UtshovChapter 2
2.1
वैशंपायन उवाच
एवमुक्तस्तु राज्ञा स धृतराष्ट्रेण धीमता
तूष्णीं बभूव मेधावी तमुवाचाथ केशवः
Vaishampayana uvacha
Evamuktastu ragya sa dhritarashtrena dhimata
Tushnim babhuva medhavi tamuvachatha keshavah
2.2
अतीव मनसा शोकः क्रियमाणो जनाधिप
संतापयति वैतस्य पूर्वप्रेतान्पितामहान्
Ativa manasa shokah kriyamano janadhipa
Santapayati vaitasya purvapretanpitamahan
2.3
यजस्व विविधैर्यज्ञैर्बहुभिः स्वाप्तदक्षिणैः
देवांस्तर्पय सोमेन स्वधया च पितॄनपि
Yajasva vividhairyagyairbahubhih svaptadakshinaih
Devanstarpaya somena svadhaya cha pitrinapi
2.4
त्वद्विधस्य महाबुद्धे नैतदद्योपपद्यते
विदितं वेदितव्यं ते कर्तव्यमपि ते कृतम्
Tvadvidhasya mahabuddhe naitadadyopapadyate
Viditam veditavyam te kartavyamapi te kritam
2.5
श्रुताश्च राजधर्मास्ते भीष्माद्भागीरथीसुतात्
कृष्णद्वैपायनाच्चैव नारदाद्विदुरात्तथा
Shrutashcha rajadharmaste bhishmadbhagirathisutat
Krishnadvaipayanachchaiva naradadvidurattatha
2.6
नेमामर्हसि मूढानां वृत्तिं त्वमनुवर्तितुम्
पितृपैतामहीं वृत्तिमास्थाय धुरमुद्वह
Nemamarhasi mudhanam vrittim tvamanuvartitum
Pitripaitamahim vrittimasthaya dhuramudvaha
2.7
युक्तं हि यशसा क्षत्रं स्वर्गं प्राप्तुमसंशयम्
न हि कश्चन शूराणां निहतोऽत्र पराङ्मुखः
Yuktam hi yashasa kshatram svargam praptumasanshayam
Na hi kashchana shuranam nihatotra paranmukhah
2.8
त्यज शोकं महाराज भवितव्यं हि तत्तथा
न शक्यास्ते पुनर्द्रष्टुं त्वया ह्यस्मिन्रणे हताः
Tyaja shokam maharaja bhavitavyam hi tattatha
Na shakyaste punardrashtum tvaya hyasminrane hatah
2.9
एतावदुक्त्वा गोविन्दो धर्मराजं युधिष्ठिरम्
विरराम महातेजास्तमुवाच युधिष्ठिरः
Etavaduktva govindo dharmarajam yudhishthiram
Virarama mahatejastamuvacha yudhishthirah
2.10
गोविन्द मयि या प्रीतिस्तव सा विदिता मम
सौहृदेन तथा प्रेम्णा सदा मामनुकम्पसे
Govinda mayi ya pritistava sa vidita mama
Sauhridena tatha premna sada mamanukampase
2.11
प्रियं तु मे स्यात्सुमहत्कृतं चक्रगदाधर
श्रीमन्प्रीतेन मनसा सर्वं यादवनन्दन
Priyam tu me syatsumahatkritam chakragadadhara
Shrimanpritena manasa sarvam yadavanandana
2.12
यदि मामनुजानीयाद्भवान्गन्तुं तपोवनम्
न हि शान्तिं प्रपश्यामि घातयित्वा पितामहम्
कर्णं च पुरुषव्याघ्रं संग्रामेष्वपलायिनम्
Yadi mamanujaniyadbhavangantum tapovanam
Na hi shantim prapashyami ghatayitva pitamaham
Karnam cha purushavyaghram sangrameshvapalayinam
2.13
कर्मणा येन मुच्येयमस्मात्क्रूरादरिंदम
कर्मणस्तद्विधत्स्वेह येन शुध्यति मे मनः
Karmana yena muchyeyamasmatkruradarindama
Karmanastadvidhatsveha yena shudhyati me manah
2.14
तमेवंवादिनं व्यासस्ततः प्रोवाच धर्मवित्
सान्त्वयन्सुमहातेजाः शुभं वचनमर्थवत्
Tamevanvadinam vyasastatah provacha dharmavit
Santvayansumahatejah shubham vachanamarthavat
2.15
अकृता ते मतिस्तात पुनर्बाल्येन मुह्यसे
किमाकाशे वयं सर्वे प्रलपाम मुहुर्मुहुः
Akrita te matistata punarbalyena muhyase
Kimakashe vayam sarve pralapama muhurmuhuh
2.16
विदिताः क्षत्रधर्मास्ते येषां युद्धेन जीविका
यथा प्रवृत्तो नृपतिर्नाधिबन्धेन युज्यते
Viditah kshatradharmaste yesham yuddhena jivika
Yatha pravritto nripatirnadhibandhena yujyate
2.17
मोक्षधर्माश्च निखिला याथातथ्येन ते श्रुताः
असकृच्चैव संदेहाश्छिन्नास्ते कामजा मया
Mokshadharmashcha nikhila yathatathyena te shrutah
Asakrichchaiva sandehashchhinnaste kamaja maya
2.18
अश्रद्दधानो दुर्मेधा लुप्तस्मृतिरसि ध्रुवम्
मैवं भव न ते युक्तमिदमज्ञानमीदृशम्
Ashraddadhano durmedha luptasmritirasi dhruvam
Maivam bhava na te yuktamidamagyanamidrisham
2.19
प्रायश्चित्तानि सर्वाणि विदितानि च तेऽनघ
युद्धधर्माश्च ते सर्वे दानधर्माश्च ते श्रुताः
Prayashchittani sarvani viditani cha tenagha
Yuddhadharmashcha te sarve danadharmashcha te shrutah
2.20
स कथं सर्वधर्मज्ञः सर्वागमविशारदः
परिमुह्यसि भूयस्त्वमज्ञानादिव भारत
Sa katham sarvadharmagyah sarvagamavisharadah
Parimuhyasi bhuyastvamagyanadiva bharata