UtshovChapter 35
35.1
अर्जुन उवाच
ब्रह्म यत्परमं वेद्यं तन्मे व्याख्यातुमर्हसि
भवतो हि प्रसादेन सूक्ष्मे मे रमते मतिः
Arjuna uvacha
Brahma yatparamam vedyam tanme vyakhyatumarhasi
Bhavato hi prasadena sukshme me ramate matih
35.2
वासुदेव उवाच
अत्राप्युदाहरन्तीममितिहासं पुरातनम्
संवादं मोक्षसंयुक्तं शिष्यस्य गुरुणा सह
Vasudeva uvacha
Atrapyudaharantimamitihasam puratanam
Sanvadam mokshasanyuktam shishyasya guruna saha
35.3
कश्चिद्ब्राह्मणमासीनमाचार्यं संशितव्रतम्
शिष्यः पप्रच्छ मेधावी किं स्विच्छ्रेयः परंतप
Kashchidbrahmanamasinamacharyam sanshitavratam
Shishyah paprachchha medhavi kim svichchhreyah parantapa
35.4
भगवन्तं प्रपन्नोऽहं निःश्रेयसपरायणः
याचे त्वां शिरसा विप्र यद्ब्रूयां तद्विचक्ष्व मे
Bhagavantam prapannoham nihshreyasaparayanah
Yache tvam shirasa vipra yadbruyam tadvichakshva me
35.5
तमेवंवादिनं पार्थ शिष्यं गुरुरुवाच ह
कथयस्व प्रवक्ष्यामि यत्र ते संशयो द्विज
Tamevanvadinam partha shishyam gururuvacha ha
Kathayasva pravakshyami yatra te sanshayo dvija
35.6
इत्युक्तः स कुरुश्रेष्ठ गुरुणा गुरुवत्सलः
प्राञ्जलिः परिपप्रच्छ यत्तच्छृणु महामते
Ityuktah sa kurushreshtha guruna guruvatsalah
Pranjalih paripaprachchha yattachchhrinu mahamate
35.7
शिष्य उवाच
कुतश्चाहं कुतश्च त्वं तत्सत्यं ब्रूहि यत्परम्
कुतो जातानि भूतानि स्थावराणि चराणि च
Shishya uvacha
Kutashchaham kutashcha tvam tatsatyam bruhi yatparam
Kuto jatani bhutani sthavarani charani cha
35.8
केन जीवन्ति भूतानि तेषामायुः किमात्मकम्
किं सत्यं किं तपो विप्र के गुणाः सद्भिरीरिताः
के पन्थानः शिवाः सन्ति किं सुखं किं च दुष्कृतम्
Kena jivanti bhutani teshamayuh kimatmakam
Kim satyam kim tapo vipra ke gunah sadbhiriritah
Ke panthanah shivah santi kim sukham kim cha dushkritam
35.9
एतान्मे भगवन्प्रश्नान्याथातथ्येन सत्तम
वक्तुमर्हसि विप्रर्षे यथावदिह तत्त्वतः
Etanme bhagavanprashnanyathatathyena sattama
Vaktumarhasi viprarshe yathavadiha tattvatah
35.10
वासुदेव उवाच
तस्मै संप्रतिपन्नाय यथावत्परिपृच्छते
शिष्याय गुणयुक्ताय शान्ताय गुरुवर्तिने
छायाभूताय दान्ताय यतये ब्रह्मचारिणे
Vasudeva uvacha
Tasmai sampratipannaya yathavatpariprichchhate
Shishyaya gunayuktaya shantaya guruvartine
Chhayabhutaya dantaya yataye brahmacharine
35.11
तान्प्रश्नानब्रवीत्पार्थ मेधावी स धृतव्रतः
गुरुः कुरुकुलश्रेष्ठ सम्यक्सर्वानरिंदम
Tanprashnanabravitpartha medhavi sa dhritavratah
Guruh kurukulashreshtha samyaksarvanarindama
35.12
ब्रह्मप्रोक्तमिदं धर्ममृषिप्रवरसेवितम्
वेदविद्यासमावाप्यं तत्त्वभूतार्थभावनम्
Brahmaproktamidam dharmamrishipravarasevitam
Vedavidyasamavapyam tattvabhutarthabhavanam
35.13
भूतभव्यभविष्यादिधर्मकामार्थनिश्चयम्
सिद्धसंघपरिज्ञातं पुराकल्पं सनातनम्
Bhutabhavyabhavishyadidharmakamarthanishchayam
Siddhasanghaparigyatam purakalpam sanatanam
35.14
प्रवक्ष्येऽहं महाप्राज्ञ पदमुत्तममद्य ते
बुद्ध्वा यदिह संसिद्धा भवन्तीह मनीषिणः
Pravakshyeham mahapragya padamuttamamadya te
Buddhva yadiha sansiddha bhavantiha manishinah
35.15
उपगम्यर्षयः पूर्वं जिज्ञासन्तः परस्परम्
बृहस्पतिभरद्वाजौ गौतमो भार्गवस्तथा
Upagamyarshayah purvam jigyasantah parasparam
Brihaspatibharadvajau gautamo bhargavastatha
35.16
वसिष्ठः काश्यपश्चैव विश्वामित्रोऽत्रिरेव च
मार्गान्सर्वान्परिक्रम्य परिश्रान्ताः स्वकर्मभिः
Vasishthah kashyapashchaiva vishvamitrotrireva cha
Margansarvanparikramya parishrantah svakarmabhih
35.17
ऋषिमाङ्गिरसं वृद्धं पुरस्कृत्य तु ते द्विजाः
ददृशुर्ब्रह्मभवने ब्रह्माणं वीतकल्मषम्
Rishimangirasam vriddham puraskritya tu te dvijah
Dadrishurbrahmabhavane brahmanam vitakalmasham
35.18
तं प्रणम्य महात्मानं सुखासीनं महर्षयः
पप्रच्छुर्विनयोपेता निःश्रेयसमिदं परम्
Tam pranamya mahatmanam sukhasinam maharshayah
Paprachchhurvinayopeta nihshreyasamidam param
35.19
कथं कर्म क्रियात्साधु कथं मुच्येत किल्बिषात्
के नो मार्गाः शिवाश्च स्युः किं सत्यं किं च दुष्कृतम्
Katham karma kriyatsadhu katham muchyeta kilbishat
Ke no margah shivashcha syuh kim satyam kim cha dushkritam
35.20
केनोभौ कर्मपन्थानौ महत्त्वं केन विन्दति
प्रलयं चापवर्गं च भूतानां प्रभवाप्ययौ
Kenobhau karmapanthanau mahattvam kena vindati
Pralayam chapavargam cha bhutanam prabhavapyayau
35.21
इत्युक्तः स मुनिश्रेष्ठैर्यदाह प्रपितामहः
तत्तेऽहं संप्रवक्ष्यामि शृणु शिष्य यथागमम्
Ityuktah sa munishreshthairyadaha prapitamahah
Tatteham sampravakshyami shrinu shishya yathagamam
35.22
ब्रह्मोवाच
सत्याद्भूतानि जातानि स्थावराणि चराणि च
तपसा तानि जीवन्ति इति तद्वित्त सुव्रताः
Brahmovacha
Satyadbhutani jatani sthavarani charani cha
Tapasa tani jivanti iti tadvitta suvratah
35.23
स्वां योनिं पुनरागम्य वर्तन्ते स्वेन कर्मणा
सत्यं हि गुणसंयुक्तं नियतं पञ्चलक्षणम्
Svam yonim punaragamya vartante svena karmana
Satyam hi gunasanyuktam niyatam panchalakshanam
35.24
ब्रह्म सत्यं तपः सत्यं सत्यं चैव प्रजापतिः
सत्याद्भूतानि जातानि भूतं सत्यमयं महत्
Brahma satyam tapah satyam satyam chaiva prajapatih
Satyadbhutani jatani bhutam satyamayam mahat
35.25
तस्मात्सत्याश्रया विप्रा नित्यं योगपरायणाः
अतीतक्रोधसंतापा नियता धर्मसेतवः
Tasmatsatyashraya vipra nityam yogaparayanah
Atitakrodhasantapa niyata dharmasetavah
35.26
अन्योन्यनियतान्वैद्यान्धर्मसेतुप्रवर्तकान्
तानहं संप्रवक्ष्यामि शाश्वतान्लोकभावनान्
Anyonyaniyatanvaidyandharmasetupravartakan
Tanaham sampravakshyami shashvatanlokabhavanan
35.27
चातुर्विद्यं तथा वर्णांश्चतुरश्चाश्रमान्पृथक्
धर्ममेकं चतुष्पादं नित्यमाहुर्मनीषिणः
Chaturvidyam tatha varnanshchaturashchashramanprithak
Dharmamekam chatushpadam nityamahurmanishinah
35.28
पन्थानं वः प्रवक्ष्यामि शिवं क्षेमकरं द्विजाः
नियतं ब्रह्मभावाय यातं पूर्वं मनीषिभिः
Panthanam vah pravakshyami shivam kshemakaram dvijah
Niyatam brahmabhavaya yatam purvam manishibhih
35.29
गदतस्तं ममाद्येह पन्थानं दुर्विदं परम्
निबोधत महाभागा निखिलेन परं पदम्
Gadatastam mamadyeha panthanam durvidam param
Nibodhata mahabhaga nikhilena param padam
35.30
ब्रह्मचारिकमेवाहुराश्रमं प्रथमं पदम्
गार्हस्थ्यं तु द्वितीयं स्याद्वानप्रस्थमतः परम्
ततः परं तु विज्ञेयमध्यात्मं परमं पदम्
Brahmacharikamevahurashramam prathamam padam
Garhasthyam tu dvitiyam syadvanaprasthamatah param
Tatah param tu vigyeyamadhyatmam paramam padam
35.31
ज्योतिराकाशमादित्यो वायुरिन्द्रः प्रजापतिः
नोपैति यावदध्यात्मं तावदेतान्न पश्यति
तस्योपायं प्रवक्ष्यामि पुरस्तात्तं निबोधत
Jyotirakashamadityo vayurindrah prajapatih
Nopaiti yavadadhyatmam tavadetanna pashyati
Tasyopayam pravakshyami purastattam nibodhata
35.32
फलमूलानिलभुजां मुनीनां वसतां वने
वानप्रस्थं द्विजातीनां त्रयाणामुपदिश्यते
Phalamulanilabhujam muninam vasatam vane
Vanaprastham dvijatinam trayanamupadishyate
35.33
सर्वेषामेव वर्णानां गार्हस्थ्यं तद्विधीयते
श्रद्धालक्षणमित्येवं धर्मं धीराः प्रचक्षते
Sarveshameva varnanam garhasthyam tadvidhiyate
Shraddhalakshanamityevam dharmam dhirah prachakshate
35.34
इत्येते देवयाना वः पन्थानः परिकीर्तिताः
सद्भिरध्यासिता धीरैः कर्मभिर्धर्मसेतवः
Ityete devayana vah panthanah parikirtitah
Sadbhiradhyasita dhiraih karmabhirdharmasetavah
35.35
एतेषां पृथगध्यास्ते यो धर्मं संशितव्रतः
कालात्पश्यति भूतानां सदैव प्रभवाप्ययौ
Etesham prithagadhyaste yo dharmam sanshitavratah
Kalatpashyati bhutanam sadaiva prabhavapyayau
35.36
अतस्तत्त्वानि वक्ष्यामि याथातथ्येन हेतुना
विषयस्थानि सर्वाणि वर्तमानानि भागशः
Atastattvani vakshyami yathatathyena hetuna
Vishayasthani sarvani vartamanani bhagashah
35.37
महानात्मा तथाव्यक्तमहंकारस्तथैव च
इन्द्रियाणि दशैकं च महाभूतानि पञ्च च
Mahanatma tathavyaktamahankarastathaiva cha
Indriyani dashaikam cha mahabhutani pancha cha
35.38
विशेषाः पञ्चभूतानामित्येषा वैदिकी श्रुतिः
चतुर्विंशतिरेषा वस्तत्त्वानां संप्रकीर्तिता
Visheshah panchabhutanamityesha vaidiki shrutih
Chaturvinshatiresha vastattvanam samprakirtita
35.39
तत्त्वानामथ यो वेद सर्वेषां प्रभवाप्ययौ
स धीरः सर्वभूतेषु न मोहमधिगच्छति
Tattvanamatha yo veda sarvesham prabhavapyayau
Sa dhirah sarvabhuteshu na mohamadhigachchhati
35.40
तत्त्वानि यो वेदयते यथातथं; गुणांश्च सर्वानखिलाश्च देवताः
विधूतपाप्मा प्रविमुच्य बन्धनं; स सर्वलोकानमलान्समश्नुते
Tattvani yo vedayate yathatatham; gunanshcha sarvanakhilashcha devatah
Vidhutapapma pravimuchya bandhanam; sa sarvalokanamalansamashnute