অধ্যায় 34

34.1

ব্রাহ্মণ্যুবাচ
নেদমল্পাত্মনা শক্যং বেদিতুং নাকৃতাত্মনা
বহু চাল্পং চ সংক্ষিপ্তং বিপ্লুতং চ মতং মম

উপায়ং তু মম ব্রূহি যেনৈষা লভ্যতে মতিঃ
তন্মন্যে কারণতমং যত এষা প্রবর্ততে

ব্রাহ্মণ উবাচ
অরণীং ব্রাহ্মণীং বিদ্ধি গুরুরস্যোত্তরারণিঃ
তপঃশ্রুতেঽভিমথ্নীতো জ্ঞানাগ্নির্জায়তে ততঃ

ব্রাহ্মণ্যুবাচ
যদিদং ব্রহ্মণো লিঙ্গং ক্ষেত্রজ্ঞমিতি সংজ্ঞিতম্
গ্রহীতুং যেন তচ্ছক্যং লক্ষণং তস্য তত্ক্ব নু

ব্রাহ্মণ উবাচ
অলিঙ্গো নির্গুণশ্চৈব কারণং নাস্য বিদ্যতে
উপায়মেব বক্ষ্যামি যেন গৃহ্যেত বা ন বা

সম্যগপ্যুপদিষ্টশ্চ ভ্রমরৈরিব লক্ষ্যতে
কর্মবুদ্ধিরবুদ্ধিত্বাজ্জ্ঞানলিঙ্গৈরিবাশ্রিতম্

ইদং কার্যমিদং নেতি ন মোক্ষেষূপদিশ্যতে
পশ্যতঃ শৃণ্বতো বুদ্ধিরাত্মনো যেষু জায়তে

যাবন্ত ইহ শক্যেরংস্তাবতোংঽশান্প্রকল্পয়েৎ
ব্যক্তানব্যক্তরূপাংশ্চ শতশোঽথ সহস্রশঃ

সর্বান্নানাত্বয়ুক্তাংশ্চ সর্বান্প্রত্যক্ষহেতুকান্
যতঃ পরং ন বিদ্যেত ততোঽভ্যাসে ভবিষ্যতি

বাসুদেব উবাচ
ততস্তু তস্যা ব্রাহ্মণ্যা মতিঃ ক্ষেত্রজ্ঞসংক্ষয়ে
ক্ষেত্রজ্ঞাদেব পরতঃ ক্ষেত্রজ্ঞোঽন্যঃ প্রবর্ততে

অর্জুন উবাচ
ক্ব নু সা ব্রাহ্মণী কৃষ্ণ ক্ব চাসৌ ব্রাহ্মণর্ষভঃ
যাভ্যাং সিদ্ধিরিয়ং প্রাপ্তা তাবুভৌ বদ মেঽচ্যুত

বাসুদেব উবাচ
মনো মে ব্রাহ্মণং বিদ্ধি বুদ্ধিং মে বিদ্ধি ব্রাহ্মণীম্
ক্ষেত্রজ্ঞ ইতি যশ্চোক্তঃ সোঽহমেব ধনংজয়