অধ্যায় 37

37.1

ব্রহ্মোবাচ
রজোঽহং বঃ প্রবক্ষ্যামি যাথাতথ্যেন সত্তমাঃ
নিবোধত মহাভাগা গুণবৃত্তং চ সর্বশঃ

সংঘাতো রূপমায়াসঃ সুখদুঃখে হিমাতপৌ
ঐশ্বর্যং বিগ্রহঃ সংধির্হেতুবাদোঽরতিঃ ক্ষমা

বলং শৌর্যং মদো রোষো ব্যায়ামকলহাবপি
ঈর্ষ্যেপ্সা পৈশুনং যুদ্ধং মমত্বং পরিপালনম্

বধবন্ধপরিক্লেশাঃ ক্রয়ো বিক্রয় এব চ
নিকৃন্ত ছিন্ধি ভিন্ধীতি পরমর্মাবকর্তনম্

উগ্রং দারুণমাক্রোশঃ পরবিত্তানুশাসনম্
লোকচিন্তা বিচিন্তা চ মত্সরঃ পরিভাষণম্

মৃষাবাদো মৃষাদানং বিকল্পঃ পরিভাষণম্
নিন্দা স্তুতিঃ প্রশংসা চ প্রতাপঃ পরিতর্পণম্

পরিচর্যা চ শুশ্রূষা সেবা তৃষ্ণা ব্যপাশ্রয়ঃ
ব্যূহোঽনয়ঃ প্রমাদশ্চ পরিতাপঃ পরিগ্রহঃ

সংস্কারা যে চ লোকেঽস্মিন্প্রবর্তন্তে পৃথক্পৃথক্
নৃষু নারীষু ভূতেষু দ্রব্যেষু শরণেষু চ

সংতাপোঽপ্রত্যয়শ্চৈব ব্রতানি নিয়মাশ্চ যে
প্রদানমাশীর্যুক্তং চ সততং মে ভবত্বিতি

স্বধাকারো নমস্কারঃ স্বাহাকারো বষট্ক্রিয়া
যাজনাধ্যাপনে চোভে তথৈবাহুঃ পরিগ্রহম্

ইদং মে স্যাদিদং মে স্যাত্স্নেহো গুণসমুদ্ভবঃ
অভিদ্রোহস্তথা মায়া নিকৃতির্মান এব চ

স্তৈন্যং হিংসা পরীবাদঃ পরিতাপঃ প্রজাগরঃ
স্তম্ভো দম্ভোঽথ রাগশ্চ ভক্তিঃ প্রীতিঃ প্রমোদনম্

দ্যূতং চ জনবাদশ্চ সংবন্ধাঃ স্ত্রীকৃতাশ্চ যে
নৃত্তবাদিত্রগীতানি প্রসঙ্গা যে চ কেচন
সর্ব এতে গুণা বিপ্রা রাজসাঃ সংপ্রকীর্তিতাঃ

ভূতভব্যভবিষ্যাণাং ভাবানাং ভুবি ভাবনাঃ
ত্রিবর্গনিরতা নিত্যং ধর্মোঽর্থঃ কাম ইত্যপি

কামবৃত্তাঃ প্রমোদন্তে সর্বকামসমৃদ্ধিভিঃ
অর্বাক্স্রোতস ইত্যেতে তৈজসা রজসাবৃতাঃ

অস্মিঁল্লোকে প্রমোদন্তে জায়মানাঃ পুনঃ পুনঃ
প্রেত্যভাবিকমীহন্ত ইহ লৌকিকমেব চ
দদতি প্রতিগৃহ্ণন্তি জপন্ত্যথ চ জুহ্বতি

রজোগুণা বো বহুধানুকীর্তিতা; যথাবদুক্তং গুণবৃত্তমেব চ
নরো হি যো বেদ গুণানিমান্সদা; স রাজসৈঃ সর্বগুণৈর্বিমুচ্যতে