Utshovঅধ্যায় 18
18.1
ব্রাহ্মণ উবাচ
শুভানামশুভানাং চ নেহ নাশোঽস্তি কর্মণাম্
প্রাপ্য প্রাপ্য তু পচ্যন্তে ক্ষেত্রং ক্ষেত্রং তথা তথা
18.2
যথা প্রসূয়মানস্তু ফলী দদ্যাত্ফলং বহু
তথা স্যাদ্বিপুলং পুণ্যং শুদ্ধেন মনসা কৃতম্
18.3
পাপং চাপি তথৈব স্যাত্পাপেন মনসা কৃতম্
পুরোধায় মনো হীহ কর্মণ্যাত্মা প্রবর্ততে
18.4
যথা কর্মসমাদিষ্টং কামমন্যুসমাবৃতঃ
নরো গর্ভং প্রবিশতি তচ্চাপি শৃণু চোত্তরম্
18.5
শুক্রং শোণিতসংসৃষ্টং স্ত্রিয়া গর্ভাশয়ং গতম্
ক্ষেত্রং কর্মজমাপ্নোতি শুভং বা যদি বাশুভম্
18.6
সৌক্ষ্ম্যাদব্যক্তভাবাচ্চ ন স ক্বচন সজ্জতে
সংপ্রাপ্য ব্রহ্মণঃ কায়ং তস্মাত্তদ্ব্রহ্ম শাশ্বতম্
তদ্বীজং সর্বভূতানাং তেন জীবন্তি জন্তবঃ
18.7
স জীবঃ সর্বগাত্রাণি গর্ভস্যাবিশ্য ভাগশঃ
দধাতি চেতসা সদ্যঃ প্রাণস্থানেষ্ববস্থিতঃ
ততঃ স্পন্দয়তেঽঙ্গানি স গর্ভশ্চেতনান্বিতঃ
18.8
যথা হি লোহনিষ্যন্দো নিষিক্তো বিম্ববিগ্রহম্
উপৈতি তদ্বজ্জানীহি গর্ভে জীবপ্রবেশনম্
18.9
লোহপিণ্ডং যথা বহ্নিঃ প্রবিশত্যভিতাপয়ন্
তথা ত্বমপি জানীহি গর্ভে জীবোপপাদনম্
18.10
যথা চ দীপঃ শরণং দীপ্যমানঃ প্রকাশয়েৎ
এবমেব শরীরাণি প্রকাশয়তি চেতনা
18.11
যদ্যচ্চ কুরুতে কর্ম শুভং বা যদি বাশুভম্
পূর্বদেহকৃতং সর্বমবশ্যমুপভুজ্যতে
18.12
ততস্তত্ক্ষীয়তে চৈব পুনশ্চান্যত্প্রচীয়তে
যাবত্তন্মোক্ষয়োগস্থং ধর্মং নৈবাববুধ্যতে
18.13
তত্র ধর্মং প্রবক্ষ্যামি সুখী ভবতি যেন বৈ
আবর্তমানো জাতীষু তথান্যোন্যাসু সত্তম
18.14
দানং ব্রতং ব্রহ্মচর্যং যথোক্তব্রতধারণম্
দমঃ প্রশান্ততা চৈব ভূতানাং চানুকম্পনম্
18.15
সংয়মশ্চানৃশংস্যং চ পরস্বাদানবর্জনম্
ব্যলীকানামকরণং ভূতানাং যত্র সা ভুবি
18.16
মাতাপিত্রোশ্চ শুশ্রূষা দেবতাতিথিপূজনম্
গুরুপূজা ঘৃণা শৌচং নিত্যমিন্দ্রিয়সংয়মঃ
18.17
প্রবর্তনং শুভানাং চ তত্সতাং বৃত্তমুচ্যতে
ততো ধর্মঃ প্রভবতি যঃ প্রজাঃ পাতি শাশ্বতীঃ
18.18
এবং সত্সু সদা পশ্যেত্তত্র হ্যেষা ধ্রুবা স্থিতিঃ
আচারো ধর্মমাচষ্টে যস্মিন্সন্তো ব্যবস্থিতাঃ
18.19
তেষু তদ্ধর্মনিক্ষিপ্তং যঃ স ধর্মঃ সনাতনঃ
যস্তং সমভিপদ্যেত ন স দুর্গতিমাপ্নুয়াৎ
18.20
অতো নিয়ম্যতে লোকঃ প্রমুহ্য ধর্মবর্ত্মসু
যস্তু যোগী চ মুক্তশ্চ স এতেভ্যো বিশিষ্যতে
18.21
বর্তমানস্য ধর্মেণ পুরুষস্য যথা তথা
সংসারতারণং হ্যস্য কালেন মহতা ভবেৎ
18.22
এবং পূর্বকৃতং কর্ম সর্বো জন্তুর্নিষেবতে
সর্বং তত্কারণং যেন নিকৃতোঽয়মিহাগতঃ
18.23
শরীরগ্রহণং চাস্য কেন পূর্বং প্রকল্পিতম্
ইত্যেবং সংশয়ো লোকে তচ্চ বক্ষ্যাম্যতঃ পরম্
18.24
শরীরমাত্মনঃ কৃত্বা সর্বভূতপিতামহঃ
ত্রৈলোক্যমসৃজদ্ব্রহ্মা কৃত্স্নং স্থাবরজঙ্গমম্
18.25
ততঃ প্রধানমসৃজচ্চেতনা সা শরীরিণাম্
যয়া সর্বমিদং ব্যাপ্তং যাং লোকে পরমাং বিদুঃ
18.26
ইহ তত্ক্ষরমিত্যুক্তং পরং ত্বমৃতমক্ষরম্
ত্রয়াণাং মিথুনং সর্বমেকৈকস্য পৃথক্পৃথক্
18.27
অসৃজত্সর্বভূতানি পূর্বসৃষ্টঃ প্রজাপতিঃ
স্থাবরাণি চ ভূতানি ইত্যেষা পৌর্বিকী শ্রুতিঃ
18.28
তস্য কালপরীমাণমকরোত্স পিতামহঃ
ভূতেষু পরিবৃত্তিং চ পুনরাবৃত্তিমেব চ
18.29
যথাত্র কশ্চিন্মেধাবী দৃষ্টাত্মা পূর্বজন্মনি
যত্প্রবক্ষ্যামি তত্সর্বং যথাবদুপপদ্যতে
18.30
সুখদুঃখে সদা সম্যগনিত্যে যঃ প্রপশ্যতি
কায়ং চামেধ্যসংঘাতং বিনাশং কর্মসংহিতম্
18.31
যচ্চ কিংচিত্সুখং তচ্চ সর্বং দুঃখমিতি স্মরন্
সংসারসাগরং ঘোরং তরিষ্যতি সুদুস্তরম্
18.32
জাতীমরণরোগৈশ্চ সমাবিষ্টঃ প্রধানবিৎ
চেতনাবত্সু চৈতন্যং সমং ভূতেষু পশ্যতি
18.33
নির্বিদ্যতে ততঃ কৃত্স্নং মার্গমাণঃ পরং পদম্
তস্যোপদেশং বক্ষ্যামি যাথাতথ্যেন সত্তম
18.34
শাশ্বতস্যাব্যয়স্যাথ পদস্য জ্ঞানমুত্তমম্
প্রোচ্যমানং ময়া বিপ্র নিবোধেদমশেষতঃ