অধ্যায় 3

3.1

ব্যাস উবাচ
যুধিষ্ঠির তব প্রজ্ঞা ন সম্যগিতি মে মতিঃ
ন হি কশ্চিত্স্বয়ং মর্ত্যঃ স্ববশঃ কুরুতে ক্রিয়াঃ

ঈশ্বরেণ নিয়ুক্তোঽয়ং সাধ্বসাধু চ মানবঃ
করোতি পুরুষঃ কর্ম তত্র কা পরিদেবনা

আত্মানং মন্যসে চাথ পাপকর্মাণমন্ততঃ
শৃণু তত্র যথা পাপমপকৃষ্যেত ভারত

তপোভিঃ ক্রতুভিশ্চৈব দানেন চ যুধিষ্ঠির
তরন্তি নিত্যং পুরুষা যে স্ম পাপানি কুর্বতে

যজ্ঞেন তপসা চৈব দানেন চ নরাধিপ
পূয়ন্তে রাজশার্দূল নরা দুষ্কৃতকর্মিণঃ

অসুরাশ্চ সুরাশ্চৈব পুণ্যহেতোর্মখক্রিয়াম্
প্রয়তন্তে মহাত্মানস্তস্মাদ্যজ্ঞাঃ পরায়ণম্

যজ্ঞৈরেব মহাত্মানো বভূবুরধিকাঃ সুরাঃ
ততো দেবাঃ ক্রিয়াবন্তো দানবানভ্যধর্ষয়ন্

রাজসূয়াশ্বমেধৌ চ সর্বমেধং চ ভারত
নরমেধং চ নৃপতে ত্বমাহর যুধিষ্ঠির

যজস্ব বাজিমেধেন বিধিবদ্দক্ষিণাবতা
বহুকামান্নবিত্তেন রামো দাশরথির্যথা

যথা চ ভরতো রাজা দৌঃষন্তিঃ পৃথিবীপতিঃ
শাকুন্তলো মহাবীর্যস্তব পূর্বপিতামহঃ

যুধিষ্ঠির উবাচ
অসংশয়ং বাজিমেধঃ পাবয়েত্পৃথিবীমপি
অভিপ্রায়স্তু মে কশ্চিত্তং ত্বং শ্রোতুমিহার্হসি

ইমং জ্ঞাতিবধং কৃত্বা সুমহান্তং দ্বিজোত্তম
দানমল্পং ন শক্যামি দাতুং বিত্তং চ নাস্তি মে

ন চ বালানিমান্দীনানুত্সহে বসু যাচিতুম্
তথৈবার্দ্রব্রণান্কৃচ্ছ্রে বর্তমানান্নৃপাত্মজান্

স্বয়ং বিনাশ্য পৃথিবীং যজ্ঞার্থে দ্বিজসত্তম
করমাহারয়িষ্যামি কথং শোকপরায়ণান্

দুর্যোধনাপরাধেন বসুধা বসুধাধিপাঃ
প্রনষ্টা যোজয়িত্বাস্মানকীর্ত্যা মুনিসত্তম

দুর্যোধনেন পৃথিবী ক্ষয়িতা বিত্তকারণাৎ
কোশশ্চাপি বিশীর্ণোঽসৌ ধার্তরাষ্ট্রস্য দুর্মতেঃ

পৃথিবী দক্ষিণা চাত্র বিধিঃ প্রথমকল্পিকঃ
বিদ্বদ্ভিঃ পরিদৃষ্টোঽয়ং শিষ্টো বিধিবিপর্যয়ঃ

ন চ প্রতিনিধিং কর্তুং চিকীর্ষামি তপোধন
অত্র মে ভগবন্সম্যক্সাচিব্যং কর্তুমর্হসি

বৈশংপায়ন উবাচ
এবমুক্তস্তু পার্থেন কৃষ্ণদ্বৈপায়নস্তদা
মুহূর্তমনুসংচিন্ত্য ধর্মরাজানমব্রবীৎ

বিদ্যতে দ্রবিণং পার্থ গিরৌ হিমবতি স্থিতম্
উত্সৃষ্টং ব্রাহ্মণৈর্যজ্ঞে মরুত্তস্য মহীপতেঃ
তদানয়স্ব কৌন্তেয় পর্যাপ্তং তদ্ভবিষ্যতি

যুধিষ্ঠির উবাচ
কথং যজ্ঞে মরুত্তস্য দ্রবিণং তত্সমাচিতম্
কস্মিংশ্চ কালে স নৃপো বভূব বদতাং বর

ব্যাস উবাচ
যদি শুশ্রূষসে পার্থ শৃণু কারংধমং নৃপম্
যস্মিন্কালে মহাবীর্যঃ স রাজাসীন্মহাধনঃ