অধ্যায় 38

38.1

ব্রহ্মোবাচ
অতঃ পরং প্রবক্ষ্যামি তৃতীয়ং গুণমুত্তমম্
সর্বভূতহিতং লোকে সতাং ধর্মমনিন্দিতম্

আনন্দঃ প্রীতিরুদ্রেকঃ প্রাকাশ্যং সুখমেব চ
অকার্পণ্যমসংরম্ভঃ সংতোষঃ শ্রদ্দধানতা

ক্ষমা ধৃতিরহিংসা চ সমতা সত্যমার্জবম্
অক্রোধশ্চানসূয়া চ শৌচং দাক্ষ্যং পরাক্রমঃ

মুধা জ্ঞানং মুধা বৃত্তং মুধা সেবা মুধা শ্রমঃ
এবং যো যুক্তধর্মঃ স্যাত্সোঽমুত্রানন্ত্যমশ্নুতে

নির্মমো নিরহংকারো নিরাশীঃ সর্বতঃ সমঃ
অকামহত ইত্যেষ সতাং ধর্মঃ সনাতনঃ

বিশ্রম্ভো হ্রীস্তিতিক্ষা চ ত্যাগঃ শৌচমতন্দ্রিতা
আনৃশংস্যমসংমোহো দয়া ভূতেষ্বপৈশুনম্

হর্ষস্তুষ্টির্বিস্ময়শ্চ বিনয়ঃ সাধুবৃত্ততা
শান্তিকর্ম বিশুদ্ধিশ্চ শুভা বুদ্ধির্বিমোচনম্

উপেক্ষা ব্রহ্মচর্যং চ পরিত্যাগশ্চ সর্বশঃ
নির্মমত্বমনাশীস্ত্বমপরিক্রীতধর্মতা

মুধা দানং মুধা যজ্ঞো মুধাধীতং মুধা ব্রতম্
মুধা প্রতিগ্রহশ্চৈব মুধা ধর্মো মুধা তপঃ

এবংবৃত্তাস্তু যে কেচিল্লোকেঽস্মিন্সত্ত্বসংশ্রয়াঃ
ব্রাহ্মণা ব্রহ্ময়োনিস্থাস্তে ধীরাঃ সাধুদর্শিনঃ

হিত্বা সর্বাণি পাপানি নিঃশোকা হ্যজরামরাঃ
দিবং প্রাপ্য তু তে ধীরাঃ কুর্বতে বৈ ততস্ততঃ

ঈশিত্বং চ বশিত্বং চ লঘুত্বং মনসশ্চ তে
বিকুর্বতে মহাত্মানো দেবাস্ত্রিদিবগা ইব

ঊর্ধ্বস্রোতস ইত্যেতে দেবা বৈকারিকাঃ স্মৃতাঃ
বিকুর্বতে প্রকৃত্যা বৈ দিবং প্রাপ্তাস্ততস্ততঃ
যদ্যদিচ্ছন্তি তত্সর্বং ভজন্তে বিভজন্তি চ

ইত্যেতত্সাত্ত্বিকং বৃত্তং কথিতং বো দ্বিজর্ষভাঃ
এতদ্বিজ্ঞায় বিধিবল্লভতে যদ্যদিচ্ছতি

প্রকীর্তিতাঃ সত্ত্বগুণা বিশেষতো; যথাবদুক্তং গুণবৃত্তমেব চ
নরস্তু যো বেদ গুণানিমান্সদা; গুণান্স ভুঙ্ক্তে ন গুণৈঃ স ভুজ্যতে