Utshovঅধ্যায় 16
16.1
জনমেজয় উবাচ
সভায়াং বসতোস্তস্যাং নিহত্যারীন্মহাত্মনোঃ
কেশবার্জুনয়োঃ কা নু কথা সমভবদ্দ্বিজ
16.2
বৈশংপায়ন উবাচ
কৃষ্ণেন সহিতঃ পার্থঃ স্বরাজ্যং প্রাপ্য কেবলম্
তস্যাং সভায়াং রম্যায়াং বিজহার মুদা যুতঃ
16.3
ততঃ কংচিত্সভোদ্দেশং স্বর্গোদ্দেশসমং নৃপ
যদৃচ্ছয়া তৌ মুদিতৌ জগ্মতুঃ স্বজনাবৃতৌ
16.4
ততঃ প্রতীতঃ কৃষ্ণেন সহিতঃ পাণ্ডবোঽর্জুনঃ
নিরীক্ষ্য তাং সভাং রম্যামিদং বচনমব্রবীৎ
16.5
বিদিতং তে মহাবাহো সংগ্রামে সমুপস্থিতে
মাহাত্ম্যং দেবকীমাতস্তচ্চ তে রূপমৈশ্বরম্
16.6
যত্তু তদ্ভবতা প্রোক্তং তদা কেশব সৌহৃদাৎ
তত্সর্বং পুরুষব্যাঘ্র নষ্টং মে নষ্টচেতসঃ
16.7
মম কৌতূহলং ত্বস্তি তেষ্বর্থেষু পুনঃ প্রভো
ভবাংশ্চ দ্বারকাং গন্তা নচিরাদিব মাধব
16.8
এবমুক্তস্ততঃ কৃষ্ণঃ ফল্গুনং প্রত্যভাষত
পরিষ্বজ্য মহাতেজা বচনং বদতাং বরঃ
16.9
শ্রাবিতস্ত্বং ময়া গুহ্যং জ্ঞাপিতশ্চ সনাতনম্
ধর্মং স্বরূপিণং পার্থ সর্বলোকাংশ্চ শাশ্বতান্
16.10
অবুদ্ধ্বা যন্ন গৃহ্ণীথাস্তন্মে সুমহদপ্রিয়ম্
নূনমশ্রদ্দধানোঽসি দুর্মেধাশ্চাসি পাণ্ডব
16.11
স হি ধর্মঃ সুপর্যাপ্তো ব্রহ্মণঃ পদবেদনে
ন শক্যং তন্ময়া ভূয়স্তথা বক্তুমশেষতঃ
16.12
পরং হি ব্রহ্ম কথিতং যোগয়ুক্তেন তন্ময়া
ইতিহাসং তু বক্ষ্যামি তস্মিন্নর্থে পুরাতনম্
16.13
যথা তাং বুদ্ধিমাস্থায় গতিমগ্র্যাং গমিষ্যসি
শৃণু ধর্মভৃতাং শ্রেষ্ঠ গদতঃ সর্বমেব মে
16.14
আগচ্ছদ্ব্রাহ্মণঃ কশ্চিত্স্বর্গলোকাদরিংদম
ব্রহ্মলোকাচ্চ দুর্ধর্ষঃ সোঽস্মাভিঃ পূজিতোঽভবৎ
16.15
অস্মাভিঃ পরিপৃষ্টশ্চ যদাহ ভরতর্ষভ
দিব্যেন বিধিনা পার্থ তচ্ছৃণুষ্বাবিচারয়ন্
16.16
ব্রাহ্মণ উবাচ
মোক্ষধর্মং সমাশ্রিত্য কৃষ্ণ যন্মানুপৃচ্ছসি
ভূতানামনুকম্পার্থং যন্মোহচ্ছেদনং প্রভো
16.17
তত্তেঽহং সংপ্রবক্ষ্যামি যথাবন্মধুসূদন
শৃণুষ্বাবহিতো ভূত্বা গদতো মম মাধব
16.18
কশ্চিদ্বিপ্রস্তপোয়ুক্তঃ কাশ্যপো ধর্মবিত্তমঃ
আসসাদ দ্বিজং কংচিদ্ধর্মাণামাগতাগমম্
16.19
গতাগতে সুবহুশো জ্ঞানবিজ্ঞানপারগম্
লোকতত্ত্বার্থকুশলং জ্ঞাতারং সুখদুঃখয়োঃ
16.20
জাতীমরণতত্ত্বজ্ঞং কোবিদং পুণ্যপাপয়োঃ
দ্রষ্টারমুচ্চনীচানাং কর্মভির্দেহিনাং গতিম্
16.21
চরন্তং মুক্তবত্সিদ্ধং প্রশান্তং সংয়তেন্দ্রিয়ম্
দীপ্যমানং শ্রিয়া ব্রাহ্ম্যা ক্রমমাণং চ সর্বশঃ
16.22
অন্তর্ধানগতিজ্ঞং চ শ্রুত্বা তত্ত্বেন কাশ্যপঃ
তথৈবান্তর্হিতৈঃ সিদ্ধৈর্যান্তং চক্রধরৈঃ সহ
16.23
সংভাষমাণমেকান্তে সমাসীনং চ তৈঃ সহ
যদৃচ্ছয়া চ গচ্ছন্তমসক্তং পবনং যথা
16.24
তং সমাসাদ্য মেধাবী স তদা দ্বিজসত্তমঃ
চরণৌ ধর্মকামো বৈ তপস্বী সুসমাহিতঃ
প্রতিপেদে যথান্যায়ং ভক্ত্যা পরময়া যুতঃ
16.25
বিস্মিতশ্চাদ্ভুতং দৃষ্ট্বা কাশ্যপস্তং দ্বিজোত্তমম্
পরিচারেণ মহতা গুরুং বৈদ্যমতোষয়ৎ
16.26
প্রীতাত্মা চোপপন্নশ্চ শ্রুতচারিত্রসংয়ুতঃ
ভাবেন তোষয়চ্চৈনং গুরুবৃত্ত্যা পরংতপঃ
16.27
তস্মৈ তুষ্টঃ স শিষ্যায় প্রসন্নোঽথাব্রবীদ্গুরুঃ
সিদ্ধিং পরামভিপ্রেক্ষ্য শৃণু তন্মে জনার্দন
16.28
বিবিধৈঃ কর্মভিস্তাত পুণ্যয়োগৈশ্চ কেবলৈঃ
গচ্ছন্তীহ গতিং মর্ত্যা দেবলোকেঽপি চ স্থিতিম্
16.29
ন ক্বচিত্সুখমত্যন্তং ন ক্বচিচ্ছাশ্বতী স্থিতিঃ
স্থানাচ্চ মহতো ভ্রংশো দুঃখলব্ধাত্পুনঃ পুনঃ
16.30
অশুভা গতয়ঃ প্রাপ্তাঃ কষ্টা মে পাপসেবনাৎ
কামমন্যুপরীতেন তৃষ্ণয়া মোহিতেন চ
16.31
পুনঃ পুনশ্চ মরণং জন্ম চৈব পুনঃ পুনঃ
আহারা বিবিধা ভুক্তাঃ পীতা নানাবিধাঃ স্তনাঃ
16.32
মাতরো বিবিধা দৃষ্টাঃ পিতরশ্চ পৃথগ্বিধাঃ
সুখানি চ বিচিত্রাণি দুঃখানি চ ময়ানঘ
16.33
প্রিয়ৈর্বিবাসো বহুশঃ সংবাসশ্চাপ্রিয়ৈঃ সহ
ধননাশশ্চ সংপ্রাপ্তো লব্ধ্বা দুঃখেন তদ্ধনম্
16.34
অবমানাঃ সুকষ্টাশ্চ পরতঃ স্বজনাত্তথা
শারীরা মানসাশ্চাপি বেদনা ভৃশদারুণাঃ
16.35
প্রাপ্তা বিমাননাশ্চোগ্রা বধবন্ধাশ্চ দারুণাঃ
পতনং নিরয়ে চৈব যাতনাশ্চ যমক্ষয়ে
16.36
জরা রোগাশ্চ সততং বাসনানি চ ভূরিশঃ
লোকেঽস্মিন্ননুভূতানি দ্বংদ্বজানি ভৃশং ময়া
16.37
ততঃ কদাচিন্নির্বেদান্নিকারান্নিকৃতেন চ
লোকতন্ত্রং পরিত্যক্তং দুঃখার্তেন ভৃশং ময়া
ততঃ সিদ্ধিরিয়ং প্রাপ্তা প্রসাদাদাত্মনো ময়া
16.38
নাহং পুনরিহাগন্তা লোকানালোকয়াম্যহম্
আ সিদ্ধেরা প্রজাসর্গাদাত্মনো মে গতিঃ শুভা
16.39
উপলব্ধা দ্বিজশ্রেষ্ঠ তথেয়ং সিদ্ধিরুত্তমা
ইতঃ পরং গমিষ্যামি ততঃ পরতরং পুনঃ
ব্রহ্মণঃ পদমব্যগ্রং মা তে ভূদত্র সংশয়ঃ
16.40
নাহং পুনরিহাগন্তা মর্ত্যলোকং পরংতপ
প্রীতোঽস্মি তে মহাপ্রাজ্ঞ ব্রূহি কিং করবাণি তে
16.41
যদীপ্সুরুপপন্নস্ত্বং তস্য কালোঽয়মাগতঃ
অভিজানে চ তদহং যদর্থং মা ত্বমাগতঃ
অচিরাত্তু গমিষ্যামি যেনাহং ত্বামচূচুদম্
16.42
ভৃশং প্রীতোঽস্মি ভবতশ্চারিত্রেণ বিচক্ষণ
পরিপৃচ্ছ যাবদ্ভবতে ভাষেয়ং যত্তবেপ্সিতম্
16.43
বহু মন্যে চ তে বুদ্ধিং ভৃশং সংপূজয়ামি চ
যেনাহং ভবতা বুদ্ধো মেধাবী হ্যসি কাশ্যপ