Utshovঅধ্যায় 36
36.1
ব্রহ্মোবাচ
তদব্যক্তমনুদ্রিক্তং সর্বব্যাপি ধ্রুবং স্থিরম্
নবদ্বারং পুরং বিদ্যাত্ত্রিগুণং পঞ্চধাতুকম্
36.2
একাদশপরিক্ষেপং মনো ব্যাকরণাত্মকম্
বুদ্ধিস্বামিকমিত্যেতত্পরমেকাদশং ভবেৎ
36.3
ত্রীণি স্রোতাংসি যান্যস্মিন্নাপ্যায়ন্তে পুনঃ পুনঃ
প্রণাড্যস্তিস্র এবৈতাঃ প্রবর্তন্তে গুণাত্মিকাঃ
36.4
তমো রজস্তথা সত্ত্বং গুণানেতান্প্রচক্ষতে
অন্যোন্যমিথুনাঃ সর্বে তথান্যোন্যানুজীবিনঃ
36.5
অন্যোন্যাপাশ্রয়াশ্চৈব তথান্যোন্যানুবর্তিনঃ
অন্যোন্যব্যতিষক্তাশ্চ ত্রিগুণাঃ পঞ্চ ধাতবঃ
36.6
তমসো মিথুনং সত্ত্বং সত্ত্বস্য মিথুনং রজঃ
রজসশ্চাপি সত্ত্বং স্যাত্সত্ত্বস্য মিথুনং তমঃ
36.7
নিয়ম্যতে তমো যত্র রজস্তত্র প্রবর্ততে
নিয়ম্যতে রজো যত্র সত্ত্বং তত্র প্রবর্ততে
36.8
নৈশাত্মকং তমো বিদ্যাত্ত্রিগুণং মোহসংজ্ঞিতম্
অধর্মলক্ষণং চৈব নিয়তং পাপকর্মসু
36.9
প্রবৃত্ত্যাত্মকমেবাহূ রজঃ পর্যায়কারকম্
প্রবৃত্তং সর্বভূতেষু দৃশ্যতোত্পত্তিলক্ষণম্
36.10
প্রকাশং সর্বভূতেষু লাঘবং শ্রদ্দধানতা
সাত্ত্বিকং রূপমেবং তু লাঘবং সাধুসংমিতম্
36.11
এতেষাং গুণতত্ত্বং হি বক্ষ্যতে হেত্বহেতুভিঃ
সমাসব্যাসয়ুক্তানি তত্ত্বতস্তানি বিত্ত মে
36.12
সংমোহোঽজ্ঞানমত্যাগঃ কর্মণামবিনির্ণয়ঃ
স্বপ্নঃ স্তম্ভো ভয়ং লোভঃ শোকঃ সুকৃতদূষণম্
36.13
অস্মৃতিশ্চাবিপাকশ্চ নাস্তিক্যং ভিন্নবৃত্তিতা
নির্বিশেষত্বমন্ধত্বং জঘন্যগুণবৃত্তিতা
36.14
অকৃতে কৃতমানিত্বমজ্ঞানে জ্ঞানমানিতা
অমৈত্রী বিকৃতো ভাবো অশ্রদ্ধা মূঢভাবনা
36.15
অনার্জবমসংজ্ঞত্বং কর্ম পাপমচেতনা
গুরুত্বং সন্নভাবত্বমসিতত্বমবাগ্গতিঃ
36.16
সর্ব এতে গুণা বিপ্রাস্তামসাঃ সংপ্রকীর্তিতাঃ
যে চান্যে নিয়তা ভাবা লোকেঽস্মিন্মোহসংজ্ঞিতাঃ
36.17
তত্র তত্র নিয়ম্যন্তে সর্বে তে তামসা গুণাঃ
পরিবাদকথা নিত্যং দেবব্রাহ্মণবৈদিকাঃ
36.18
অত্যাগশ্চাভিমানশ্চ মোহো মন্যুস্তথাক্ষমা
মত্সরশ্চৈব ভূতেষু তামসং বৃত্তমিষ্যতে
36.19
বৃথারম্ভাশ্চ যে কেচিদ্বৃথাদানানি যানি চ
বৃথাভক্ষণমিত্যেতত্তামসং বৃত্তমিষ্যতে
36.20
অতিবাদোঽতিতিক্ষা চ মাত্সর্যমতিমানিতা
অশ্রদ্দধানতা চৈব তামসং বৃত্তমিষ্যতে
36.21
এবংবিধাস্তু যে কেচিল্লোকেঽস্মিন্পাপকর্মিণঃ
মনুষ্যা ভিন্নমর্যাদাঃ সর্বে তে তামসা জনাঃ
36.22
তেষাং যোনিং প্রবক্ষ্যামি নিয়তাং পাপকর্মণাম্
অবাঙ্নিরয়ভাবায় তির্যঙ্নিরয়গামিনঃ
36.23
স্থাবরাণি চ ভূতানি পশবো বাহনানি চ
ক্রব্যাদা দন্দশূকাশ্চ কৃমিকীটবিহংগমাঃ
36.24
অণ্ডজা জন্তবো যে চ সর্বে চাপি চতুষ্পদাঃ
উন্মত্তা বধিরা মূকা যে চান্যে পাপরোগিণঃ
36.25
মগ্নাস্তমসি দুর্বৃত্তাঃ স্বকর্মকৃতলক্ষণাঃ
অবাক্স্রোতস ইত্যেতে মগ্নাস্তমসি তামসাঃ
36.26
তেষামুত্কর্ষমুদ্রেকং বক্ষ্যাম্যহমতঃ পরম্
যথা তে সুকৃতাঁল্লোকাঁল্লভন্তে পুণ্যকর্মিণঃ
36.27
অন্যথা প্রতিপন্নাস্তু বিবৃদ্ধা যে চ কর্মসু
স্বকর্মনিরতানাং চ ব্রাহ্মণানাং শুভৈষিণাম্
36.28
সংস্কারেণোর্ধ্বমায়ান্তি যতমানাঃ সলোকতাম্
স্বর্গং গচ্ছন্তি দেবানামিত্যেষা বৈদিকী শ্রুতিঃ
36.29
অন্যথা প্রতিপন্নাস্তু বিবৃদ্ধাঃ স্বেষু কর্মসু
পুনরাবৃত্তিধর্মাণস্তে ভবন্তীহ মানুষাঃ
36.30
পাপয়োনিং সমাপন্নাশ্চণ্ডালা মূকচূচুকাঃ
বর্ণান্পর্যায়শশ্চাপি প্রাপ্নুবন্ত্যুত্তরোত্তরম্
36.31
শূদ্রয়োনিমতিক্রম্য যে চান্যে তামসা গুণাঃ
স্রোতোমধ্যে সমাগম্য বর্তন্তে তামসে গুণে
36.32
অভিষঙ্গস্তু কামেষু মহামোহ ইতি স্মৃতঃ
ঋষয়ো মুনয়ো দেবা মুহ্যন্ত্যত্র সুখেপ্সবঃ
36.33
তমো মোহো মহামোহস্তামিস্রঃ ক্রোধসংজ্ঞিতঃ
মরণং ত্বন্ধতামিস্রং তামিস্রং ক্রোধ উচ্যতে
36.34
ভাবতো গুণতশ্চৈব যোনিতশ্চৈব তত্ত্বতঃ
সর্বমেতত্তমো বিপ্রাঃ কীর্তিতং বো যথাবিধি
36.35
কো ন্বেতদ্বুধ্যতে সাধু কো ন্বেতত্সাধু পশ্যতি
অতত্ত্বে তত্ত্বদর্শী যস্তমসস্তত্ত্বলক্ষণম্
36.36
তমোগুণা বো বহুধা প্রকীর্তিতা; যথাবদুক্তং চ তমঃ পরাবরম্
নরো হি যো বেদ গুণানিমান্সদা; স তামসৈঃ সর্বগুণৈঃ প্রমুচ্যতে