অধ্যায় 5

5.1

যুধিষ্ঠির উবাচ
কথংবীর্যঃ সমভবত্স রাজা বদতাং বরঃ
কথং চ জাতরূপেণ সময়ুজ্যত স দ্বিজ

5.2

ক্ব চ তত্সাংপ্রতং দ্রব্যং ভগবন্নবতিষ্ঠতে
কথং চ শক্যমস্মাভিস্তদবাপ্তুং তপোধন

5.3

ব্যাস উবাচ
অসুরাশ্চৈব দেবাশ্চ দক্ষস্যাসন্প্রজাপতেঃ
অপত্যং বহুলং তাত তেঽস্পর্ধন্ত পরস্পরম্

5.4

তথৈবাঙ্গিরসঃ পুত্রৌ ব্রততুল্যৌ বভূবতুঃ
বৃহস্পতির্বৃহত্তেজাঃ সংবর্তশ্চ তপোধনঃ

5.5

তাবপি স্পর্ধিনৌ রাজন্পৃথগাস্তাং পরস্পরম্
বৃহস্পতিশ্চ সংবর্তং বাধতে স্ম পুনঃ পুনঃ

5.6

স বাধ্যমানঃ সততং ভ্রাত্রা জ্যেষ্ঠেন ভারত
অর্থানুত্সৃজ্য দিগ্বাসা বনবাসমরোচয়ৎ

5.7

বাসবোঽপ্যসুরান্সর্বান্নির্জিত্য চ নিহত্য চ
ইন্দ্রত্বং প্রাপ্য লোকেষু ততো বব্রে পুরোহিতম্
পুত্রমঙ্গিরসো জ্যেষ্ঠং বিপ্রশ্রেষ্ঠং বৃহস্পতিম্

5.8

যাজ্যস্ত্বঙ্গিরসঃ পূর্বমাসীদ্রাজা করংধমঃ
বীর্যেণাপ্রতিমো লোকে বৃত্তেন চ বলেন চ
শতক্রতুরিবৌজস্বী ধর্মাত্মা সংশিতব্রতঃ

5.9

বাহনং যস্য যোধাশ্চ দ্রব্যাণি বিবিধানি চ
ধ্যানাদেবাভবদ্রাজন্মুখবাতেন সর্বশঃ

5.10

স গুণৈঃ পার্থিবান্সর্বান্বশে চক্রে নরাধিপঃ
সংজীব্য কালমিষ্টং চ সশরীরো দিবং গতঃ

5.11

বভূব তস্য পুত্রস্তু যয়াতিরিব ধর্মবিৎ
অবিক্ষিন্নাম শত্রুক্ষিত্স বশে কৃতবান্মহীম্
বিক্রমেণ গুণৈশ্চৈব পিতেবাসীত্স পার্থিবঃ

5.12

তস্য বাসবতুল্যোঽভূন্মরুত্তো নাম বীর্যবান্
পুত্রস্তমনুরক্তাভূত্পৃথিবী সাগরাম্বরা

5.13

স্পর্ধতে সততং স স্ম দেবরাজেন পার্থিবঃ
বাসবোঽপি মরুত্তেন স্পর্ধতে পাণ্ডুনন্দন

5.14

শুচিঃ স গুণবানাসীন্মরুত্তঃ পৃথিবীপতিঃ
যতমানোঽপি যং শক্রো ন বিশেষয়তি স্ম হ

5.15

সোঽশক্নুবন্বিশেষায় সমাহূয় বৃহস্পতিম্
উবাচেদং বচো দেবৈঃ সহিতো হরিবাহনঃ

5.16

বৃহস্পতে মরুত্তস্য মা স্ম কার্ষীঃ কথংচন
দৈবং কর্মাথ বা পিত্র্যং কর্তাসি মম চেত্প্রিয়ম্

5.17

অহং হি ত্রিষু লোকেষু সুরাণাং চ বৃহস্পতে
ইন্দ্রত্বং প্রাপ্তবানেকো মরুত্তস্তু মহীপতিঃ

5.18

কথং হ্যমর্ত্যং ব্রহ্মংস্ত্বং যাজয়িত্বা সুরাধিপম্
যাজয়ের্মৃত্যুসংয়ুক্তং মরুত্তমবিশঙ্কয়া

5.19

মাং বা বৃণীষ্ব ভদ্রং তে মরুত্তং বা মহীপতিম্
পরিত্যজ্য মরুত্তং বা যথাজোষং ভজস্ব মাম্

5.20

এবমুক্তঃ স কৌরব্য দেবরাজ্ঞা বৃহস্পতিঃ
মুহূর্তমিব সংচিন্ত্য দেবরাজানমব্রবীৎ

5.21

ত্বং ভূতানামধিপতিস্ত্বয়ি লোকাঃ প্রতিষ্ঠিতাঃ
নমুচের্বিশ্বরূপস্য নিহন্তা ত্বং বলস্য চ

5.22

ত্বমাজহর্থ দেবানামেকো বীর শ্রিয়ং পরাম্
ত্বং বিভর্ষি ভুবং দ্যাং চ সদৈব বলসূদন

5.23

পৌরোহিত্যং কথং কৃত্বা তব দেবগণেশ্বর
যাজয়েয়মহং মর্ত্যং মরুত্তং পাকশাসন

5.24

সমাশ্বসিহি দেবেশ নাহং মর্ত্যায় কর্হিচিৎ
গ্রহীষ্যামি স্রুবং যজ্ঞে শৃণু চেদং বচো মম

5.25

হিরণ্যরেতসোঽম্ভঃ স্যাত্পরিবর্তেত মেদিনী
ভাসং চ ন রবিঃ কুর্যান্মত্সত্যং বিচলেদ্যদি

5.26

বৃহস্পতিবচঃ শ্রুত্বা শক্রো বিগতমত্সরঃ
প্রশস্যৈনং বিবেশাথ স্বমেব ভবনং তদা

Contains text from DharmicData, made available under the Open Database License (ODbL). Simple meanings are written by AI and can contain mistakes.