UtshovChapter 22
22.1
ब्राह्मण उवाच
अत्राप्युदाहरन्तीममितिहासं पुरातनम्
सुभगे सप्तहोतॄणां विधानमिह यादृशम्
Brahmana uvacha
Atrapyudaharantimamitihasam puratanam
Subhage saptahotrinam vidhanamiha yadrisham
22.2
घ्राणं चक्षुश्च जिह्वा च त्वक्श्रोत्रं चैव पञ्चमम्
मनो बुद्धिश्च सप्तैते होतारः पृथगाश्रिताः
Ghranam chakshushcha jihva cha tvakshrotram chaiva panchamam
Mano buddhishcha saptaite hotarah prithagashritah
22.3
सूक्ष्मेऽवकाशे सन्तस्ते न पश्यन्तीतरेतरम्
एतान्वै सप्तहोतॄंस्त्वं स्वभावाद्विद्धि शोभने
Sukshmevakashe santaste na pashyantitaretaram
Etanvai saptahotrinstvam svabhavadviddhi shobhane
22.4
ब्राह्मण्युवाच
सूक्ष्मेऽवकाशे सन्तस्ते कथं नान्योन्यदर्शिनः
कथंस्वभावा भगवन्नेतदाचक्ष्व मे विभो
Brahmanyuvacha
Sukshmevakashe santaste katham nanyonyadarshinah
Kathansvabhava bhagavannetadachakshva me vibho
22.5
ब्राह्मण उवाच
गुणाज्ञानमविज्ञानं गुणिज्ञानमभिज्ञता
परस्परगुणानेते न विजानन्ति कर्हिचित्
Brahmana uvacha
Gunagyanamavigyanam gunigyanamabhigyata
Parasparagunanete na vijananti karhichit
22.6
जिह्वा चक्षुस्तथा श्रोत्रं त्वङ्मनो बुद्धिरेव च
न गन्धानधिगच्छन्ति घ्राणस्तानधिगच्छति
Jihva chakshustatha shrotram tvanmano buddhireva cha
Na gandhanadhigachchhanti ghranastanadhigachchhati
22.7
घ्राणं चक्षुस्तथा श्रोत्रं त्वङ्मनो बुद्धिरेव च
न रसानधिगच्छन्ति जिह्वा तानधिगच्छति
Ghranam chakshustatha shrotram tvanmano buddhireva cha
Na rasanadhigachchhanti jihva tanadhigachchhati
22.8
घ्राणं जिह्वा तथा श्रोत्रं त्वङ्मनो बुद्धिरेव च
न रूपाण्यधिगच्छन्ति चक्षुस्तान्यधिगच्छति
Ghranam jihva tatha shrotram tvanmano buddhireva cha
Na rupanyadhigachchhanti chakshustanyadhigachchhati
22.9
घ्राणं जिह्वा च चक्षुश्च श्रोत्रं बुद्धिर्मनस्तथा
न स्पर्शानधिगच्छन्ति त्वक्च तानधिगच्छति
Ghranam jihva cha chakshushcha shrotram buddhirmanastatha
Na sparshanadhigachchhanti tvakcha tanadhigachchhati
22.10
घ्राणं जिह्वा च चक्षुश्च त्वङ्मनो बुद्धिरेव च
न शब्दानधिगच्छन्ति श्रोत्रं तानधिगच्छति
Ghranam jihva cha chakshushcha tvanmano buddhireva cha
Na shabdanadhigachchhanti shrotram tanadhigachchhati
22.11
घ्राणं जिह्वा च चक्षुश्च त्वक्श्रोत्रं बुद्धिरेव च
संशयान्नाधिगच्छन्ति मनस्तानधिगच्छति
Ghranam jihva cha chakshushcha tvakshrotram buddhireva cha
Sanshayannadhigachchhanti manastanadhigachchhati
22.12
घ्राणं जिह्वा च चक्षुश्च त्वक्श्रोत्रं मन एव च
न निष्ठामधिगच्छन्ति बुद्धिस्तामधिगच्छति
Ghranam jihva cha chakshushcha tvakshrotram mana eva cha
Na nishthamadhigachchhanti buddhistamadhigachchhati
22.13
अत्राप्युदाहरन्तीममितिहासं पुरातनम्
इन्द्रियाणां च संवादं मनसश्चैव भामिनि
Atrapyudaharantimamitihasam puratanam
Indriyanam cha sanvadam manasashchaiva bhamini
22.14
मन उवाच
न घ्राति मामृते घ्राणं रसं जिह्वा न बुध्यते
रूपं चक्षुर्न गृह्णाति त्वक्स्पर्शं नावबुध्यते
Mana uvacha
Na ghrati mamrite ghranam rasam jihva na budhyate
Rupam chakshurna grihnati tvaksparsham navabudhyate
22.15
न श्रोत्रं बुध्यते शब्दं मया हीनं कथंचन
प्रवरं सर्वभूतानामहमस्मि सनातनम्
Na shrotram budhyate shabdam maya hinam kathanchana
Pravaram sarvabhutanamahamasmi sanatanam
22.16
अगाराणीव शून्यानि शान्तार्चिष इवाग्नयः
इन्द्रियाणि न भासन्ते मया हीनानि नित्यशः
Agaraniva shunyani shantarchisha ivagnayah
Indriyani na bhasante maya hinani nityashah
22.17
काष्ठानीवार्द्रशुष्काणि यतमानैरपीन्द्रियैः
गुणार्थान्नाधिगच्छन्ति मामृते सर्वजन्तवः
Kashthanivardrashushkani yatamanairapindriyaih
Gunarthannadhigachchhanti mamrite sarvajantavah
22.18
इन्द्रियाण्यूचुः
एवमेतद्भवेत्सत्यं यथैतन्मन्यते भवान्
ऋतेऽस्मानस्मदर्थांस्तु भोगान्भुङ्क्ते भवान्यदि
Indriyanyuchuh
Evametadbhavetsatyam yathaitanmanyate bhavan
Ritesmanasmadarthanstu bhoganbhunkte bhavanyadi
22.19
यद्यस्मासु प्रलीनेषु तर्पणं प्राणधारणम्
भोगान्भुङ्क्षे रसान्भुङ्क्षे यथैतन्मन्यते तथा
Yadyasmasu pralineshu tarpanam pranadharanam
Bhoganbhunkshe rasanbhunkshe yathaitanmanyate tatha
22.20
अथ वास्मासु लीनेषु तिष्ठत्सु विषयेषु च
यदि संकल्पमात्रेण भुङ्क्ते भोगान्यथार्थवत्
Atha vasmasu lineshu tishthatsu vishayeshu cha
Yadi sankalpamatrena bhunkte bhoganyatharthavat
22.21
अथ चेन्मन्यसे सिद्धिमस्मदर्थेषु नित्यदा
घ्राणेन रूपमादत्स्व रसमादत्स्व चक्षुषा
Atha chenmanyase siddhimasmadartheshu nityada
Ghranena rupamadatsva rasamadatsva chakshusha
22.22
श्रोत्रेण गन्धमादत्स्व निष्ठामादत्स्व जिह्वया
त्वचा च शब्दमादत्स्व बुद्ध्या स्पर्शमथापि च
Shrotrena gandhamadatsva nishthamadatsva jihvaya
Tvacha cha shabdamadatsva buddhya sparshamathapi cha
22.23
बलवन्तो ह्यनियमा नियमा दुर्बलीयसाम्
भोगानपूर्वानादत्स्व नोच्छिष्टं भोक्तुमर्हसि
Balavanto hyaniyama niyama durbaliyasam
Bhoganapurvanadatsva nochchhishtam bhoktumarhasi
22.24
यथा हि शिष्यः शास्तारं श्रुत्यर्थमभिधावति
ततः श्रुतमुपादाय श्रुतार्थमुपतिष्ठति
Yatha hi shishyah shastaram shrutyarthamabhidhavati
Tatah shrutamupadaya shrutarthamupatishthati
22.25
विषयानेवमस्माभिर्दर्शितानभिमन्यसे
अनागतानतीतांश्च स्वप्ने जागरणे तथा
Vishayanevamasmabhirdarshitanabhimanyase
Anagatanatitanshcha svapne jagarane tatha
22.26
वैमनस्यं गतानां च जन्तूनामल्पचेतसाम्
अस्मदर्थे कृते कार्ये दृश्यते प्राणधारणम्
Vaimanasyam gatanam cha jantunamalpachetasam
Asmadarthe krite karye drishyate pranadharanam
22.27
बहूनपि हि संकल्पान्मत्वा स्वप्नानुपास्य च
बुभुक्षया पीड्यमानो विषयानेव धावसि
Bahunapi hi sankalpanmatva svapnanupasya cha
Bubhukshaya pidyamano vishayaneva dhavasi
22.28
अगारमद्वारमिव प्रविश्य; संकल्पभोगो विषयानविन्दन्
प्राणक्षये शान्तिमुपैति नित्यं; दारुक्षयेऽग्निर्ज्वलितो यथैव
Agaramadvaramiva pravishya; sankalpabhogo vishayanavindan
Pranakshaye shantimupaiti nityam; darukshayegnirjvalito yathaiva
22.29
कामं तु नः स्वेषु गुणेषु सङ्गः; कामं च नान्योन्यगुणोपलब्धिः
अस्मानृते नास्ति तवोपलब्धि;स्त्वामप्यृतेऽस्मान्न भजेत हर्षः
Kamam tu nah sveshu guneshu sangah; kamam cha nanyonyagunopalabdhih
Asmanrite nasti tavopalabdhi;stvamapyritesmanna bhajeta harshah