অধ্যায় 4

4.1

যুধিষ্ঠির উবাচ
শুশ্রূষে তস্য ধর্মজ্ঞ রাজর্ষেঃ পরিকীর্তনম্
দ্বৈপায়ন মরুত্তস্য কথাং প্রব্রূহি মেঽনঘ

4.2

ব্যাস উবাচ
আসীত্কৃতয়ুগে পূর্বং মনুর্দণ্ডধরঃ প্রভুঃ
তস্য পুত্রো মহেষ্বাসঃ প্রজাতিরিতি বিশ্রুতঃ

4.3

প্রজাতেরভবত্পুত্রঃ ক্ষুপ ইত্যভিবিশ্রুতঃ
ক্ষুপস্য পুত্রস্ত্বিক্ষ্বাকুর্মহীপালোঽভবত্প্রভুঃ

4.4

তস্য পুত্রশতং রাজন্নাসীত্পরমধার্মিকম্
তাংস্তু সর্বান্মহীপালানিক্ষ্বাকুরকরোত্প্রভুঃ

4.5

তেষাং জ্যেষ্ঠস্তু বিংশোঽভূত্প্রতিমানং ধনুষ্মতাম্
বিংশস্য পুত্রঃ কল্যাণো বিবিংশো নাম ভারত

4.6

বিবিংশস্য সুতা রাজন্বভূবুর্দশ পঞ্চ চ
সর্বে ধনুষি বিক্রান্তা ব্রহ্মণ্যাঃ সত্যবাদিনঃ

4.7

দানধর্মরতাঃ সন্তঃ সততং প্রিয়বাদিনঃ
তেষাং জ্যেষ্ঠঃ খনীনেত্রঃ স তান্সর্বানপীডয়ৎ

4.8

খনীনেত্রস্তু বিক্রান্তো জিত্বা রাজ্যমকণ্টকম্
নাশক্নোদ্রক্ষিতুং রাজ্যং নান্বরজ্যন্ত তং প্রজাঃ

4.9

তমপাস্য চ তদ্রাষ্ট্রং তস্য পুত্রং সুবর্চসম্
অভ্যষিঞ্চত রাজেন্দ্র মুদিতং চাভবত্তদা

4.10

স পিতুর্বিক্রিয়াং দৃষ্ট্বা রাজ্যান্নিরসনং তথা
নিয়তো বর্তয়ামাস প্রজাহিতচিকীর্ষয়া

4.11

ব্রহ্মণ্যঃ সত্যবাদী চ শুচিঃ শমদমান্বিতঃ
প্রজাস্তং চান্বরজ্যন্ত ধর্মনিত্যং মনস্বিনম্

4.12

তস্য ধর্মপ্রবৃত্তস্য ব্যশীর্যত্কোশবাহনম্
তং ক্ষীণকোশং সামন্তাঃ সমন্তাত্পর্যপীডয়ন্

4.13

স পীড্যমানো বহুভিঃ ক্ষীণকোশস্ত্ববাহনঃ
আর্তিমার্ছত্পরাং রাজা সহ ভৃত্যৈঃ পুরেণ চ

4.14

ন চৈনং পরিহর্তুং তেঽশক্নুবন্পরিসংক্ষয়ে
সম্যগ্বৃত্তো হি রাজা স ধর্মনিত্যো যুধিষ্ঠির

4.15

যদা তু পরমামার্তিং গতোঽসৌ সপুরো নৃপঃ
ততঃ প্রদধ্মৌ স করং প্রাদুরাসীত্ততো বলম্

4.16

ততস্তানজয়ত্সর্বান্প্রাতিসীমান্নরাধিপান্
এতস্মাত্কারণাদ্রাজন্বিশ্রুতঃ স করংধমঃ

4.17

তস্য কারংধমঃ পুত্রস্ত্রেতায়ুগমুখেঽভবৎ
ইন্দ্রাদনবরঃ শ্রীমান্দেবৈরপি সুদুর্জয়ঃ

4.18

তস্য সর্বে মহীপালা বর্তন্তে স্ম বশে তদা
স হি সম্রাডভূত্তেষাং বৃত্তেন চ বলেন চ

4.19

অবিক্ষিন্নাম ধর্মাত্মা শৌর্যেণেন্দ্রসমোঽভবৎ
যজ্ঞশীলঃ কর্মরতির্ধৃতিমান্সংয়তেন্দ্রিয়ঃ

4.20

তেজসাদিত্যসদৃশঃ ক্ষময়া পৃথিবীসমঃ
বৃহস্পতিসমো বুদ্ধ্যা হিমবানিব সুস্থিরঃ

4.21

কর্মণা মনসা বাচা দমেন প্রশমেন চ
মনাংস্যারাধয়ামাস প্রজানাং স মহীপতিঃ

4.22

য ঈজে হয়মেধানাং শতেন বিধিবত্প্রভুঃ
যাজয়ামাস যং বিদ্বান্স্বয়মেবাঙ্গিরাঃ প্রভুঃ

4.23

তস্য পুত্রোঽতিচক্রাম পিতরং গুণবত্তয়া
মরুত্তো নাম ধর্মজ্ঞশ্চক্রবর্তী মহায়শাঃ

4.24

নাগায়ুতসমপ্রাণঃ সাক্ষাদ্বিষ্ণুরিবাপরঃ
স যক্ষ্যমাণো ধর্মাত্মা শাতকুম্ভময়ান্যুত
কারয়ামাস শুভ্রাণি ভাজনানি সহস্রশঃ

4.25

মেরুং পর্বতমাসাদ্য হিমবত্পার্শ্ব উত্তরে
কাঞ্চনঃ সুমহান্পাদস্তত্র কর্ম চকার সঃ

4.26

ততঃ কুণ্ডানি পাত্রীশ্চ পিঠরাণ্যাসনানি চ
চক্রুঃ সুবর্ণকর্তারো যেষাং সংখ্যা ন বিদ্যতে

4.27

তস্যৈব চ সমীপে স যজ্ঞবাটো বভূব হ
ঈজে তত্র স ধর্মাত্মা বিধিবত্পৃথিবীপতিঃ
মরুত্তঃ সহিতৈঃ সর্বৈঃ প্রজাপালৈর্নরাধিপঃ

Contains text from DharmicData, made available under the Open Database License (ODbL). Simple meanings are written by AI and can contain mistakes.