অধ্যায় 31

31.1

ব্রাহ্মণ উবাচ
ত্রয়ো বৈ রিপবো লোকে নব বৈ গুণতঃ স্মৃতাঃ
হর্ষঃ স্তম্ভোঽভিমানশ্চ ত্রয়স্তে সাত্ত্বিকা গুণাঃ

শোকঃ ক্রোধোঽতিসংরম্ভো রাজসাস্তে গুণাঃ স্মৃতাঃ
স্বপ্নস্তন্দ্রী চ মোহশ্চ ত্রয়স্তে তামসা গুণাঃ

এতান্নিকৃত্য ধৃতিমান্বাণসংঘৈরতন্দ্রিতঃ
জেতুং পরানুত্সহতে প্রশান্তাত্মা জিতেন্দ্রিয়ঃ

অত্র গাথাঃ কীর্তয়ন্তি পুরাকল্পবিদো জনাঃ
অম্বরীষেণ যা গীতা রাজ্ঞা রাজ্যং প্রশাসতা

সমুদীর্ণেষু দোষেষু বধ্যমানেষু সাধুষু
জগ্রাহ তরসা রাজ্যমম্বরীষ ইতি শ্রুতিঃ

স নিগৃহ্য মহাদোষান্সাধূন্সমভিপূজ্য চ
জগাম মহতীং সিদ্ধিং গাথাং চেমাং জগাদ হ

ভূয়িষ্ঠং মে জিতা দোষা নিহতাঃ সর্বশত্রবঃ
একো দোষোঽবশিষ্টস্তু বধ্যঃ স ন হতো ময়া

যেন যুক্তো জন্তুরয়ং বৈতৃষ্ণ্যং নাধিগচ্ছতি
তৃষ্ণার্ত ইব নিম্নানি ধাবমানো ন বুধ্যতে

অকার্যমপি যেনেহ প্রয়ুক্তঃ সেবতে নরঃ
তং লোভমসিভিস্তীক্ষ্ণৈর্নিকৃন্তন্তং নিকৃন্তত

লোভাদ্ধি জায়তে তৃষ্ণা ততশ্চিন্তা প্রসজ্যতে
স লিপ্সমানো লভতে ভূয়িষ্ঠং রাজসান্গুণান্

স তৈর্গুণৈঃ সংহতদেহবন্ধনঃ; পুনঃ পুনর্জায়তি কর্ম চেহতে
জন্মক্ষয়ে ভিন্নবিকীর্ণদেহঃ; পুনর্মৃত্যুং গচ্ছতি জন্মনি স্বে

তস্মাদেনং সম্যগবেক্ষ্য লোভং; নিগৃহ্য ধৃত্যাত্মনি রাজ্যমিচ্ছেৎ
এতদ্রাজ্যং নান্যদস্তীতি বিদ্যা;দ্যস্ত্বত্র রাজা বিজিতো মমৈকঃ

ইতি রাজ্ঞাম্বরীষেণ গাথা গীতা যশস্বিনা
আধিরাজ্যং পুরস্কৃত্য লোভমেকং নিকৃন্ততা