Utshovঅধ্যায় 11
11.1
যুধিষ্ঠির উবাচ
কীদৃশে পুরুষে তাত স্ত্রীষু বা ভরতর্ষভ
শ্রীঃ পদ্মা বসতে নিত্যং তন্মে ব্রূহি পিতামহ
11.2
ভীষ্ম উবাচ
অত্র তে বর্তয়িষ্যামি যথাদৃষ্টং যথাশ্রুতম্
রুক্মিণী দেবকীপুত্রসংনিধৌ পর্যপৃচ্ছত
11.3
নারায়ণস্যাঙ্কগতাং জ্বলন্তীং; দৃষ্ট্বা শ্রিয়ং পদ্মসমানবক্ত্রাম্
কৌতূহলাদ্বিস্মিতচারুনেত্রা; পপ্রচ্ছ মাতা মকরধ্বজস্য
11.4
কানীহ ভূতান্যুপসেবসে ত্বং; সংতিষ্ঠতী কানি ন সেবসে ত্বম্
তানি ত্রিলোকেশ্বরভূতকান্তে; তত্ত্বেন মে ব্রূহি মহর্ষিকন্যে
11.5
এবং তদা শ্রীরভিভাষ্যমাণা; দেব্যা সমক্ষং গরুডধ্বজস্য
উবাচ বাক্যং মধুরাভিধানং; মনোহরং চন্দ্রমুখী প্রসন্না
11.6
বসামি সত্যে সুভগে প্রগল্ভে; দক্ষে নরে কর্মণি বর্তমানে
নাকর্মশীলে পুরুষে বসামি; ন নাস্তিকে সাংকরিকে কৃতঘ্নে
ন ভিন্নবৃত্তে ন নৃশংসবৃত্তে; ন চাপি চৌরে ন গুরুষ্বসূয়ে
11.7
যে চাল্পতেজোবলসত্ত্বসারা; হৃষ্যন্তি কুপ্যন্তি চ যত্র তত্র
ন দেবি তিষ্ঠামি তথাবিধেষু; নরেষু সংসুপ্তমনোরথেষু
11.8
যশ্চাত্মনি প্রার্থয়তে ন কিংচি;দ্যশ্চ স্বভাবোপহতান্তরাত্মা
তেষ্বল্পসংতোষরতেষু নিত্যং; নরেষু নাহং নিবসামি দেবি
11.9
বসামি ধর্মশীলেষু ধর্মজ্ঞেষু মহাত্মসু
বৃদ্ধসেবিষু দান্তেষু সত্ত্বজ্ঞেষু মহাত্মসু
11.10
স্ত্রীষু ক্ষান্তাসু দান্তাসু দেবদ্বিজপরাসু চ
বসামি সত্যশীলাসু স্বভাবনিরতাসু চ
11.11
প্রকীর্ণভাণ্ডামনবেক্ষ্যকারিণীং; সদা চ ভর্তুঃ প্রতিকূলবাদিনীম্
পরস্য বেশ্মাভিরতামলজ্জা;মেবংবিধাং স্ত্রীং পরিবর্জয়ামি
11.12
লোলামচোক্ষামবলেহিনীং চ; ব্যপেতধৈর্যাং কলহপ্রিয়াং চ
নিদ্রাভিভূতাং সততং শয়ানা;মেবংবিধাং স্ত্রীং পরিবর্জয়ামি
11.13
সত্যাসু নিত্যং প্রিয়দর্শনাসু; সৌভাগ্যয়ুক্তাসু গুণান্বিতাসু
বসামি নারীষু পতিব্রতাসু; কল্যাণশীলাসু বিভূষিতাসু
11.14
যানেষু কন্যাসু বিভূষণেষু; যজ্ঞেষু মেঘেষু চ বৃষ্টিমত্সু
বসামি ফুল্লাসু চ পদ্মিনীষু; নক্ষত্রবীথীষু চ শারদীষু
11.15
শৈলেষু গোষ্ঠেষু তথা বনেষু; সরঃসু ফুল্লোত্পলপঙ্কজেষু
নদীষু হংসস্বননাদিতাসু; ক্রৌঞ্চাবঘুষ্টস্বরশোভিতাসু
11.16
বিস্তীর্ণকূলহ্রদশোভিতাসু; তপস্বিসিদ্ধদ্বিজসেবিতাসু
বসামি নিত্যং সুবহূদকাসু; সিংহৈর্গজৈশ্চাকুলিতোদকাসু
মত্তে গজে গোবৃষভে নরেন্দ্রে; সিংহাসনে সত্পুরুষে চ নিত্যম্
11.17
যস্মিন্গৃহে হূয়তে হব্যবাহো; গোব্রাহ্মণশ্চার্চ্যতে দেবতাশ্চ
কালে চ পুষ্পৈর্বলয়ঃ ক্রিয়ন্তে; তস্মিন্গৃহে নিত্যমুপৈমি বাসম্
11.18
স্বাধ্যায়নিত্যেষু দ্বিজেষু নিত্যং; ক্ষত্রে চ ধর্মাভিরতে সদৈব
বৈশ্যে চ কৃষ্যাভিরতে বসামি; শূদ্রে চ শুশ্রূষণনিত্যয়ুক্তে
11.19
নারায়ণে ত্বেকমনা বসামি; সর্বেণ ভাবেন শরীরভূতা
তস্মিন্হি ধর্মঃ সুমহান্নিবিষ্টো; ব্রহ্মণ্যতা চাত্র তথা প্রিয়ত্বম্
11.20
নাহং শরীরেণ বসামি দেবি; নৈবং ময়া শক্যমিহাভিধাতুম্
যস্মিংস্তু ভাবেন বসামি পুংসি; স বর্ধতে ধর্ময়শোর্থকামৈঃ