Utshovঅধ্যায় 22
22.1
ব্রাহ্মণ উবাচ
অত্রাপ্যুদাহরন্তীমমিতিহাসং পুরাতনম্
সুভগে সপ্তহোতৄণাং বিধানমিহ যাদৃশম্
22.2
ঘ্রাণং চক্ষুশ্চ জিহ্বা চ ত্বক্শ্রোত্রং চৈব পঞ্চমম্
মনো বুদ্ধিশ্চ সপ্তৈতে হোতারঃ পৃথগাশ্রিতাঃ
22.3
সূক্ষ্মেঽবকাশে সন্তস্তে ন পশ্যন্তীতরেতরম্
এতান্বৈ সপ্তহোতৄংস্ত্বং স্বভাবাদ্বিদ্ধি শোভনে
22.4
ব্রাহ্মণ্যুবাচ
সূক্ষ্মেঽবকাশে সন্তস্তে কথং নান্যোন্যদর্শিনঃ
কথংস্বভাবা ভগবন্নেতদাচক্ষ্ব মে বিভো
22.5
ব্রাহ্মণ উবাচ
গুণাজ্ঞানমবিজ্ঞানং গুণিজ্ঞানমভিজ্ঞতা
পরস্পরগুণানেতে ন বিজানন্তি কর্হিচিৎ
22.6
জিহ্বা চক্ষুস্তথা শ্রোত্রং ত্বঙ্মনো বুদ্ধিরেব চ
ন গন্ধানধিগচ্ছন্তি ঘ্রাণস্তানধিগচ্ছতি
22.7
ঘ্রাণং চক্ষুস্তথা শ্রোত্রং ত্বঙ্মনো বুদ্ধিরেব চ
ন রসানধিগচ্ছন্তি জিহ্বা তানধিগচ্ছতি
22.8
ঘ্রাণং জিহ্বা তথা শ্রোত্রং ত্বঙ্মনো বুদ্ধিরেব চ
ন রূপাণ্যধিগচ্ছন্তি চক্ষুস্তান্যধিগচ্ছতি
22.9
ঘ্রাণং জিহ্বা চ চক্ষুশ্চ শ্রোত্রং বুদ্ধির্মনস্তথা
ন স্পর্শানধিগচ্ছন্তি ত্বক্চ তানধিগচ্ছতি
22.10
ঘ্রাণং জিহ্বা চ চক্ষুশ্চ ত্বঙ্মনো বুদ্ধিরেব চ
ন শব্দানধিগচ্ছন্তি শ্রোত্রং তানধিগচ্ছতি
22.11
ঘ্রাণং জিহ্বা চ চক্ষুশ্চ ত্বক্শ্রোত্রং বুদ্ধিরেব চ
সংশয়ান্নাধিগচ্ছন্তি মনস্তানধিগচ্ছতি
22.12
ঘ্রাণং জিহ্বা চ চক্ষুশ্চ ত্বক্শ্রোত্রং মন এব চ
ন নিষ্ঠামধিগচ্ছন্তি বুদ্ধিস্তামধিগচ্ছতি
22.13
অত্রাপ্যুদাহরন্তীমমিতিহাসং পুরাতনম্
ইন্দ্রিয়াণাং চ সংবাদং মনসশ্চৈব ভামিনি
22.14
মন উবাচ
ন ঘ্রাতি মামৃতে ঘ্রাণং রসং জিহ্বা ন বুধ্যতে
রূপং চক্ষুর্ন গৃহ্ণাতি ত্বক্স্পর্শং নাববুধ্যতে
22.15
ন শ্রোত্রং বুধ্যতে শব্দং ময়া হীনং কথংচন
প্রবরং সর্বভূতানামহমস্মি সনাতনম্
22.16
অগারাণীব শূন্যানি শান্তার্চিষ ইবাগ্নয়ঃ
ইন্দ্রিয়াণি ন ভাসন্তে ময়া হীনানি নিত্যশঃ
22.17
কাষ্ঠানীবার্দ্রশুষ্কাণি যতমানৈরপীন্দ্রিয়ৈঃ
গুণার্থান্নাধিগচ্ছন্তি মামৃতে সর্বজন্তবঃ
22.18
ইন্দ্রিয়াণ্যূচুঃ
এবমেতদ্ভবেত্সত্যং যথৈতন্মন্যতে ভবান্
ঋতেঽস্মানস্মদর্থাংস্তু ভোগান্ভুঙ্ক্তে ভবান্যদি
22.19
যদ্যস্মাসু প্রলীনেষু তর্পণং প্রাণধারণম্
ভোগান্ভুঙ্ক্ষে রসান্ভুঙ্ক্ষে যথৈতন্মন্যতে তথা
22.20
অথ বাস্মাসু লীনেষু তিষ্ঠত্সু বিষয়েষু চ
যদি সংকল্পমাত্রেণ ভুঙ্ক্তে ভোগান্যথার্থবৎ
22.21
অথ চেন্মন্যসে সিদ্ধিমস্মদর্থেষু নিত্যদা
ঘ্রাণেন রূপমাদত্স্ব রসমাদত্স্ব চক্ষুষা
22.22
শ্রোত্রেণ গন্ধমাদত্স্ব নিষ্ঠামাদত্স্ব জিহ্বয়া
ত্বচা চ শব্দমাদত্স্ব বুদ্ধ্যা স্পর্শমথাপি চ
22.23
বলবন্তো হ্যনিয়মা নিয়মা দুর্বলীয়সাম্
ভোগানপূর্বানাদত্স্ব নোচ্ছিষ্টং ভোক্তুমর্হসি
22.24
যথা হি শিষ্যঃ শাস্তারং শ্রুত্যর্থমভিধাবতি
ততঃ শ্রুতমুপাদায় শ্রুতার্থমুপতিষ্ঠতি
22.25
বিষয়ানেবমস্মাভির্দর্শিতানভিমন্যসে
অনাগতানতীতাংশ্চ স্বপ্নে জাগরণে তথা
22.26
বৈমনস্যং গতানাং চ জন্তূনামল্পচেতসাম্
অস্মদর্থে কৃতে কার্যে দৃশ্যতে প্রাণধারণম্
22.27
বহূনপি হি সংকল্পান্মত্বা স্বপ্নানুপাস্য চ
বুভুক্ষয়া পীড্যমানো বিষয়ানেব ধাবসি
22.28
অগারমদ্বারমিব প্রবিশ্য; সংকল্পভোগো বিষয়ানবিন্দন্
প্রাণক্ষয়ে শান্তিমুপৈতি নিত্যং; দারুক্ষয়েঽগ্নির্জ্বলিতো যথৈব
22.29
কামং তু নঃ স্বেষু গুণেষু সঙ্গঃ; কামং চ নান্যোন্যগুণোপলব্ধিঃ
অস্মানৃতে নাস্তি তবোপলব্ধি;স্ত্বামপ্যৃতেঽস্মান্ন ভজেত হর্ষঃ