অধ্যায় 1

1.1

বৈশংপায়ন উবাচ
কৃতোদকং তু রাজানং ধৃতরাষ্ট্রং যুধিষ্ঠিরঃ
পুরস্কৃত্য মহাবাহুরুত্ততারাকুলেন্দ্রিয়ঃ

উত্তীর্য চ মহীপালো বাষ্পব্যাকুললোচনঃ
পপাত তীরে গঙ্গায়া ব্যাধবিদ্ধ ইব দ্বিপঃ

তং সীদমানং জগ্রাহ ভীমঃ কৃষ্ণেন চোদিতঃ
মৈবমিত্যব্রবীচ্চৈনং কৃষ্ণঃ পরবলার্দনঃ

তমার্তং পতিতং ভূমৌ নিশ্বসন্তং পুনঃ পুনঃ
দদৃশুঃ পাণ্ডবা রাজন্ধর্মাত্মানং যুধিষ্ঠিরম্

তং দৃষ্ট্বা দীনমনসং গতসত্ত্বং জনেশ্বরম্
ভূয়ঃ শোকসমাবিষ্টাঃ পাণ্ডবাঃ সমুপাবিশন্

রাজা চ ধৃতরাষ্ট্রস্তমুপাসীনো মহাভুজঃ
বাক্যমাহ মহাপ্রাজ্ঞো মহাশোকপ্রপীডিতম্

উত্তিষ্ঠ কুরুশার্দূল কুরু কার্যমনন্তরম্
ক্ষত্রধর্মেণ কৌরব্য জিতেয়মবনিস্ত্বয়া

তাং ভুঙ্ক্ষ্ব ভ্রাতৃভিঃ সার্ধং সুহৃদ্ভিশ্চ জনেশ্বর
ন শোচিতব্যং পশ্যামি ত্বয়া ধর্মভৃতাং বর

শোচিতব্যং ময়া চৈব গান্ধার্যা চ বিশাং পতে
পুত্রৈর্বিহীনো রাজ্যেন স্বপ্নলব্ধধনো যথা

অশ্রুত্বা হিতকামস্য বিদুরস্য মহাত্মনঃ
বাক্যানি সুমহার্থানি পরিতপ্যামি দুর্মতিঃ

উক্তবানেষ মাং পূর্বং ধর্মাত্মা দিব্যদর্শনঃ
দুর্যোধনাপরাধেন কুলং তে বিনশিষ্যতি

স্বস্তি চেদিচ্ছসে রাজন্কুলস্যাত্মন এব চ
বধ্যতামেষ দুষ্টাত্মা মন্দো রাজা সুয়োধনঃ

কর্ণশ্চ শকুনিশ্চৈব মৈনং পশ্যতু কর্হিচিৎ
দ্যূতসংপাতমপ্যেষামপ্রমত্তো নিবারয়

অভিষেচয় রাজানং ধর্মাত্মানং যুধিষ্ঠিরম্
স পালয়িষ্যতি বশী ধর্মেণ পৃথিবীমিমাম্

অথ নেচ্ছসি রাজানং কুন্তীপুত্রং যুধিষ্ঠিরম্
মেঢীভূতঃ স্বয়ং রাজ্যং প্রতিগৃহ্ণীষ্ব পার্থিব

সমং সর্বেষু ভূতেষু বর্তমানং নরাধিপ
অনুজীবন্তু সর্বে ত্বাং জ্ঞাতয়ো জ্ঞাতিবর্ধন

এবং ব্রুবতি কৌন্তেয় বিদুরে দীর্ঘদর্শিনি
দুর্যোধনমহং পাপমন্ববর্তং বৃথামতিঃ

অশ্রুত্বা হ্যস্য বীরস্য বাক্যানি মধুরাণ্যহম্
ফলং প্রাপ্য মহদ্দুঃখং নিমগ্নঃ শোকসাগরে

বৃদ্ধৌ হি তে স্বঃ পিতরৌ পশ্যাবাং দুঃখিতৌ নৃপ
ন শোচিতব্যং ভবতা পশ্যামীহ জনাধিপ