Utshovঅধ্যায় 17
17.1
বাসুদেব উবাচ
ততস্তস্যোপসংগৃহ্য পাদৌ প্রশ্নান্সুদুর্বচান্
পপ্রচ্ছ তাংশ্চ সর্বান্স প্রাহ ধর্মভৃতাং বরঃ
17.2
কাশ্যপ উবাচ
কথং শরীরং চ্যবতে কথং চৈবোপপদ্যতে
কথং কষ্টাচ্চ সংসারাত্সংসরন্পরিমুচ্যতে
17.3
আত্মানং বা কথং যুক্ত্বা তচ্ছরীরং বিমুঞ্চতি
শরীরতশ্চ নির্মুক্তঃ কথমন্যত্প্রপদ্যতে
17.4
কথং শুভাশুভে চায়ং কর্মণী স্বকৃতে নরঃ
উপভুঙ্ক্তে ক্ব বা কর্ম বিদেহস্যোপতিষ্ঠতি
17.5
ব্রাহ্মণ উবাচ
এবং সংচোদিতঃ সিদ্ধঃ প্রশ্নাংস্তান্প্রত্যভাষত
আনুপূর্ব্যেণ বার্ষ্ণেয় যথা তন্মে বচঃ শৃণু
17.6
সিদ্ধ উবাচ
আয়ুঃকীর্তিকরাণীহ যানি কর্মাণি সেবতে
শরীরগ্রহণেঽন্যস্মিংস্তেষু ক্ষীণেষু সর্বশঃ
17.7
আয়ুঃক্ষয়পরীতাত্মা বিপরীতানি সেবতে
বুদ্ধির্ব্যাবর্ততে চাস্য বিনাশে প্রত্যুপস্থিতে
17.8
সত্ত্বং বলং চ কালং চাপ্যবিদিত্বাত্মনস্তথা
অতিবেলমুপাশ্নাতি তৈর্বিরুদ্ধান্যনাত্মবান্
17.9
যদায়মতিকষ্টানি সর্বাণ্যুপনিষেবতে
অত্যর্থমপি বা ভুঙ্ক্তে ন বা ভুঙ্ক্তে কদাচন
17.10
দুষ্টান্নং বিষমান্নং চ সোঽন্যোন্যেন বিরোধি চ
গুরু বাপি সমং ভুঙ্ক্তে নাতিজীর্ণেঽপি বা পুনঃ
17.11
ব্যায়ামমতিমাত্রং বা ব্যবায়ং চোপসেবতে
সততং কর্মলোভাদ্বা প্রাপ্তং বেগবিধারণম্
17.12
রসাতিয়ুক্তমন্নং বা দিবাস্বপ্নং নিষেবতে
অপক্বানাগতে কালে স্বয়ং দোষান্প্রকোপয়ন্
17.13
স্বদোষকোপনাদ্রোগং লভতে মরণান্তিকম্
অথ চোদ্বন্ধনাদীনি পরীতানি ব্যবস্যতি
17.14
তস্য তৈঃ কারণৈর্জন্তোঃ শরীরাচ্চ্যবতে যথা
জীবিতং প্রোচ্যমানং তদ্যথাবদুপধারয়
17.15
ঊষ্মা প্রকুপিতঃ কায়ে তীব্রবায়ুসমীরিতঃ
শরীরমনুপর্যেতি সর্বান্প্রাণান্রুণদ্ধি বৈ
17.16
অত্যর্থং বলবানূষ্মা শরীরে পরিকোপিতঃ
ভিনত্তি জীবস্থানানি তানি মর্মাণি বিদ্ধি চ
17.17
ততঃ সবেদনঃ সদ্যো জীবঃ প্রচ্যবতে ক্ষরন্
শরীরং ত্যজতে জন্তুশ্ছিদ্যমানেষু মর্মসু
বেদনাভিঃ পরীতাত্মা তদ্বিদ্ধি দ্বিজসত্তম
17.18
জাতীমরণসংবিগ্নাঃ সততং সর্বজন্তবঃ
দৃশ্যন্তে সংত্যজন্তশ্চ শরীরাণি দ্বিজর্ষভ
17.19
গর্ভসংক্রমণে চাপি মর্মণামতিসর্পণে
তাদৃশীমেব লভতে বেদনাং মানবঃ পুনঃ
17.20
ভিন্নসংধিরথ ক্লেদমদ্ভিঃ স লভতে নরঃ
যথা পঞ্চসু ভূতেষু সংশ্রিতত্বং নিগচ্ছতি
শৈত্যাত্প্রকুপিতঃ কায়ে তীব্রবায়ুসমীরিতঃ
17.21
যঃ স পঞ্চসু ভূতেষু প্রাণাপানে ব্যবস্থিতঃ
স গচ্ছত্যূর্ধ্বগো বায়ুঃ কৃচ্ছ্রান্মুক্ত্বা শরীরিণম্
17.22
শরীরং চ জহাত্যেব নিরুচ্ছ্বাসশ্চ দৃশ্যতে
নিরূষ্মা স নিরুচ্ছ্বাসো নিঃশ্রীকো গতচেতনঃ
17.23
ব্রহ্মণা সংপরিত্যক্তো মৃত ইত্যুচ্যতে নরঃ
স্রোতোভির্যৈর্বিজানাতি ইন্দ্রিয়ার্থাঞ্শরীরভৃৎ
তৈরেব ন বিজানাতি প্রাণমাহারসংভবম্
17.24
তত্রৈব কুরুতে কায়ে যঃ স জীবঃ সনাতনঃ
তেষাং যদ্যদ্ভবেদ্যুক্তং সংনিপাতে ক্বচিত্ক্বচিৎ
তত্তন্মর্ম বিজানীহি শাস্ত্রদৃষ্টং হি তত্তথা
17.25
তেষু মর্মসু ভিন্নেষু ততঃ স সমুদীরয়ন্
আবিশ্য হৃদয়ং জন্তোঃ সত্ত্বং চাশু রুণদ্ধি বৈ
ততঃ স চেতনো জন্তুর্নাভিজানাতি কিংচন
17.26
তমসা সংবৃতজ্ঞানঃ সংবৃতেষ্বথ মর্মসু
স জীবো নিরধিষ্ঠানশ্চাব্যতে মাতরিশ্বনা
17.27
ততঃ স তং মহোচ্ছ্বাসং ভৃশমুচ্ছ্বস্য দারুণম্
নিষ্ক্রামন্কম্পয়ত্যাশু তচ্ছরীরমচেতনম্
17.28
স জীবঃ প্রচ্যুতঃ কায়াত্কর্মভিঃ স্বৈঃ সমাবৃতঃ
অঙ্কিতঃ স্বৈঃ শুভৈঃ পুণ্যৈঃ পাপৈর্বাপ্যুপপদ্যতে
17.29
ব্রাহ্মণা জ্ঞানসংপন্না যথাবচ্ছ্রুতনিশ্চয়াঃ
ইতরং কৃতপুণ্যং বা তং বিজানন্তি লক্ষণৈঃ
17.30
যথান্ধকারে খদ্যোতং লীয়মানং ততস্ততঃ
চক্ষুষ্মন্তঃ প্রপশ্যন্তি তথা তং জ্ঞানচক্ষুষঃ
17.31
পশ্যন্ত্যেবংবিধাঃ সিদ্ধা জীবং দিব্যেন চক্ষুষা
চ্যবন্তং জায়মানং চ যোনিং চানুপ্রবেশিতম্
17.32
তস্য স্থানানি দৃষ্টানি ত্রিবিধানীহ শাস্ত্রতঃ
কর্মভূমিরিয়ং ভূমির্যত্র তিষ্ঠন্তি জন্তবঃ
17.33
ততঃ শুভাশুভং কৃত্বা লভন্তে সর্বদেহিনঃ
ইহৈবোচ্চাবচান্ভোগান্প্রাপ্নুবন্তি স্বকর্মভিঃ
17.34
ইহৈবাশুভকর্মা তু কর্মভির্নিরয়ং গতঃ
অবাক্স নিরয়ে পাপো মানবঃ পচ্যতে ভৃশম্
তস্মাত্সুদুর্লভো মোক্ষ আত্মা রক্ষ্যো ভৃশং ততঃ
17.35
ঊর্ধ্বং তু জন্তবো গত্বা যেষু স্থানেষ্ববস্থিতাঃ
কীর্ত্যমানানি তানীহ তত্ত্বতঃ সংনিবোধ মে
তচ্ছ্রুত্বা নৈষ্ঠিকীং বুদ্ধিং বুধ্যেথাঃ কর্মনিশ্চয়াৎ
17.36
তারারূপাণি সর্বাণি যচ্চৈতচ্চন্দ্রমণ্ডলম্
যচ্চ বিভ্রাজতে লোকে স্বভাসা সূর্যমণ্ডলম্
স্থানান্যেতানি জানীহি নরাণাং পুণ্যকর্মণাম্
17.37
কর্মক্ষয়াচ্চ তে সর্বে চ্যবন্তে বৈ পুনঃ পুনঃ
তত্রাপি চ বিশেষোঽস্তি দিবি নীচোচ্চমধ্যমঃ
17.38
ন তত্রাপ্যস্তি সংতোষো দৃষ্ট্বা দীপ্ততরাং শ্রিয়ম্
ইত্যেতা গতয়ঃ সর্বাঃ পৃথক্ত্বে সমুদীরিতাঃ
17.39
উপপত্তিং তু গর্ভস্য বক্ষ্যাম্যহমতঃ পরম্
যথাবত্তাং নিগদতঃ শৃণুষ্বাবহিতো দ্বিজ