অধ্যায় 32

32.1

ব্রাহ্মণ উবাচ
অত্রাপ্যুদাহরন্তীমমিতিহাসং পুরাতনম্
ব্রাহ্মণস্য চ সংবাদং জনকস্য চ ভামিনি

32.2

ব্রাহ্মণং জনকো রাজা সন্নং কস্মিংশ্চিদাগমে
বিষয়ে মে ন বস্তব্যমিতি শিষ্ট্যর্থমব্রবীৎ

32.3

ইত্যুক্তঃ প্রত্যুবাচাথ ব্রাহ্মণো রাজসত্তমম্
আচক্ষ্ব বিষয়ং রাজন্যাবাংস্তব বশে স্থিতঃ

32.4

সোঽন্যস্য বিষয়ে রাজ্ঞো বস্তুমিচ্ছাম্যহং বিভো
বচস্তে কর্তুমিচ্ছামি যথাশাস্ত্রং মহীপতে

32.5

ইত্যুক্তঃ স তদা রাজা ব্রাহ্মণেন যশস্বিনা
মুহুরুষ্ণং চ নিঃশ্বস্য ন স তং প্রত্যভাষত

32.6

তমাসীনং ধ্যায়মানং রাজানমমিতৌজসম্
কশ্মলং সহসাগচ্ছদ্ভানুমন্তমিব গ্রহঃ

32.7

সমাশ্বাস্য ততো রাজা ব্যপেতে কশ্মলে তদা
ততো মুহূর্তাদিব তং ব্রাহ্মণং বাক্যমব্রবীৎ

32.8

পিতৃপৈতামহে রাজ্যে বশ্যে জনপদে সতি
বিষয়ং নাধিগচ্ছামি বিচিন্বন্পৃথিবীমিমাম্

32.9

নাধ্যগচ্ছং যদা পৃথ্ব্যাং মিথিলা মার্গিতা ময়া
নাধ্যগচ্ছং যদা তস্যাং স্বপ্রজা মার্গিতা ময়া

32.10

নাধ্যগচ্ছং যদা তাসু তদা মে কশ্মলোঽভবৎ
ততো মে কশ্মলস্যান্তে মতিঃ পুনরুপস্থিতা

32.11

তয়া ন বিষয়ং মন্যে সর্বো বা বিষয়ো মম
আত্মাপি চায়ং ন মম সর্বা বা পৃথিবী মম
উষ্যতাং যাবদুত্সাহো ভুজ্যতাং যাবদিষ্যতে

32.12

পিতৃপৈতামহে রাজ্যে বশ্যে জনপদে সতি
ব্রূহি কাং বুদ্ধিমাস্থায় মমত্বং বর্জিতং ত্বয়া

32.13

কাং বা বুদ্ধিং বিনিশ্চিত্য সর্বো বৈ বিষয়স্তব
নাবৈষি বিষয়ং যেন সর্বো বা বিষয়স্তব

32.14

জনক উবাচ
অন্তবন্ত ইহারম্ভা বিদিতাঃ সর্বকর্মসু
নাধ্যগচ্ছমহং যস্মান্মমেদমিতি যদ্ভবেৎ

32.15

কস্যেদমিতি কস্য স্বমিতি বেদবচস্তথা
নাধ্যগচ্ছমহং বুদ্ধ্যা মমেদমিতি যদ্ভবেৎ

32.16

এতাং বুদ্ধিং বিনিশ্চিত্য মমত্বং বর্জিতং ময়া
শৃণু বুদ্ধিং তু যাং জ্ঞাত্বা সর্বত্র বিষয়ো মম

32.17

নাহমাত্মার্থমিচ্ছামি গন্ধান্ঘ্রাণগতানপি
তস্মান্মে নির্জিতা ভূমির্বশে তিষ্ঠতি নিত্যদা

32.18

নাহমাত্মার্থমিচ্ছামি রসানাস্যেঽপি বর্ততঃ
আপো মে নির্জিতাস্তস্মাদ্বশে তিষ্ঠন্তি নিত্যদা

32.19

নাহমাত্মার্থমিচ্ছামি রূপং জ্যোতিশ্চ চক্ষুষা
তস্মান্মে নির্জিতং জ্যোতির্বশে তিষ্ঠতি নিত্যদা

32.20

নাহমাত্মার্থমিচ্ছামি স্পর্শাংস্ত্বচি গতাশ্চ যে
তস্মান্মে নির্জিতো বায়ুর্বশে তিষ্ঠতি নিত্যদা

32.21

নাহমাত্মার্থমিচ্ছামি শব্দাঞ্শ্রোত্রগতানপি
তস্মান্মে নির্জিতাঃ শব্দা বশে তিষ্ঠন্তি নিত্যদা

32.22

নাহমাত্মার্থমিচ্ছামি মনো নিত্যং মনোন্তরে
মনো মে নির্জিতং তস্মাদ্বশে তিষ্ঠতি নিত্যদা

32.23

দেবেভ্যশ্চ পিতৃভ্যশ্চ ভূতেভ্যোঽতিথিভিঃ সহ
ইত্যর্থং সর্ব এবেমে সমারম্ভা ভবন্তি বৈ

32.24

ততঃ প্রহস্য জনকং ব্রাহ্মণঃ পুনরব্রবীৎ
ত্বজ্জিজ্ঞাসার্থমদ্যেহ বিদ্ধি মাং ধর্মমাগতম্

32.25

ত্বমস্য ব্রহ্মনাভস্য বুদ্ধ্যারস্যানিবর্তিনঃ
সত্ত্বনেমিনিরুদ্ধস্য চক্রস্যৈকঃ প্রবর্তকঃ

Contains text from DharmicData, made available under the Open Database License (ODbL). Simple meanings are written by AI and can contain mistakes.