অধ্যায় 9

9.1

যুধিষ্ঠির উবাচ
ব্রাহ্মণানাং তু যে লোকে প্রতিশ্রুত্য পিতামহ
ন প্রয়চ্ছন্তি মোহাত্তে কে ভবন্তি মহামতে

9.2

এতন্মে তত্ত্বতো ব্রূহি ধর্মং ধর্মভৃতাং বর
প্রতিশ্রুত্য দুরাত্মানো ন প্রয়চ্ছন্তি যে নরাঃ

9.3

ভীষ্ম উবাচ
যো ন দদ্যাত্প্রতিশ্রুত্য স্বল্পং বা যদি বা বহু
আশাস্তস্য হতাঃ সর্বাঃ ক্লীবস্যেব প্রজাফলম্

9.4

যাং রাত্রিং জায়তে পাপো যাং চ রাত্রিং বিনশ্যতি
এতস্মিন্নন্তরে যদ্যত্সুকৃতং তস্য ভারত
যচ্চ তস্য হুতং কিংচিত্সর্বং তস্যোপহন্যতে

9.5

অত্রৈতদ্বচনং প্রাহুর্ধর্মশাস্ত্রবিদো জনাঃ
নিশম্য ভরতশ্রেষ্ঠ বুদ্ধ্যা পরময়ুক্তয়া

9.6

অপি চোদাহরন্তীমং ধর্মশাস্ত্রবিদো জনাঃ
অশ্বানাং শ্যামকর্ণানাং সহস্রেণ স মুচ্যতে

9.7

অত্রৈবোদাহরন্তীমমিতিহাসং পুরাতনম্
সৃগালস্য চ সংবাদং বানরস্য চ ভারত

9.8

তৌ সখায়ৌ পুরা হ্যাস্তাং মানুষত্বে পরংতপ
অন্যাং যোনিং সমাপন্নৌ সার্গালীং বানরীং তথা

9.9

ততঃ পরাসূন্খাদন্তং সৃগালং বানরোঽব্রবীৎ
শ্মশানমধ্যে সংপ্রেক্ষ্য পূর্বজাতিমনুস্মরন্

9.10

কিং ত্বয়া পাপকং কর্ম কৃতং পূর্বং সুদারুণম্
যস্ত্বং শ্মশানে মৃতকান্পূতিকানত্সি কুত্সিতান্

9.11

এবমুক্তঃ প্রত্যুবাচ সৃগালো বানরং তদা
ব্রাহ্মণস্য প্রতিশ্রুত্য ন ময়া তদুপাকৃতম্

9.12

তত্কৃতে পাপিকাং যোনিমাপন্নোঽস্মি প্লবংগম
তস্মাদেবংবিধং ভক্ষ্যং ভক্ষয়ামি বুভুক্ষিতঃ

9.13

ইত্যেতদ্ব্রুবতো রাজন্ব্রাহ্মণস্য ময়া শ্রুতম্
কথাং কথয়তঃ পুণ্যাং ধর্মজ্ঞস্য পুরাতনীম্

9.14

শ্রুতং চাপি ময়া ভূয়ঃ কৃষ্ণস্যাপি বিশাং পতে
কথাং কথয়তঃ পূর্বং ব্রাহ্মণং প্রতি পাণ্ডব

9.15

এবমেব চ মাং নিত্যং ব্রাহ্মণাঃ সংদিশন্তি বৈ
প্রতিশ্রুত্য ভবেদ্দেয়ং নাশা কার্যা হি ব্রাহ্মণৈঃ

9.16

ব্রাহ্মণো হ্যাশয়া পূর্বং কৃতয়া পৃথিবীপতে
সুসমিদ্ধো যথা দীপ্তঃ পাবকস্তদ্বিধঃ স্মৃতঃ

9.17

যং নিরীক্ষেত সংক্রুদ্ধ আশয়া পূর্বজাতয়া
প্রদহেত হি তং রাজন্কক্ষমক্ষয্যভুগ্যথা

9.18

স এব হি যদা তুষ্টো বচসা প্রতিনন্দতি
ভবত্যগদসংকাশো বিষয়ে তস্য ভারত

9.19

পুত্রান্পৌত্রান্পশূংশ্চৈব বান্ধবান্সচিবাংস্তথা
পুরং জনপদং চৈব শান্তিরিষ্টেব পুষ্যতি

9.20

এতদ্ধি পরমং তেজো ব্রাহ্মণস্যেহ দৃশ্যতে
সহস্রকিরণস্যেব সবিতুর্ধরণীতলে

9.21

তস্মাদ্দাতব্যমেবেহ প্রতিশ্রুত্য যুধিষ্ঠির
যদীচ্ছেচ্ছোভনাং জাতিং প্রাপ্তুং ভরতসত্তম

9.22

ব্রাহ্মণস্য হি দত্তেন ধ্রুবং স্বর্গো হ্যনুত্তমঃ
শক্যং প্রাপ্তুং বিশেষেণ দানং হি মহতী ক্রিয়া

9.23

ইতো দত্তেন জীবন্তি দেবতাঃ পিতরস্তথা
তস্মাদ্দানানি দেয়ানি ব্রাহ্মণেভ্যো বিজানতা

9.24

মহদ্ধি ভরতশ্রেষ্ঠ ব্রাহ্মণস্তীর্থমুচ্যতে
বেলায়াং ন তু কস্যাংচিদ্গচ্ছেদ্বিপ্রো হ্যপূজিতঃ

Contains text from DharmicData, made available under the Open Database License (ODbL). Simple meanings are written by AI and can contain mistakes.