অধ্যায় 21

21.1

ব্রাহ্মণ উবাচ
অত্রাপ্যুদাহরন্তীমমিতিহাসং পুরাতনম্
নিবোধ দশহোতৄণাং বিধানমিহ যাদৃশম্

সর্বমেবাত্র বিজ্ঞেয়ং চিত্তং জ্ঞানমবেক্ষতে
রেতঃ শরীরভৃত্কায়ে বিজ্ঞাতা তু শরীরভৃৎ

শরীরভৃদ্গার্হপত্যস্তস্মাদন্যঃ প্রণীয়তে
ততশ্চাহবনীয়স্তু তস্মিন্সংক্ষিপ্যতে হবিঃ

ততো বাচস্পতির্জজ্ঞে সমানঃ পর্যবেক্ষতে
রূপং ভবতি বৈ ব্যক্তং তদনুদ্রবতে মনঃ

ব্রাহ্মণ্যুবাচ
কস্মাদ্বাগভবত্পূর্বং কস্মাত্পশ্চান্মনোঽভবৎ
মনসা চিন্তিতং বাক্যং যদা সমভিপদ্যতে

কেন বিজ্ঞানয়োগেন মতিশ্চিত্তং সমাস্থিতা
সমুন্নীতা নাধ্যগচ্ছত্কো বৈনাং প্রতিষেধতি

ব্রাহ্মণ উবাচ
তামপানঃ পতির্ভূত্বা তস্মাত্প্রেষ্যত্যপানতাম্
তাং মতিং মনসঃ প্রাহুর্মনস্তস্মাদবেক্ষতে

প্রশ্নং তু বাঙ্মনসোর্মাং যস্মাত্ত্বমনুপৃচ্ছসি
তস্মাত্তে বর্তয়িষ্যামি তয়োরেব সমাহ্বয়ম্

উভে বাঙ্মনসী গত্বা ভূতাত্মানমপৃচ্ছতাম্
আবয়োঃ শ্রেষ্ঠমাচক্ষ্ব ছিন্ধি নৌ সংশয়ং বিভো

মন ইত্যেব ভগবাংস্তদা প্রাহ সরস্বতীম্
অহং বৈ কামধুক্তুভ্যমিতি তং প্রাহ বাগথ

স্থাবরং জঙ্গমং চৈব বিদ্ধ্যুভে মনসী মম
স্থাবরং মত্সকাশে বৈ জঙ্গমং বিষয়ে তব

যস্তু তে বিষয়ং গচ্ছেন্মন্ত্রো বর্ণঃ স্বরোঽপি বা
তন্মনো জঙ্গমং নাম তস্মাদসি গরীয়সী

যস্মাদসি চ মা বোচঃ স্বয়মভ্যেত্য শোভনে
তস্মাদুচ্ছ্বাসমাসাদ্য ন বক্ষ্যসি সরস্বতি

প্রাণাপানান্তরে দেবী বাগ্বৈ নিত্যং স্ম তিষ্ঠতি
প্রের্যমাণা মহাভাগে বিনা প্রাণমপানতী
প্রজাপতিমুপাধাবত্প্রসীদ ভগবন্নিতি

ততঃ প্রাণঃ প্রাদুরভূদ্বাচমাপ্যায়য়ন্পুনঃ
তস্মাদুচ্ছ্বাসমাসাদ্য ন বাগ্বদতি কর্হিচিৎ

ঘোষিণী জাতনির্ঘোষা নিত্যমেব প্রবর্ততে
তয়োরপি চ ঘোষিণ্যোর্নির্ঘোষৈব গরীয়সী

গৌরিব প্রস্রবত্যেষা রসমুত্তমশালিনী
সততং স্যন্দতে হ্যেষা শাশ্বতং ব্রহ্মবাদিনী

দিব্যাদিব্যপ্রভাবেন ভারতী গৌঃ শুচিস্মিতে
এতয়োরন্তরং পশ্য সূক্ষ্ময়োঃ স্যন্দমানয়োঃ

অনুত্পন্নেষু বাক্যেষু চোদ্যমানা সিসৃক্ষয়া
কিং নু পূর্বং ততো দেবী ব্যাজহার সরস্বতী

প্রাণেন যা সংভবতে শরীরে; প্রাণাদপানং প্রতিপদ্যতে চ
উদানভূতা চ বিসৃজ্য দেহং; ব্যানেন সর্বং দিবমাবৃণোতি

ততঃ সমানে প্রতিতিষ্ঠতীহ; ইত্যেব পূর্বং প্রজজল্প চাপি
তস্মান্মনঃ স্থাবরত্বাদ্বিশিষ্টং; তথা দেবী জঙ্গমত্বাদ্বিশিষ্টা