Utshovঅধ্যায় 33
33.1
ব্রাহ্মণ উবাচ
নাহং তথা ভীরু চরামি লোকে; তথা ত্বং মাং তর্কয়সে স্ববুদ্ধ্যা
বিপ্রোঽস্মি মুক্তোঽস্মি বনেচরোঽস্মি; গৃহস্থধর্মা ব্রহ্মচারী তথাস্মি
33.2
নাহমস্মি যথা মাং ত্বং পশ্যসে চক্ষুষা শুভে
ময়া ব্যাপ্তমিদং সর্বং যত্কিংচিজ্জগতীগতম্
33.3
যে কেচিজ্জন্তবো লোকে জঙ্গমাঃ স্থাবরাশ্চ হ
তেষাং মামন্তকং বিদ্ধি দারূণামিব পাবকম্
33.4
রাজ্যং পৃথিব্যাং সর্বস্যামথ বাপি ত্রিবিষ্টপে
তথা বুদ্ধিরিয়ং বেত্তি বুদ্ধিরেব ধনং মম
33.5
একঃ পন্থা ব্রাহ্মণানাং যেন গচ্ছন্তি তদ্বিদঃ
গৃহেষু বনবাসেষু গুরুবাসেষু ভিক্ষুষু
লিঙ্গৈর্বহুভিরব্যগ্রৈরেকা বুদ্ধিরুপাস্যতে
33.6
নানালিঙ্গাশ্রমস্থানাং যেষাং বুদ্ধিঃ শমাত্মিকা
তে ভাবমেকমায়ান্তি সরিতঃ সাগরং যথা
33.7
বুদ্ধ্যায়ং গম্যতে মার্গঃ শরীরেণ ন গম্যতে
আদ্যন্তবন্তি কর্মাণি শরীরং কর্মবন্ধনম্
33.8
তস্মাত্তে সুভগে নাস্তি পরলোককৃতং ভয়ম্
মদ্ভাবভাবনিরতা মমৈবাত্মানমেষ্যসি