UtshovChapter 31
31.1
ब्राह्मण उवाच
त्रयो वै रिपवो लोके नव वै गुणतः स्मृताः
हर्षः स्तम्भोऽभिमानश्च त्रयस्ते सात्त्विका गुणाः
Brahmana uvacha
Trayo vai ripavo loke nava vai gunatah smritah
Harshah stambhobhimanashcha trayaste sattvika gunah
31.2
शोकः क्रोधोऽतिसंरम्भो राजसास्ते गुणाः स्मृताः
स्वप्नस्तन्द्री च मोहश्च त्रयस्ते तामसा गुणाः
Shokah krodhotisanrambho rajasaste gunah smritah
Svapnastandri cha mohashcha trayaste tamasa gunah
31.3
एतान्निकृत्य धृतिमान्बाणसंघैरतन्द्रितः
जेतुं परानुत्सहते प्रशान्तात्मा जितेन्द्रियः
Etannikritya dhritimanbanasanghairatandritah
Jetum paranutsahate prashantatma jitendriyah
31.4
अत्र गाथाः कीर्तयन्ति पुराकल्पविदो जनाः
अम्बरीषेण या गीता राज्ञा राज्यं प्रशासता
Atra gathah kirtayanti purakalpavido janah
Ambarishena ya gita ragya rajyam prashasata
31.5
समुदीर्णेषु दोषेषु वध्यमानेषु साधुषु
जग्राह तरसा राज्यमम्बरीष इति श्रुतिः
Samudirneshu dosheshu vadhyamaneshu sadhushu
Jagraha tarasa rajyamambarisha iti shrutih
31.6
स निगृह्य महादोषान्साधून्समभिपूज्य च
जगाम महतीं सिद्धिं गाथां चेमां जगाद ह
Sa nigrihya mahadoshansadhunsamabhipujya cha
Jagama mahatim siddhim gatham chemam jagada ha
31.7
भूयिष्ठं मे जिता दोषा निहताः सर्वशत्रवः
एको दोषोऽवशिष्टस्तु वध्यः स न हतो मया
Bhuyishtham me jita dosha nihatah sarvashatravah
Eko doshovashishtastu vadhyah sa na hato maya
31.8
येन युक्तो जन्तुरयं वैतृष्ण्यं नाधिगच्छति
तृष्णार्त इव निम्नानि धावमानो न बुध्यते
Yena yukto janturayam vaitrishnyam nadhigachchhati
Trishnarta iva nimnani dhavamano na budhyate
31.9
अकार्यमपि येनेह प्रयुक्तः सेवते नरः
तं लोभमसिभिस्तीक्ष्णैर्निकृन्तन्तं निकृन्तत
Akaryamapi yeneha prayuktah sevate narah
Tam lobhamasibhistikshnairnikrintantam nikrintata
31.10
लोभाद्धि जायते तृष्णा ततश्चिन्ता प्रसज्यते
स लिप्समानो लभते भूयिष्ठं राजसान्गुणान्
Lobhaddhi jayate trishna tatashchinta prasajyate
Sa lipsamano labhate bhuyishtham rajasangunan
31.11
स तैर्गुणैः संहतदेहबन्धनः; पुनः पुनर्जायति कर्म चेहते
जन्मक्षये भिन्नविकीर्णदेहः; पुनर्मृत्युं गच्छति जन्मनि स्वे
Sa tairgunaih sanhatadehabandhanah; punah punarjayati karma chehate
Janmakshaye bhinnavikirnadehah; punarmrityum gachchhati janmani sve
31.12
तस्मादेनं सम्यगवेक्ष्य लोभं; निगृह्य धृत्यात्मनि राज्यमिच्छेत्
एतद्राज्यं नान्यदस्तीति विद्या;द्यस्त्वत्र राजा विजितो ममैकः
Tasmadenam samyagavekshya lobham; nigrihya dhrityatmani rajyamichchhet
Etadrajyam nanyadastiti vidya;dyastvatra raja vijito mamaikah
31.13
इति राज्ञाम्बरीषेण गाथा गीता यशस्विना
आधिराज्यं पुरस्कृत्य लोभमेकं निकृन्तता
Iti ragyambarishena gatha gita yashasvina
Adhirajyam puraskritya lobhamekam nikrintata