Utshovঅধ্যায় 35
35.1
অর্জুন উবাচ
ব্রহ্ম যত্পরমং বেদ্যং তন্মে ব্যাখ্যাতুমর্হসি
ভবতো হি প্রসাদেন সূক্ষ্মে মে রমতে মতিঃ
35.2
বাসুদেব উবাচ
অত্রাপ্যুদাহরন্তীমমিতিহাসং পুরাতনম্
সংবাদং মোক্ষসংয়ুক্তং শিষ্যস্য গুরুণা সহ
35.3
কশ্চিদ্ব্রাহ্মণমাসীনমাচার্যং সংশিতব্রতম্
শিষ্যঃ পপ্রচ্ছ মেধাবী কিং স্বিচ্ছ্রেয়ঃ পরংতপ
35.4
ভগবন্তং প্রপন্নোঽহং নিঃশ্রেয়সপরায়ণঃ
যাচে ত্বাং শিরসা বিপ্র যদ্ব্রূয়াং তদ্বিচক্ষ্ব মে
35.5
তমেবংবাদিনং পার্থ শিষ্যং গুরুরুবাচ হ
কথয়স্ব প্রবক্ষ্যামি যত্র তে সংশয়ো দ্বিজ
35.6
ইত্যুক্তঃ স কুরুশ্রেষ্ঠ গুরুণা গুরুবত্সলঃ
প্রাঞ্জলিঃ পরিপপ্রচ্ছ যত্তচ্ছৃণু মহামতে
35.7
শিষ্য উবাচ
কুতশ্চাহং কুতশ্চ ত্বং তত্সত্যং ব্রূহি যত্পরম্
কুতো জাতানি ভূতানি স্থাবরাণি চরাণি চ
35.8
কেন জীবন্তি ভূতানি তেষামায়ুঃ কিমাত্মকম্
কিং সত্যং কিং তপো বিপ্র কে গুণাঃ সদ্ভিরীরিতাঃ
কে পন্থানঃ শিবাঃ সন্তি কিং সুখং কিং চ দুষ্কৃতম্
35.9
এতান্মে ভগবন্প্রশ্নান্যাথাতথ্যেন সত্তম
বক্তুমর্হসি বিপ্রর্ষে যথাবদিহ তত্ত্বতঃ
35.10
বাসুদেব উবাচ
তস্মৈ সংপ্রতিপন্নায় যথাবত্পরিপৃচ্ছতে
শিষ্যায় গুণয়ুক্তায় শান্তায় গুরুবর্তিনে
ছায়াভূতায় দান্তায় যতয়ে ব্রহ্মচারিণে
35.11
তান্প্রশ্নানব্রবীত্পার্থ মেধাবী স ধৃতব্রতঃ
গুরুঃ কুরুকুলশ্রেষ্ঠ সম্যক্সর্বানরিংদম
35.12
ব্রহ্মপ্রোক্তমিদং ধর্মমৃষিপ্রবরসেবিতম্
বেদবিদ্যাসমাবাপ্যং তত্ত্বভূতার্থভাবনম্
35.13
ভূতভব্যভবিষ্যাদিধর্মকামার্থনিশ্চয়ম্
সিদ্ধসংঘপরিজ্ঞাতং পুরাকল্পং সনাতনম্
35.14
প্রবক্ষ্যেঽহং মহাপ্রাজ্ঞ পদমুত্তমমদ্য তে
বুদ্ধ্বা যদিহ সংসিদ্ধা ভবন্তীহ মনীষিণঃ
35.15
উপগম্যর্ষয়ঃ পূর্বং জিজ্ঞাসন্তঃ পরস্পরম্
বৃহস্পতিভরদ্বাজৌ গৌতমো ভার্গবস্তথা
35.16
বসিষ্ঠঃ কাশ্যপশ্চৈব বিশ্বামিত্রোঽত্রিরেব চ
মার্গান্সর্বান্পরিক্রম্য পরিশ্রান্তাঃ স্বকর্মভিঃ
35.17
ঋষিমাঙ্গিরসং বৃদ্ধং পুরস্কৃত্য তু তে দ্বিজাঃ
দদৃশুর্ব্রহ্মভবনে ব্রহ্মাণং বীতকল্মষম্
35.18
তং প্রণম্য মহাত্মানং সুখাসীনং মহর্ষয়ঃ
পপ্রচ্ছুর্বিনয়োপেতা নিঃশ্রেয়সমিদং পরম্
35.19
কথং কর্ম ক্রিয়াত্সাধু কথং মুচ্যেত কিল্বিষাৎ
কে নো মার্গাঃ শিবাশ্চ স্যুঃ কিং সত্যং কিং চ দুষ্কৃতম্
35.20
কেনোভৌ কর্মপন্থানৌ মহত্ত্বং কেন বিন্দতি
প্রলয়ং চাপবর্গং চ ভূতানাং প্রভবাপ্যয়ৌ
35.21
ইত্যুক্তঃ স মুনিশ্রেষ্ঠৈর্যদাহ প্রপিতামহঃ
তত্তেঽহং সংপ্রবক্ষ্যামি শৃণু শিষ্য যথাগমম্
35.22
ব্রহ্মোবাচ
সত্যাদ্ভূতানি জাতানি স্থাবরাণি চরাণি চ
তপসা তানি জীবন্তি ইতি তদ্বিত্ত সুব্রতাঃ
35.23
স্বাং যোনিং পুনরাগম্য বর্তন্তে স্বেন কর্মণা
সত্যং হি গুণসংয়ুক্তং নিয়তং পঞ্চলক্ষণম্
35.24
ব্রহ্ম সত্যং তপঃ সত্যং সত্যং চৈব প্রজাপতিঃ
সত্যাদ্ভূতানি জাতানি ভূতং সত্যময়ং মহৎ
35.25
তস্মাত্সত্যাশ্রয়া বিপ্রা নিত্যং যোগপরায়ণাঃ
অতীতক্রোধসংতাপা নিয়তা ধর্মসেতবঃ
35.26
অন্যোন্যনিয়তান্বৈদ্যান্ধর্মসেতুপ্রবর্তকান্
তানহং সংপ্রবক্ষ্যামি শাশ্বতান্লোকভাবনান্
35.27
চাতুর্বিদ্যং তথা বর্ণাংশ্চতুরশ্চাশ্রমান্পৃথক্
ধর্মমেকং চতুষ্পাদং নিত্যমাহুর্মনীষিণঃ
35.28
পন্থানং বঃ প্রবক্ষ্যামি শিবং ক্ষেমকরং দ্বিজাঃ
নিয়তং ব্রহ্মভাবায় যাতং পূর্বং মনীষিভিঃ
35.29
গদতস্তং মমাদ্যেহ পন্থানং দুর্বিদং পরম্
নিবোধত মহাভাগা নিখিলেন পরং পদম্
35.30
ব্রহ্মচারিকমেবাহুরাশ্রমং প্রথমং পদম্
গার্হস্থ্যং তু দ্বিতীয়ং স্যাদ্বানপ্রস্থমতঃ পরম্
ততঃ পরং তু বিজ্ঞেয়মধ্যাত্মং পরমং পদম্
35.31
জ্যোতিরাকাশমাদিত্যো বায়ুরিন্দ্রঃ প্রজাপতিঃ
নোপৈতি যাবদধ্যাত্মং তাবদেতান্ন পশ্যতি
তস্যোপায়ং প্রবক্ষ্যামি পুরস্তাত্তং নিবোধত
35.32
ফলমূলানিলভুজাং মুনীনাং বসতাং বনে
বানপ্রস্থং দ্বিজাতীনাং ত্রয়াণামুপদিশ্যতে
35.33
সর্বেষামেব বর্ণানাং গার্হস্থ্যং তদ্বিধীয়তে
শ্রদ্ধালক্ষণমিত্যেবং ধর্মং ধীরাঃ প্রচক্ষতে
35.34
ইত্যেতে দেবয়ানা বঃ পন্থানঃ পরিকীর্তিতাঃ
সদ্ভিরধ্যাসিতা ধীরৈঃ কর্মভির্ধর্মসেতবঃ
35.35
এতেষাং পৃথগধ্যাস্তে যো ধর্মং সংশিতব্রতঃ
কালাত্পশ্যতি ভূতানাং সদৈব প্রভবাপ্যয়ৌ
35.36
অতস্তত্ত্বানি বক্ষ্যামি যাথাতথ্যেন হেতুনা
বিষয়স্থানি সর্বাণি বর্তমানানি ভাগশঃ
35.37
মহানাত্মা তথাব্যক্তমহংকারস্তথৈব চ
ইন্দ্রিয়াণি দশৈকং চ মহাভূতানি পঞ্চ চ
35.38
বিশেষাঃ পঞ্চভূতানামিত্যেষা বৈদিকী শ্রুতিঃ
চতুর্বিংশতিরেষা বস্তত্ত্বানাং সংপ্রকীর্তিতা
35.39
তত্ত্বানামথ যো বেদ সর্বেষাং প্রভবাপ্যয়ৌ
স ধীরঃ সর্বভূতেষু ন মোহমধিগচ্ছতি
35.40
তত্ত্বানি যো বেদয়তে যথাতথং; গুণাংশ্চ সর্বানখিলাশ্চ দেবতাঃ
বিধূতপাপ্মা প্রবিমুচ্য বন্ধনং; স সর্বলোকানমলান্সমশ্নুতে