অধ্যায় 13

13.1

বাসুদেব উবাচ
ন বাহ্যং দ্রব্যমুত্সৃজ্য সিদ্ধির্ভবতি ভারত
শারীরং দ্রব্যমুত্সৃজ্য সিদ্ধির্ভবতি বা ন বা

বাহ্যদ্রব্যবিমুক্তস্য শারীরেষু চ গৃধ্যতঃ
যো ধর্মো যত্সুখং চৈব দ্বিষতামস্তু তত্তথা

দ্ব্যক্ষরস্তু ভবেন্মৃত্যুস্ত্র্যক্ষরং ব্রহ্ম শাশ্বতম্
মমেতি দ্ব্যক্ষরো মৃত্যুর্ন মমেতি চ শাশ্বতম্

ব্রহ্ম মৃত্যুশ্চ তৌ রাজন্নাত্মন্যেব ব্যবস্থিতৌ
অদৃশ্যমানৌ ভূতানি যোধয়েতামসংশয়ম্

অবিনাশোঽস্য সত্ত্বস্য নিয়তো যদি ভারত
ভিত্ত্বা শরীরং ভূতানামহিংসাং প্রতিপদ্যতে

লব্ধ্বাপি পৃথিবীং সর্বাং সহস্থাবরজঙ্গমাম্
মমত্বং যস্য নৈব স্যাত্কিং তয়া স করিষ্যতি

অথ বা বসতঃ পার্থ বনে বন্যেন জীবতঃ
মমতা যস্য দ্রব্যেষু মৃত্যোরাস্যে স বর্ততে

বাহ্যান্তরাণাং শত্রূণাং স্বভাবং পশ্য ভারত
যন্ন পশ্যতি তদ্ভূতং মুচ্যতে স মহাভয়াৎ

কামাত্মানং ন প্রশংসন্তি লোকে; ন চাকামাত্কাচিদস্তি প্রবৃত্তিঃ
দানং হি বেদাধ্যয়নং তপশ্চ; কামেন কর্মাণি চ বৈদিকানি

ব্রতং যজ্ঞান্নিয়মান্ধ্যানয়োগা;ন্কামেন যো নারভতে বিদিত্বা
যদ্যদ্ধ্যয়ং কাময়তে স ধর্মো; ন যো ধর্মো নিয়মস্তস্য মূলম্

অত্র গাথাঃ কামগীতাঃ কীর্তয়ন্তি পুরাবিদঃ
শৃণু সংকীর্ত্যমানাস্তা নিখিলেন যুধিষ্ঠির

নাহং শক্যোঽনুপায়েন হন্তুং ভূতেন কেনচিৎ
যো মাং প্রয়ততে হন্তুং জ্ঞাত্বা প্রহরণে বলম্
তস্য তস্মিন্প্রহরণে পুনঃ প্রাদুর্ভবাম্যহম্

যো মাং প্রয়ততে হন্তুং যজ্ঞৈর্বিবিধদক্ষিণৈঃ
জঙ্গমেষ্বিব কর্মাত্মা পুনঃ প্রাদুর্ভবাম্যহম্

যো মাং প্রয়ততে হন্তুং বেদৈর্বেদান্তসাধনৈঃ
স্থাবরেষ্বিব শান্তাত্মা তস্য প্রাদুর্ভবাম্যহম্

যো মাং প্রয়ততে হন্তুং ধৃত্যা সত্যপরাক্রমঃ
ভাবো ভবামি তস্যাহং স চ মাং নাববুধ্যতে

যো মাং প্রয়ততে হন্তুং তপসা সংশিতব্রতঃ
ততস্তপসি তস্যাথ পুনঃ প্রাদুর্ভবাম্যহম্

যো মাং প্রয়ততে হন্তুং মোক্ষমাস্থায় পণ্ডিতঃ
তস্য মোক্ষরতিস্থস্য নৃত্যামি চ হসামি চ
অবধ্যঃ সর্বভূতানামহমেকঃ সনাতনঃ

তস্মাত্ত্বমপি তং কামং যজ্ঞৈর্বিবিধদক্ষিণৈঃ
ধর্মং কুরু মহারাজ তত্র তে স ভবিষ্যতি

যজস্ব বাজিমেধেন বিধিবদ্দক্ষিণাবতা
অন্যৈশ্চ বিবিধৈর্যজ্ঞৈঃ সমৃদ্ধৈরাপ্তদক্ষিণৈঃ

মা তে ব্যথাস্তু নিহতান্বন্ধূন্বীক্ষ্য পুনঃ পুনঃ
ন শক্যাস্তে পুনর্দ্রষ্টুং যে হতাস্মিন্রণাজিরে

স ত্বমিষ্ট্বা মহায়জ্ঞৈঃ সমৃদ্ধৈরাপ্তদক্ষিণৈঃ
লোকে কীর্তিং পরাং প্রাপ্য গতিমগ্র্যাং গমিষ্যসি