততেজসা
বিবেশ সহসা শক্রং জগ্রাহ বিষয়ং ততঃ
11.18
তস্য বৃত্রগৃহীতস্য মোহঃ সমভবন্মহান্
রথংতরেণ তং তাত বসিষ্ঠঃ প্রত্যবোধয়ৎ
11.19
ততো বৃত্রং শরীরস্থং জঘান ভরতর্ষভ
শতক্রতুরদৃশ্যেন বজ্রেণেতীহ নঃ শ্রুতম্
11.20
ইদং ধর্মরহস্যং চ শক্রেণোক্তং মহর্ষিষু
ঋষিভিশ্চ মম প্রোক্তং তন্নিবোধ নরাধিপ