Utshovঅধ্যায় 10
10.1
যুধিষ্ঠির উবাচ
মিত্রসৌহৃদভাবেন উপদেশং করোতি যঃ
জাত্যাবরস্য রাজর্ষে দোষস্তস্য ভবেন্ন বা
10.2
এতদিচ্ছামি তত্ত্বেন ব্যাখ্যাতুং বৈ পিতামহ
সূক্ষ্মা গতির্হি ধর্মস্য যত্র মুহ্যন্তি মানবাঃ
10.3
ভীষ্ম উবাচ
অত্র তে বর্তয়িষ্যামি শৃণু রাজন্যথাগমম্
ঋষীণাং বদতাং পূর্বং শ্রুতমাসীদ্যথা ময়া
10.4
উপদেশো ন কর্তব্যো জাতিহীনস্য কস্যচিৎ
উপদেশে মহান্দোষ উপাধ্যায়স্য ভাষ্যতে
10.5
নিদর্শনমিদং রাজঞ্শৃণু মে ভরতর্ষভ
দুরুক্তবচনে রাজন্যথা পূর্বং যুধিষ্ঠির
ব্রহ্মাশ্রমপদে বৃত্তং পার্শ্বে হিমবতঃ শুভে
10.6
তত্রাশ্রমপদং পুণ্যং নানাবৃক্ষগণায়ুতম্
বহুগুল্মলতাকীর্ণং মৃগদ্বিজনিষেবিতম্
10.7
সিদ্ধচারণসংঘুষ্টং রম্যং পুষ্পিতকাননম্
ব্রতিভির্বহুভিঃ কীর্ণং তাপসৈরুপশোভিতম্
10.8
ব্রাহ্মণৈশ্চ মহাভাগৈঃ সূর্যজ্বলনসংনিভৈঃ
নিয়মব্রতসংপন্নৈঃ সমাকীর্ণং তপস্বিভিঃ
দীক্ষিতৈর্ভরতশ্রেষ্ঠ যতাহারৈঃ কৃতাত্মভিঃ
10.9
বেদাধ্যয়নঘোষৈশ্চ নাদিতং ভরতর্ষভ
বালখিল্যৈশ্চ বহুভির্যতিভিশ্চ নিষেবিতম্
10.10
তত্র কশ্চিত্সমুত্সাহং কৃত্বা শূদ্রো দয়ান্বিতঃ
আগতো হ্যাশ্রমপদং পূজিতশ্চ তপস্বিভিঃ
10.11
তাংস্তু দৃষ্ট্বা মুনিগণান্দেবকল্পান্মহৌজসঃ
বহতো বিবিধা দীক্ষাঃ সংপ্রহৃষ্যত ভারত
10.12
অথাস্য বুদ্ধিরভবত্তপস্যে ভরতর্ষভ
ততোঽব্রবীত্কুলপতিং পাদৌ সংগৃহ্য ভারত
10.13
ভবত্প্রসাদাদিচ্ছামি ধর্মং চর্তুং দ্বিজর্ষভ
তন্মাং ত্বং ভগবন্বক্তুং প্রব্রাজয়িতুমর্হসি
10.14
বর্ণাবরোঽহং ভগবঞ্শূদ্রো জাত্যাস্মি সত্তম
শুশ্রূষাং কর্তুমিচ্ছামি প্রপন্নায় প্রসীদ মে
10.15
কুলপতিরুবাচ
ন শক্যমিহ শূদ্রেণ লিঙ্গমাশ্রিত্য বর্তিতুম্
আস্যতাং যদি তে বুদ্ধিঃ শুশ্রূষানিরতো ভব
10.16
ভীষ্ম উবাচ
এবমুক্তস্তু মুনিনা স শূদ্রোঽচিন্তয়ন্নৃপ
কথমত্র ময়া কার্যং শ্রদ্ধা ধর্মে পরা চ মে
বিজ্ঞাতমেবং ভবতু করিষ্যে প্রিয়মাত্মনঃ
10.17
গত্বাশ্রমপদাদ্দূরমুটজং কৃতবাংস্তু সঃ
তত্র বেদিং চ ভূমিং চ দেবতায়তনানি চ
নিবেশ্য ভরতশ্রেষ্ঠ নিয়মস্থোঽভবত্সুখম্
10.18
অভিষেকাংশ্চ নিয়মান্দেবতায়তনেষু চ
বলিং চ কৃত্বা হুত্বা চ দেবতাং চাপ্যপূজয়ৎ
10.19
সংকল্পনিয়মোপেতঃ ফলাহারো জিতেন্দ্রিয়ঃ
নিত্যং সংনিহিতাভিশ্চ ওষধীভিঃ ফলৈস্তথা
10.20
অতিথীন্পূজয়ামাস যথাবত্সমুপাগতান্
এবং হি সুমহান্কালো ব্যত্যক্রামত্স তস্য বৈ
10.21
অথাস্য মুনিরাগচ্ছত্সংগত্যা বৈ তমাশ্রমম্
সংপূজ্য স্বাগতেনর্ষিং বিধিবত্পর্যতোষয়ৎ
10.22
অনুকূলাঃ কথাঃ কৃত্বা যথাবত্পর্যপৃচ্ছত
ঋষিঃ পরমতেজস্বী ধর্মাত্মা সংয়তেন্দ্রিয়ঃ
10.23
এবং স বহুশস্তস্য শূদ্রস্য ভরতর্ষভ
সোঽগচ্ছদাশ্রমমৃষিঃ শূদ্রং দ্রষ্টুং নরর্ষভ
10.24
অথ তং তাপসং শূদ্রঃ সোঽব্রবীদ্ভরতর্ষভ
পিতৃকার্যং করিষ্যামি তত্র মেঽনুগ্রহং কুরু
10.25
বাঢমিত্যেব তং বিপ্র উবাচ ভরতর্ষভ
শুচির্ভূত্বা স শূদ্রস্তু তস্যর্ষেঃ পাদ্যমানয়ৎ
10.26
অথ দর্ভাংশ্চ বন্যাশ্চ ওষধীর্ভরতর্ষভ
পবিত্রমাসনং চৈব বৃসীং চ সমুপানয়ৎ
10.27
অথ দক্ষিণমাবৃত্য বৃসীং পরমশীর্ষিকাম্
কৃতামন্যায়তো দৃষ্ট্বা ততস্তমৃষিরব্রবীৎ
10.28
কুরুষ্বৈতাং পূর্বশীর্ষাং ভব চোদঙ্মুখঃ শুচিঃ
স চ তত্কৃতবাঞ্শূদ্রঃ সর্বং যদৃষিরব্রবীৎ
10.29
যথোপদিষ্টং মেধাবী দর্ভাদীংস্তান্যথাতথম্
হব্যকব্যবিধিং কৃত্স্নমুক্তং তেন তপস্বিনা
10.30
ঋষিণা পিতৃকার্যে চ স চ ধর্মপথে স্থিতঃ
পিতৃকার্যে কৃতে চাপি বিসৃষ্টঃ স জগাম হ
10.31
অথ দীর্ঘস্য কালস্য স তপ্যঞ্শূদ্রতাপসঃ
বনে পঞ্চত্বমগমত্সুকৃতেন চ তেন বৈ
অজায়ত মহারাজরাজবংশে মহাদ্যুতিঃ
10.32
তথৈব স ঋষিস্তাত কালধর্মমবাপ্য হ
পুরোহিতকুলে বিপ্র আজাতো ভরতর্ষভ
10.33
এবং তৌ তত্র সংভূতাবুভৌ শূদ্রমুনী তদা
ক্রমেণ বর্ধিতৌ চাপি বিদ্যাসু কুশলাবুভৌ
10.34
অথর্ববেদে বেদে চ বভূবর্ষিঃ সুনিশ্চিতঃ
কল্পপ্রয়োগে চোত্পন্নে জ্যোতিষে চ পরং গতঃ
সখ্যে চাপি পরা প্রীতিস্তয়োশ্চাপি ব্যবর্ধত
10.35
পিতর্যুপরতে চাপি কৃতশৌচঃ স ভারত
অভিষিক্তঃ প্রকৃতিভী রাজপুত্রঃ স পার্থিবঃ
অভিষিক্তেন স ঋষিরভিষিক্তঃ পুরোহিতঃ
10.36
স তং পুরোধায় সুখমবসদ্ভরতর্ষভ
রাজ্যং শশাস ধর্মেণ প্রজাশ্চ পরিপালয়ন্
10.37
পুণ্যাহবাচনে নিত্যং ধর্মকার্যেষু চাসকৃৎ
উত্স্ময়ন্প্রাহসচ্চাপি দৃষ্ট্বা রাজা পুরোহিতম্
এবং স বহুশো রাজন্পুরোধসমুপাহসৎ
10.38
লক্ষয়িত্বা পুরোধাস্তু বহুশস্তং নরাধিপম্
উত্স্ময়ন্তং চ সততং দৃষ্ট্বাসৌ মন্যুমানভূৎ
10.39
অথ শূন্যে পুরোধাস্তু সহ রাজ্ঞা সমাগতঃ
কথাভিরনুকূলাভী রাজানমভিরাময়ৎ
10.40
ততোঽব্রবীন্নরেন্দ্রং স পুরোধা ভরতর্ষভ
বরমিচ্ছাম্যহং ত্বেকং ত্বয়া দত্তং মহাদ্যুতে
10.41
রাজোবাচ
বরাণাং তে শতং দদ্যাং কিমুতৈকং দ্বিজোত্তম
স্নেহাচ্চ বহুমানাচ্চ নাস্ত্যদেয়ং হি মে তব
10.42
পুরোহিত উবাচ
একং বৈ বরমিচ্ছামি যদি তুষ্টোঽসি পার্থিব
যদ্দদাসি মহারাজ সত্যং তদ্বদ মানৃতম্
10.43
ভীষ্ম উবাচ
বাঢমিত্যেব তং রাজা প্রত্যুবাচ যুধিষ্ঠির
যদি জ্ঞাস্যামি বক্ষ্যামি অজানন্ন তু সংবদে
10.44
পুরোহিত উবাচ
পুণ্যাহবাচনে নিত্যং ধর্মকৃত্যেষু চাসকৃৎ
শান্তিহোমেষু চ সদা কিং ত্বং হসসি বীক্ষ্য মাম্
10.45
সব্রীডং বৈ ভবতি হি মনো মে হসতা ত্বয়া
কাময়া শাপিতো রাজন্নান্যথা বক্তুমর্হসি
10.46
ভাব্যং হি কারণেনাত্র ন তে হাস্যমকারণম্
কৌতূহলং মে সুভৃশং তত্ত্বেন কথয়স্ব মে
10.47
রাজোবাচ
এবমুক্তে ত্বয়া বিপ্র যদবাচ্যং ভবেদপি
অবশ্যমেব বক্তব্যং শৃণুষ্বৈকমনা দ্বিজ
10.48
পূর্বদেহে যথা বৃত্তং তন্নিবোধ দ্বিজোত্তম
জাতিং স্মরাম্যহং ব্রহ্মন্নবধানেন মে শৃণু
10.49
শূদ্রোঽহমভবং পূর্বং তাপসো ভৃশসংয়ুতঃ
ঋষিরুগ্রতপাস্ত্বং চ তদাভূর্দ্বিজসত্তম
10.50
প্রীয়তা হি তদা ব্রহ্মন্মমানুগ্রহবুদ্ধিনা
পিতৃকার্যে ত্বয়া পূর্বমুপদেশঃ কৃতোঽনঘ
বৃস্যাং দর্ভেষু হব্যে চ কব্যে চ মুনিসত্তম
10.51
এতেন কর্মদোষেণ পুরোধাস্ত্বমজায়থাঃ
অহং রাজা চ বিপ্রেন্দ্র পশ্য কালস্য পর্যয়ম্
মত্কৃতে হ্যুপদেশেন ত্বয়া প্রাপ্তমিদং ফলম্
10.52
এতস্মাত্কারণাদ্ব্রহ্মন্প্রহসে ত্বাং দ্বিজোত্তম
ন ত্বাং পরিভবন্ব্রহ্মন্প্রহসামি গুরুর্ভবান্
10.53
বিপর্যয়েণ মে মন্যুস্তেন সংতপ্যতে মনঃ
জাতিং স্মরাম্যহং তুভ্যমতস্ত্বাং প্রহসামি বৈ
10.54
এবং তবোগ্রং হি তপ উপদেশেন নাশিতম্
পুরোহিতত্বমুত্সৃজ্য যতস্ব ত্বং পুনর্ভবে
10.55
ইতস্ত্বমধমামন্যাং মা যোনিং প্রাপ্স্যসে দ্বিজ
গৃহ্যতাং দ্রবিণং বিপ্র পূতাত্মা ভব সত্তম
10.56
ভীষ্ম উবাচ
ততো বিসৃষ্টো রাজ্ঞা তু বিপ্রো দানান্যনেকশঃ
ব্রাহ্মণেভ্যো দদৌ বিত্তং ভূমিং গ্রামাংশ্চ সর্বশঃ
10.57
কৃচ্ছ্রাণি চীর্ত্বা চ ততো যথোক্তানি দ্বিজোত্তমঃ
তীর্থানি চাভিগত্বা বৈ দানানি বিবিধানি চ
10.58
দত্ত্বা গাশ্চৈব বিপ্রাণাং পূতাত্মা সোঽভবদ্দ্বিজঃ
তমেব চাশ্রমং গত্বা চচার বিপুলং তপঃ
10.59
ততঃ সিদ্ধিং পরাং প্রাপ্তো ব্রাহ্মণো রাজসত্তম
সংমতশ্চাভবত্তেষামাশ্রমেঽঽশ্রমবাসিনাম্
10.60
এবং প্রাপ্তো মহত্কৃচ্ছ্রমৃষিঃ স নৃপসত্তম
ব্রাহ্মণেন ন বক্তব্যং তস্মাদ্বর্ণাবরে জনে
10.61
বর্জয়েদুপদেশং চ সদৈব ব্রাহ্মণো নৃপ
উপদেশং হি কুর্বাণো দ্বিজঃ কৃচ্ছ্রমবাপ্নুয়াৎ
10.62
এষিতব্যং সদা বাচা নৃপেণ দ্বিজসত্তমাৎ
ন প্রবক্তব্যমিহ হি কিংচিদ্বর্ণাবরে জনে
10.63
ব্রাহ্মণাঃ ক্ষত্রিয়া বৈশ্যাস্ত্রয়ো বর্ণা দ্বিজাতয়ঃ
এতেষু কথয়ন্রাজন্ব্রাহ্মণো ন প্রদুষ্যতি
10.64
তস্মাত্সদ্ভির্ন বক্তব্যং কস্যচিত্কিংচিদগ্রতঃ
সূক্ষ্মা গতির্হি ধর্মস্য দুর্জ্ঞেয়া হ্যকৃতাত্মভিঃ
10.65
তস্মান্মৌনানি মুনয়ো দীক্ষাং কুর্বন্তি চাদৃতাঃ
দুরুক্তস্য ভয়াদ্রাজন্নানুভাষন্তি কিংচন
10.66
ধার্মিকা গুণসংপন্নাঃ সত্যার্জবপরায়ণাঃ
দুরুক্তবাচাভিহতাঃ প্রাপ্নুবন্তীহ দুষ্কৃতম্
10.67
উপদেশো ন কর্তব্যঃ কদাচিদপি কস্যচিৎ
উপদেশাদ্ধি তত্পাপং ব্রাহ্মণঃ সমবাপ্নুয়াৎ
10.68
বিমৃশ্য তস্মাত্প্রাজ্ঞেন বক্তব্যং ধর্মমিচ্ছতা
সত্যানৃতেন হি কৃত উপদেশো হিনস্তি বৈ
10.69
বক্তব্যমিহ পৃষ্টেন বিনিশ্চিত্য বিপর্যয়ম্
স চোপদেশঃ কর্তব্যো যেন ধর্মমবাপ্নুয়াৎ
10.70
এতত্তে সর্বমাখ্যাতমুপদেশে কৃতে সতি
মহান্ক্লেশো হি ভবতি তস্মান্নোপদিশেত্ক্বচিৎ