Utshovঅধ্যায় 20
20.1
বাসুদেব উবাচ
অত্রাপ্যুদাহরন্তীমমিতিহাসং পুরাতনম্
দংপত্যোঃ পার্থ সংবাদমভয়ং নাম নামতঃ
20.2
ব্রাহ্মণী ব্রাহ্মণং কংচিজ্জ্ঞানবিজ্ঞানপারগম্
দৃষ্ট্বা বিবিক্ত আসীনং ভার্যা ভর্তারমব্রবীৎ
20.3
কং নু লোকং গমিষ্যামি ত্বামহং পতিমাশ্রিতা
ন্যস্তকর্মাণমাসীনং কীনাশমবিচক্ষণম্
20.4
ভার্যাঃ পতিকৃতাঁল্লোকানাপ্নুবন্তীতি নঃ শ্রুতম্
ত্বামহং পতিমাসাদ্য কাং গমিষ্যামি বৈ গতিম্
20.5
এবমুক্তঃ স শান্তাত্মা তামুবাচ হসন্নিব
সুভগে নাভ্যসূয়ামি বাক্যস্যাস্য তবানঘে
20.6
গ্রাহ্যং দৃশ্যং চ শ্রাব্যং চ যদিদং কর্ম বিদ্যতে
এতদেব ব্যবস্যন্তি কর্ম কর্মেতি কর্মিণঃ
20.7
মোহমেব নিয়চ্ছন্তি কর্মণা জ্ঞানবর্জিতাঃ
নৈষ্কর্ম্যং ন চ লোকেঽস্মিন্মৌর্তমিত্যুপলভ্যতে
20.8
কর্মণা মনসা বাচা শুভং বা যদি বাশুভম্
জন্মাদিমূর্তিভেদানাং কর্ম ভূতেষু বর্ততে
20.9
রক্ষোভির্বধ্যমানেষু দৃশ্যদ্রব্যেষু কর্মসু
আত্মস্থমাত্মনা তেন দৃষ্টমায়তনং ময়া
20.10
যত্র তদ্ব্রহ্ম নির্দ্বংদ্বং যত্র সোমঃ সহাগ্নিনা
ব্যবায়ং কুরুতে নিত্যং ধীরো ভূতানি ধারয়ন্
20.11
যত্র ব্রহ্মাদয়ো যুক্তাস্তদক্ষরমুপাসতে
বিদ্বাংসঃ সুব্রতা যত্র শান্তাত্মানো জিতেন্দ্রিয়াঃ
20.12
ঘ্রাণেন ন তদাঘ্রেয়ং ন তদাদ্যং চ জিহ্বয়া
স্পর্শেন চ ন তত্স্পৃশ্যং মনসা ত্বেব গম্যতে
20.13
চক্ষুষা ন বিষহ্যং চ যত্কিংচিচ্ছ্রবণাত্পরম্
অগন্ধমরসস্পর্শমরূপাশব্দমব্যয়ম্
20.14
যতঃ প্রবর্ততে তন্ত্রং যত্র চ প্রতিতিষ্ঠতি
প্রাণোঽপানঃ সমানশ্চ ব্যানশ্চোদান এব চ
20.15
তত এব প্রবর্তন্তে তমেব প্রবিশন্তি চ
সমানব্যানয়োর্মধ্যে প্রাণাপানৌ বিচেরতুঃ
20.16
তস্মিন্সুপ্তে প্রলীয়েতে সমানো ব্যান এব চ
অপানপ্রাণয়োর্মধ্যে উদানো ব্যাপ্য তিষ্ঠতি
তস্মাচ্ছয়ানং পুরুষং প্রাণাপানৌ ন মুঞ্চতঃ
20.17
প্রাণানায়ম্যতে যেন তমুদানং প্রচক্ষতে
তস্মাত্তপো ব্যবস্যন্তি তদ্ভবং ব্রহ্মবাদিনঃ
20.18
তেষামন্যোন্যভক্ষাণাং সর্বেষাং দেহচারিণাম্
অগ্নির্বৈশ্বানরো মধ্যে সপ্তধা বিহিতোঽন্তরা
20.19
ঘ্রাণং জিহ্বা চ চক্ষুশ্চ ত্বক্চ শ্রোত্রং চ পঞ্চমম্
মনো বুদ্ধিশ্চ সপ্তৈতা জিহ্বা বৈশ্বানরার্চিষঃ
20.20
ঘ্রেয়ং পেয়ং চ দৃশ্যং চ স্পৃশ্যং শ্রব্যং তথৈব চ
মন্তব্যমথ বোদ্ধব্যং তাঃ সপ্ত সমিধো মম
20.21
ঘ্রাতা ভক্ষয়িতা দ্রষ্টা স্প্রষ্টা শ্রোতা চ পঞ্চমঃ
মন্তা বোদ্ধা চ সপ্তৈতে ভবন্তি পরমর্ত্বিজঃ
20.22
ঘ্রেয়ে পেয়ে চ দৃশ্যে চ স্পৃশ্যে শ্রব্যে তথৈব চ
হবীংষ্যগ্নিষু হোতারঃ সপ্তধা সপ্ত সপ্তসু
সম্যক্প্রক্ষিপ্য বিদ্বাংসো জনয়ন্তি স্বয়োনিষু
20.23
পৃথিবী বায়ুরাকাশমাপো জ্যোতিশ্চ পঞ্চমম্
মনো বুদ্ধিশ্চ সপ্তৈতে যোনিরিত্যেব শব্দিতাঃ
20.24
হবির্ভূতা গুণাঃ সর্বে প্রবিশন্ত্যগ্নিজং মুখম্
অন্তর্বাসমুষিত্বা চ জায়ন্তে স্বাসু যোনিষু
তত্রৈব চ নিরুধ্যন্তে প্রলয়ে ভূতভাবনে
20.25
ততঃ সংজায়তে গন্ধস্ততঃ সংজায়তে রসঃ
ততঃ সংজায়তে রূপং ততঃ স্পর্শোঽভিজায়তে
20.26
ততঃ সংজায়তে শব্দঃ সংশয়স্তত্র জায়তে
ততঃ সংজায়তে নিষ্ঠা জন্মৈতত্সপ্তধা বিদুঃ
20.27
অনেনৈব প্রকারেণ প্রগৃহীতং পুরাতনৈঃ
পূর্ণাহুতিভিরাপূর্ণাস্তেঽভিপূর্যন্তি তেজসা