অধ্যায় 2

2.1

বৈশংপায়ন উবাচ
এবমুক্তস্তু রাজ্ঞা স ধৃতরাষ্ট্রেণ ধীমতা
তূষ্ণীং বভূব মেধাবী তমুবাচাথ কেশবঃ

অতীব মনসা শোকঃ ক্রিয়মাণো জনাধিপ
সংতাপয়তি বৈতস্য পূর্বপ্রেতান্পিতামহান্

যজস্ব বিবিধৈর্যজ্ঞৈর্বহুভিঃ স্বাপ্তদক্ষিণৈঃ
দেবাংস্তর্পয় সোমেন স্বধয়া চ পিতৄনপি

ত্বদ্বিধস্য মহাবুদ্ধে নৈতদদ্যোপপদ্যতে
বিদিতং বেদিতব্যং তে কর্তব্যমপি তে কৃতম্

শ্রুতাশ্চ রাজধর্মাস্তে ভীষ্মাদ্ভাগীরথীসুতাৎ
কৃষ্ণদ্বৈপায়নাচ্চৈব নারদাদ্বিদুরাত্তথা

নেমামর্হসি মূঢানাং বৃত্তিং ত্বমনুবর্তিতুম্
পিতৃপৈতামহীং বৃত্তিমাস্থায় ধুরমুদ্বহ

যুক্তং হি যশসা ক্ষত্রং স্বর্গং প্রাপ্তুমসংশয়ম্
ন হি কশ্চন শূরাণাং নিহতোঽত্র পরাঙ্মুখঃ

ত্যজ শোকং মহারাজ ভবিতব্যং হি তত্তথা
ন শক্যাস্তে পুনর্দ্রষ্টুং ত্বয়া হ্যস্মিন্রণে হতাঃ

এতাবদুক্ত্বা গোবিন্দো ধর্মরাজং যুধিষ্ঠিরম্
বিররাম মহাতেজাস্তমুবাচ যুধিষ্ঠিরঃ

গোবিন্দ ময়ি যা প্রীতিস্তব সা বিদিতা মম
সৌহৃদেন তথা প্রেম্ণা সদা মামনুকম্পসে

প্রিয়ং তু মে স্যাত্সুমহত্কৃতং চক্রগদাধর
শ্রীমন্প্রীতেন মনসা সর্বং যাদবনন্দন

যদি মামনুজানীয়াদ্ভবান্গন্তুং তপোবনম্
ন হি শান্তিং প্রপশ্যামি ঘাতয়িত্বা পিতামহম্
কর্ণং চ পুরুষব্যাঘ্রং সংগ্রামেষ্বপলায়িনম্

কর্মণা যেন মুচ্যেয়মস্মাত্ক্রূরাদরিংদম
কর্মণস্তদ্বিধত্স্বেহ যেন শুধ্যতি মে মনঃ

তমেবংবাদিনং ব্যাসস্ততঃ প্রোবাচ ধর্মবিৎ
সান্ত্বয়ন্সুমহাতেজাঃ শুভং বচনমর্থবৎ

অকৃতা তে মতিস্তাত পুনর্বাল্যেন মুহ্যসে
কিমাকাশে বয়ং সর্বে প্রলপাম মুহুর্মুহুঃ

বিদিতাঃ ক্ষত্রধর্মাস্তে যেষাং যুদ্ধেন জীবিকা
যথা প্রবৃত্তো নৃপতির্নাধিবন্ধেন যুজ্যতে

মোক্ষধর্মাশ্চ নিখিলা যাথাতথ্যেন তে শ্রুতাঃ
অসকৃচ্চৈব সংদেহাশ্ছিন্নাস্তে কামজা ময়া

অশ্রদ্দধানো দুর্মেধা লুপ্তস্মৃতিরসি ধ্রুবম্
মৈবং ভব ন তে যুক্তমিদমজ্ঞানমীদৃশম্

প্রায়শ্চিত্তানি সর্বাণি বিদিতানি চ তেঽনঘ
যুদ্ধধর্মাশ্চ তে সর্বে দানধর্মাশ্চ তে শ্রুতাঃ

স কথং সর্বধর্মজ্ঞঃ সর্বাগমবিশারদঃ
পরিমুহ্যসি ভূয়স্ত্বমজ্ঞানাদিব ভারত