অধ্যায় 12

12.1

বাসুদেব উবাচ
দ্বিবিধো জায়তে ব্যাধিঃ শারীরো মানসস্তথা
পরস্পরং তয়োর্জন্ম নির্দ্বংদ্বং নোপলভ্যতে

শরীরে জায়তে ব্যাধিঃ শারীরো নাত্র সংশয়ঃ
মানসো জায়তে ব্যাধির্মনস্যেবেতি নিশ্চয়ঃ

শীতোষ্ণে চৈব বায়ুশ্চ গুণা রাজঞ্শরীরজাঃ
তেষাং গুণানাং সাম্যং চেত্তদাহুঃ স্বস্থলক্ষণম্
উষ্ণেন বাধ্যতে শীতং শীতেনোষ্ণং চ বাধ্যতে

সত্ত্বং রজস্তমশ্চেতি ত্রয়স্ত্বাত্মগুণাঃ স্মৃতাঃ
তেষাং গুণানাং সাম্যং চেত্তদাহুঃ স্বস্থলক্ষণম্
তেষামন্যতমোত্সেকে বিধানমুপদিশ্যতে

হর্ষেণ বাধ্যতে শোকো হর্ষঃ শোকেন বাধ্যতে
কশ্চিদ্দুঃখে বর্তমানঃ সুখস্য স্মর্তুমিচ্ছতি
কশ্চিত্সুখে বর্তমানো দুঃখস্য স্মর্তুমিচ্ছতি

স ত্বং ন দুঃখী দুঃখস্য ন সুখী সুসুখস্য বা
স্মর্তুমিচ্ছসি কৌন্তেয় দিষ্টং হি বলবত্তরম্

অথ বা তে স্বভাবোঽয়ং যেন পার্থাবকৃষ্যসে
দৃষ্ট্বা সভাগতাং কৃষ্ণামেকবস্ত্রাং রজস্বলাম্
মিষতাং পাণ্ডবেয়ানাং ন তত্সংস্মর্তুমিচ্ছসি

প্রব্রাজনং চ নগরাদজিনৈশ্চ বিবাসনম্
মহারণ্যনিবাসশ্চ ন তস্য স্মর্তুমিচ্ছসি

জটাসুরাত্পরিক্লেশশ্চিত্রসেনেন চাহবঃ
সৈন্ধবাচ্চ পরিক্লেশো ন তস্য স্মর্তুমিচ্ছসি

পুনরজ্ঞাতচর্যায়াং কীচকেন পদা বধঃ
যাজ্ঞসেন্যাস্তদা পার্থ ন তস্য স্মর্তুমিচ্ছসি

যচ্চ তে দ্রোণভীষ্মাভ্যাং যুদ্ধমাসীদরিংদম
মনসৈকেন যোদ্ধব্যং তত্তে যুদ্ধমুপস্থিতম্
তস্মাদভ্যুপগন্তব্যং যুদ্ধায় ভরতর্ষভ

পরমব্যক্তরূপস্য পরং মুক্ত্বা স্বকর্মভিঃ
যত্র নৈব শরৈঃ কার্যং ন ভৃত্যৈর্ন চ বন্ধুভিঃ
আত্মনৈকেন যোদ্ধব্যং তত্তে যুদ্ধমুপস্থিতম্

তস্মিন্ননির্জিতে যুদ্ধে কামবস্থাং গমিষ্যসি
এতজ্জ্ঞাত্বা তু কৌন্তেয় কৃতকৃত্যো ভবিষ্যসি

এতাং বুদ্ধিং বিনিশ্চিত্য ভূতানামাগতিং গতিম্
পিতৃপৈতামহে বৃত্তে শাধি রাজ্যং যথোচিতম্