Utshovঅধ্যায় 39
39.1
ব্রহ্মোবাচ
নৈব শক্যা গুণা বক্তুং পৃথক্ত্বেনেহ সর্বশঃ
অবিচ্ছিন্নানি দৃশ্যন্তে রজঃ সত্ত্বং তমস্তথা
39.2
অন্যোন্যমনুষজ্জন্তে অন্যোন্যং চানুজীবিনঃ
অন্যোন্যাপাশ্রয়াঃ সর্বে তথান্যোন্যানুবর্তিনঃ
39.3
যাবত্সত্ত্বং তমস্তাবদ্বর্ততে নাত্র সংশয়ঃ
যাবত্তমশ্চ সত্ত্বং চ রজস্তাবদিহোচ্যতে
39.4
সংহত্য কুর্বতে যাত্রাং সহিতাঃ সংঘচারিণঃ
সংঘাতবৃত্তয়ো হ্যেতে বর্তন্তে হেত্বহেতুভিঃ
39.5
উদ্রেকব্যতিরেকাণাং তেষামন্যোন্যবর্তিনাম্
বর্ততে তদ্যথান্যূনং ব্যতিরিক্তং চ সর্বশঃ
39.6
ব্যতিরিক্তং তমো যত্র তির্যগ্ভাবগতং ভবেৎ
অল্পং তত্র রজো জ্ঞেয়ং সত্ত্বং চাল্পতরং ততঃ
39.7
উদ্রিক্তং চ রজো যত্র মধ্যস্রোতোগতং ভবেৎ
অল্পং তত্র তমো জ্ঞেয়ং সত্ত্বং চাল্পতরং ততঃ
39.8
উদ্রিক্তং চ যদা সত্ত্বমূর্ধ্বস্রোতোগতং ভবেৎ
অল্পং তত্র রজো জ্ঞেয়ং তমশ্চাল্পতরং ততঃ
39.9
সত্ত্বং বৈকারিকং যোনিরিন্দ্রিয়াণাং প্রকাশিকা
ন হি সত্ত্বাত্পরো ভাবঃ কশ্চিদন্যো বিধীয়তে
39.10
ঊর্ধ্বং গচ্ছন্তি সত্ত্বস্থা মধ্যে তিষ্ঠন্তি রাজসাঃ
জঘন্যগুণসংয়ুক্তা যান্ত্যধস্তামসা জনাঃ
39.11
তমঃ শূদ্রে রজঃ ক্ষত্রে ব্রাহ্মণে সত্ত্বমুত্তমম্
ইত্যেবং ত্রিষু বর্ণেষু বিবর্তন্তে গুণাস্ত্রয়ঃ
39.12
দূরাদপি হি দৃশ্যন্তে সহিতাঃ সংঘচারিণঃ
তমঃ সত্ত্বং রজশ্চৈব পৃথক্ত্বং নানুশুশ্রুম
39.13
দৃষ্ট্বা চাদিত্যমুদ্যন্তং কুচোরাণাং ভয়ং ভবেৎ
অধ্বগাঃ পরিতপ্যেরংস্তৃষ্ণার্তা দুঃখভাগিনঃ
39.14
আদিত্যঃ সত্ত্বমুদ্দিষ্টং কুচোরাস্তু যথা তমঃ
পরিতাপোঽধ্বগানাং চ রাজসো গুণ উচ্যতে
39.15
প্রাকাশ্যং সত্ত্বমাদিত্যে সংতাপো রাজসো গুণঃ
উপপ্লবস্তু বিজ্ঞেয়স্তামসস্তস্য পর্বসু
39.16
এবং জ্যোতিঃষু সর্বেষু বিবর্তন্তে গুণাস্ত্রয়ঃ
পর্যায়েণ চ বর্তন্তে তত্র তত্র তথা তথা
39.17
স্থাবরেষু চ ভূতেষু তির্যগ্ভাবগতং তমঃ
রাজসাস্তু বিবর্তন্তে স্নেহভাবস্তু সাত্ত্বিকঃ
39.18
অহস্ত্রিধা তু বিজ্ঞেয়ং ত্রিধা রাত্রির্বিধীয়তে
মাসার্ধমাসবর্ষাণি ঋতবঃ সংধয়স্তথা
39.19
ত্রিধা দানানি দীয়ন্তে ত্রিধা যজ্ঞঃ প্রবর্ততে
ত্রিধা লোকাস্ত্রিধা বেদাস্ত্রিধা বিদ্যাস্ত্রিধা গতিঃ
39.20
ভূতং ভব্যং ভবিষ্যচ্চ ধর্মোঽর্থঃ কাম ইত্যপি
প্রাণাপানাবুদানশ্চাপ্যেত এব ত্রয়ো গুণাঃ
39.21
যত্কিংচিদিহ বৈ লোকে সর্বমেষ্বেব তত্ত্রিষু
ত্রয়ো গুণাঃ প্রবর্তন্তে অব্যক্তা নিত্যমেব তু
সত্ত্বং রজস্তমশ্চৈব গুণসর্গঃ সনাতনঃ
39.22
তমোঽব্যক্তং শিবং নিত্যমজং যোনিঃ সনাতনঃ
প্রকৃতির্বিকারঃ প্রলয়ঃ প্রধানং প্রভবাপ্যয়ৌ
39.23
অনুদ্রিক্তমনূনং চ হ্যকম্পমচলং ধ্রুবম্
সদসচ্চৈব তত্সর্বমব্যক্তং ত্রিগুণং স্মৃতম্
জ্ঞেয়ানি নামধেয়ানি নরৈরধ্যাত্মচিন্তকৈঃ
39.24
অব্যক্তনামানি গুণাংশ্চ তত্ত্বতো; যো বেদ সর্বাণি গতীশ্চ কেবলাঃ
বিমুক্তদেহঃ প্রবিভাগতত্ত্ববি;ত্স মুচ্যতে সর্বগুণৈর্নিরাময়ঃ